Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 88: Yohane Baptisi Yesu

Ní kasemi 88: Yohane Baptisi Yesu

HYƐ lahuɛ ɔ nɛ ma nɛ e ba ma nyumu ɔ yi kpɛti ɔ. Yesu ji nyumu ɔ nɛ. Amlɔ nɛ ɔ, e ye maa pee jeha 30. Nɛ nyumu ɔ nɛ piɛɛ e he ɔ ji Yohane. Wa kase e he ní bɔɔ momo. O kai benɛ Maria ya slaa e wekuno nɛ ji Elizabet, nɛ bimwɔyo ɔ nɛ ngɛ Elizabet mi mi ɔ tu kɛ bua jɔmi ɔ lo? Yohane ji jamɛ a bimwɔyo ɔ nɛ́ a fɔ we lɛ lolo ɔ nɛ. Se amlɔ nɛ ɔ, mɛni Yohane kɛ Yesu ngɛ pee?

Yesu nɛ a ngɛ lɛ baptisie

Piɔ nɛ ɔ pɛ nɛ Yohane ngɔ Yesu kɛ wo Yordan Pa a mi. Ja ji bɔnɛ a baptisii nɔ. A ngɔɔ lɛ kɛ woɔ nyu ɔ mi, kɛkɛ a wo e nɔ ekohu. Akɛnɛ enɛ ɔ ji nɔ́ nɛ Yohane peeɔ nihi heje ɔ, a tsɛɛ lɛ ke Yohane Baptisilɔ ɔ. Se mɛni heje Yohane baptisi Yesu ɔ?

Yohane baptisi Yesu ejakaa Yesu ba de lɛ ke e baptisi lɛ. Yohane baptisii nihi nɛ a pia a he ngɛ ní yayamihi nɛ a pee ɔ he. Se anɛ Yesu pee yayami ko nɛ́ e sa kaa e pia e he ngɛ he lo? Dɛbi, Yesu pee we yayami ko ejakaa e ji Mawu Bi nɛ je hiɔwe. Lɔɔ he ɔ, e de Yohane nɛ e baptisi lɛ ngɛ yi mi tomi kpa ko he. Ha nɛ waa hyɛ jamɛ a yi mi tomi ɔ.

Loko Yesu maa ba Yohane ngɔ ngɛ hiɛ ɔ, kapitɛ ji lɛ. Kapitɛ ji nɔ nɛ ngɔɔ tso kɛ peeɔ níhi kaa okplɔɔ kɛ sɛhi, kɛ ní kpahi. Maria huno nɛ ji Yosef ji kapitɛ, nɛ e tsɔɔ Yesu kapitɛ nítsumi ɔ. Se Yehowa tsɔ we e Bi ɔ kɛ́ ba zugba a nɔ nɛ e ba pee kapitɛ. E ngɛ nítsumi pɔtɛɛ ha Yesu, nɛ be ɔ su nɛ e maa je nítsumi nɛ ɔ sisi. Lɔɔ he ɔ, Yesu de Yohane kaa e baptisi lɛ konɛ e kɛ tsɔɔ kaa amlɔ nɛ ɔ, e ba nɛ́ e ba pee e Tsɛ ɔ suɔmi nya ní. Anɛ Mawu bua jɔ enɛ ɔ he lo?

Ee, Mawu bua jɔ he, ejakaa benɛ Yesu je kpo ngɛ nyu ɔ mi ɔ, gbi ko je hiɔwe de ke: ‘Ye Bi nɛ i suɔ ji nɛ ɔ nɛ.’ Jehanɛ ɔ, e pee kaa nɔ́ nɛ hiɔwe nya bli nɛ lahuɛ nɛ ɔ ma nɛ e ba ma Yesu yi kpɛti. Se pi lahuɛ nitsɛnitsɛ. E je eko kɛkɛ. E ji Mawu mumi klɔuklɔu ɔ.

Amlɔ nɛ ɔ, Yesu ngɛ níhi fuu nɛ e ma susu he, lɔɔ he ɔ, e ho he ko banee ya ligbi 40. Satan ya e ngɔ ngɛ lejɛ ɔ. Nɛ Satan ka si etɛ sɔuu kaa e ma ha Yesu nɛ e pee nɔ́ ko kɛ tɔ̃ Mawu mlaa a nɔ. Se Yesu kua ja peemi.

Lɔɔ se ɔ, Yesu kpale e se nɛ e kɛ nyumuhi komɛ ya kpe. Pee se ɔ, a ba plɛ e kekle se nyɛɛli aloo kaseli. A kpɛti ní komɛ a biɛhi ji Andrea, Petro (nɛ a tsɛɛ lɛ hu ke Simon), Filipo kɛ Natanael (nɛ e biɛ kpa hu ji Bartolomeo). Yesu kɛ e kaseli ehe nɛ ɔmɛ pue Galilea kpo ɔ mi blɔ. Benɛ a su Galilea a, a ya to si ngɛ Natanael ma mi nɛ ji Kana. Yesu ya yo kpeemi ngua ko sisi, nɛ lejɛ ɔ e pee e kekle nyakpɛ ní ngɛ. O le nɔ́ nɛ e pee lo? E ha nɛ nyu plɛ pee wai.

Mateo 3:13-17; 4:1-11; 13:55; Marko 6:3; Yohane 1:29-51; 2:1-12.



Sane Bimihi

  • Mɛnɔmɛ ji nyumuhi enyɔ nɛ a ngɛ foni ɔ mi ɔ?
  • Kɛ a baptisii nɔ kɛɛ?
  • Mɛnɔmɛ Yohane pɔɔ mɛ baptisimi?
  • Mɛni yi mi tomi pɔtɛɛ heje nɛ Yesu de Yohane kaa e baptisi lɛ ngɛ ɔ?
  • Mɛni blɔ nɔ Mawu tsɔɔ ngɛ kaa e bua jɔ Yesu baptisimi ɔ he?
  • Mɛni ba benɛ Yesu ya hi he ko banee ligbi 40?
  • Mɛnɔmɛ ji Yesu kekleekle se nyɛɛli aloo kaseli komɛ, nɛ mɛni ji kekleekle nyakpɛ ní nɛ e pee?

Sane bimi kpahi

  • Kane Mateo 3:13-17.

    Mɛni nɔhyɛ nɔ́ Yesu pee kɛ fɔ si ha e kaseli ɔmɛ a baptisimi? (La 40:7, 8; Mat. 28:19, 20; Luka 3:21, 22)

  • Kane Mateo 4:1-11.

    Mɛni blɔ nɔ bɔnɛ Yesu ngɔ Ngmami ɔmɛ kɛ tsu ní kɛ he bemi ɔ woɔ wɔ he wami ngɛ konɛ waa kase Baiblo ɔ daa? (Mat. 4:5-7; 2 Pet. 3:17, 18; 1 Yoh. 4:1)

  • Kane Yohane 1:29-51.

    Mɛnɔ nɔ Yohane Baptisilɔ ɔ gbla e kaseli ɔmɛ a juɛmi kɛ ya, nɛ mɛni blɔ nɔ wa ma nyɛ maa kase lɛ mwɔnɛ ɔ? (Yoh. 1:29, 35, 36; 3:30; Mat. 23:10)

  • Kane Yohane 2:1-12.

    Mɛni blɔ nɔ nyakpɛ ní nɛ Yesu pee kekleekle ɔ tsɔɔ kaa Yehowa ngɔɔ ní kpakpahi kɛ haa e sɔmɔli? (Yoh. 2:9, 10; La 84:11; Yak. 1:17)