Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 86: Nyumuhi Nɛ́ Dodoe Tsɔɔ Mɛ Blɔ

Ní kasemi 86: Nyumuhi Nɛ́ Dodoe Tsɔɔ Mɛ Blɔ
Dodoe mi hyɛli

ANƐ o na dodoe ɔ nɛ ngɛ kpɛe nɛ nyumu ɔmɛ a kpɛti nɔ kake ngɛ lɛ nine tsɔɔe ɔ lo? Dodoe ɔ bɔni kpɛmi benɛ a je Yerusalem. Nyumuhi nɛ ɔmɛ je Puje he blɔ, nɛ a kase dodoehi a he ní. A he ye kaa dodoe ehe nɛ ɔ ngɛ mɛ blɔ tsɔɔe kɛ yaa nɔmlɔ ngua ko ngɔ.

Benɛ nyumu ɔmɛ ya su Yerusalem ɔ, a bi ke: ‘Jije bimwɔyo nɛ e ma ba pee Yuda matsɛ ɔ ngɛ?’ “Yudabi” ji biɛ kpa nɛ a kɛ tsɛɛ Israelbi. Nyumu ɔmɛ tsa nɔ nɛ a de ke: ‘Wa na bimwɔyo ɔ he dodoe ngɛ puje he nɛ wa ba konɛ wa ba ja lɛ.’

Benɛ Herode nɛ ji Yerusalem matsɛ ɔ nu sane nɛ ɔ, e mi mi fu. E sume kaa matsɛ kpa ko nɛ ba ngɔ e blɔ he ɔ. Lɔɔ he ɔ, Herode tsɛ osɔfo nikɔtɔma amɛ nɛ e bi mɛ ke: ‘Jije a ma fɔ matsɛ nɛ a wo e he si ɔ ngɛ?’ A ha lɛ heto ke: ‘Baiblo ɔ de ke ngɛ Betlehem.’

Lɔɔ he ɔ, Herode tsɛ nyumuhi nɛ je Puje he ɔ nɛ e de mɛ ke: ‘Nyɛ ya hla bimwɔyo ɔ. Nɛ ke nyɛ na lɛ ɔ, nyɛ ba de mi. I suɔ kaa imi hu ma ya ja lɛ.’ Se ngɛ anɔkuale mi ɔ, Herode ngɛ hlae nɛ e gbe bimwɔyo ɔ!

Lɔɔ se ɔ, dodoe ɔ nyɛɛ nyumu ɔmɛ a hɛ mi kɛ ho Betlehem ya, nɛ e ya da he nɛ bimwɔyo ɔ ngɛ ɔ. Benɛ nyumu ɔmɛ sɛ we ɔ mi ɔ, a na Maria kɛ bimwɔyo Yesu ɔ. Nɛ a je nike ní ngɛ a tlomi ɔmɛ a mi nɛ a ngɔ ha Yesu. Pee se ɔ, Yehowa wo nyumu ɔmɛ si ngɛ nlami mi kaa a ko kpale kɛ ya Herode ngɔ hu. Lɔɔ he ɔ, a gu blɔ kpa kɛ kpale kɛ ho a ma mi ya.

Benɛ Herode na kaa nyumuhi nɛ je Puje he ɔ kpale kɛ ho a ma mi ya a, e mi mi fu wawɛɛ. Lɔɔ he ɔ, e fã kaa a gbe bimwɔwi nyumuhi tsuo ngɛ Betlehem nɛ́ a ye kɛ ya su jeha enyɔ nɔ. Se akɛnɛ Yehowa sɛ hlami bɔ Yosef kɔkɔ ngɛ nlami mi heje ɔ, e ngɔ e weku ɔ nɛ a je kɛ ho Mizraim ya. Pee se benɛ Yosef nu kaa Herode gbo ɔ, e ngɔ Maria kɛ Yesu nɛ a kpale kɛ ba Nazaret. Hiɛ ɔ ji he nɛ Yesu hi kɛ wa.

Mɛnɔ o susu kaa e ha dodoe he ɔ kpɛ ɔ? Mo kai kaa nyumu ɔmɛ sɛ hlami kɛ ya Yerusalem benɛ a na dodoe ɔ. Satan Abosiami suɔ nɛ́ e gbe Mawu Bi ɔ, nɛ e le kaa Matsɛ Herode nɛ ngɛ Yerusalem nɔ yee ɔ maa bɔ mɔde kaa e maa gbe lɛ. Lɔɔ he ɔ, Satan ji nɔ nɛ ha dodoe ɔ kpɛ ɔ nɛ.

Mateo 2:1-23; Mika 5:2.



Sane Bimihi

  • Mɛnɔmɛ ji nyumuhi nɛ ngɛ foni ɔ mi ɔ, nɛ mɛni heje a kpɛti nɔ kake ngɛ dodoe ɔ nine tsɔɔe ɔ?
  • Mɛni heje Matsɛ Herode mi mi fu, nɛ mɛni e pee?
  • Jije dodoe nɛ ngɛ kpɛe ɔ nyɛɛ nyumu ɔmɛ a hɛ mi kɛ ya, se mɛni heje nɛ a gu blɔ kpa kɛ kpale ho a ma mi ya?
  • Mɛni fãmi Herode kɛ ha, nɛ mɛni heje?
  • Mɛni Yehowa de Yosef kaa e pee?
  • Mɛnɔ ha dodoe ehe ɔ kpɛ, nɛ mɛni heje?

Sane bimi kpa

  • Kane Mateo 2:1-23.

    Jeha enyɛmɛ Yesu ye benɛ dodoe mi hyɛli ɔmɛ ba slaa lɛ ɔ, nɛ jamɛ a be ɔ mi ɔ, jije e ngɛ? (Mat. 2:1, 11, 16)