Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 87: Jokuɛ Yesu Ngɛ́ Sɔlemi We ɔ

Ní kasemi 87: Jokuɛ Yesu Ngɛ́ Sɔlemi We ɔ

HYƐ jokuɛ nyumuyo ɔ nɛ e kɛ nikɔtɔma amɛ ngɛ munyu tue ngɛ foni ɔ mi ɔ. Nikɔtɔma amɛ ji tsɔɔli ngɛ Mawu sɔlemi we nɛ ngɛ Yerusalem ɔ. Nɛ jokuɛ nyumuyo ɔ ji Yesu. E wa bɔɔ jehanɛ ɔ. Amlɔ nɛ ɔ, e ye jeha 12.

Tsɔɔli ɔmɛ a nya kpɛ a he kaa Yesu le Mawu kɛ níhi nɛ́ a ngma ngɛ Baiblo ɔ mi ɔ he ní fuu. Se mɛni heje nɛ Yosef kɛ Maria lɛɛ a be hiɛ ɔ? Jije a ngɛ? Ha nɛ waa hyɛ.

Jokuɛ Yesu nɛ e kɛ tsɔɔli ngɛ munyu tue

Daa jeha a, Yosef ngɔɔ e weku ɔ kɛ baa Yerusalem nɛ a ba yeɔ gbijlɔ pɔtɛɛ nɛ a tsɛɛ ke Hetsɔmi ɔ. Kɛ je Nazaret kɛ ya Yerusalem ji blɔ gagaa. Lɔle be, nɛ tlee hu be. Ní nɛ ɔmɛ be ngɛ jamɛ a be ɔ mi. Lɔɔ he ɔ, nihi fuu nyɛɛɔ, nɛ a yeɔ ligbi etɛ loko a ya suu Yerusalem.

Amlɔ nɛ ɔ, Yosef weku ɔ kle. Lɔɔ he ɔ, Yesu nyɛminyumuhi kɛ nyɛmiyihi wawi komɛ ngɛ nɛ e sa kaa a hyɛ mɛ. Lɔɔ he ɔ, jeha nɛ ɔ, Yosef kɛ Maria kɛ a bimɛ ɔmɛ hia blɔ gagaa a kɛ kpale kɛ yaa Nazaret. A susu kaa Yesu piɛɛ blɔ hiali kpa amɛ a he. Se benɛ je jɔ nɛ a ya to si ngɛ blɔ ɔ nɔ he ko ɔ, a nɛ́ Yesu. A hla lɛ ngɛ a wekuli kɛ a huɛmɛ a kpɛti se a nɛ́ lɛ! Lɔɔ he ɔ, a kpale kɛ ho Yerusalem ya konɛ a ya hla lɛ ngɛ lejɛ ɔ.

Nyagbe ɔ, a ba na Yesu ngɛ tsɔɔli ɔmɛ a ngɔ ngɛ sɔlemi we ɔ. E ngɛ mɛ tue bue nɛ e ngɛ mɛ sanehi bie. Ni ɔmɛ tsuo a he mi po ngɛ ní lemi nɛ Yesu ngɛ ɔ heje. Maria de Yesu ke: ‘Ye bi, mɛni heje o pee wɔ kikɛ? I kɛ o tsɛ kpa si kɛ hla mo hluu.’

Yesu ha heto ke: ‘Mɛni heje e sa kaa nyɛ hla mi? Anɛ nyɛ li kaa e sa nɛ́ ma hi ye Tsɛ we ɔ mi lo?’

Ee, Yesu suɔ kaa e maa hi he nɛ e ma nyɛ maa kase Mawu he ní ngɛ. Anɛ pi ja nɛ e sa kaa wɔ hu waa pee wa ní lo? Benɛ a ngɛ Nazaret ɔ, Yesu yaa kpe tsuaa kpe nɛ a peeɔ kɛ ha jami daa otsi. Akɛnɛ e buɔ tue saminya heje ɔ, e kase ní fuu kɛ je Baiblo ɔ mi. E sa nɛ waa pee wa ní kaa Yesu.

Luka 2:41-52; Mateo 13:53-56.



Sane Bimihi

  • Yesu ngɛ foni ɔ mi ɔ ye jeha enyɛmɛ, nɛ jije e ngɛ?
  • Mɛni Yosef kɛ e weku ɔ peeɔ daa jeha?
  • Mɛni heje Yosef kɛ Maria kpale a se kɛ ho Yerusalem ya ngɛ ligbi kake se benɛ a ngɛ blɔ hiae kɛ yaa we mi ɔ?
  • Jije Yosef kɛ Maria ya na Yesu ngɛ, nɛ mɛni heje ni ɔmɛ ngɛ lejɛ ɔ a he mi po ɔ?
  • Mɛni Yesu de e nyɛ Maria?
  • Kɛ wa maa pee kɛɛ kɛ kase Mawu he ní kaa bɔnɛ Yesu pee ɔ?

Sane bimi kpahi

  • Kane Luka 2:41-52.

    E ngɛ mi kaa Mlaa a biɔ nɛ nyumuhi pɛ nɛ a ya gbijlɔhi nɛ a yeɔ daa jeha mohu, se mɛni nɔhyɛ nɔ́ kpakpa Yosef kɛ Maria pee kɛ fɔ si ha fɔli mwɔnɛ ɔ? (Luka 2:41; 5 Mose 16:16; 31:12; Abɛ 22:6)

    Mɛni blɔ nɔ Yesu pee nɔhyɛ nɔ́ kpakpa kɛ ha jokuɛwi ngɛ tue bumi nɛ a maa pee ha a fɔli mwɔnɛ ɔ he? (Luka 2:51; 5 Mose 5:16; Abɛ 23:22; Kol. 3:20)

  • Kane Mateo 13:53-56.

    Yesu helo nya nyɛminyumuhi eywiɛ nɛ a tsɛ a biɛhi ngɛ Baiblo ɔ mi ɔ ji mɛnɔmɛ, nɛ pee se ɔ, a ngɔ a kpɛti nihi enyɔ kɛ tsu ní ngɛ Kristofoli asafo ɔ mi ngɛ mɛni blɔ nɔ? (Mat. 13:55; Níts. 12:17; 15:6, 13; 21:18; Gal. 1:19; Yak. 1:1; Yuda 1)