Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 85: A Fɔ Yesu Ngɛ Lohwehi A Hwɔ He

Ní kasemi 85: A Fɔ Yesu Ngɛ Lohwehi A Hwɔ He

ANƐ o le nɔ nɛ bimwɔyo nɛ ɔ ji lo? Lɛ ji Yesu. Piɔ nɛ ɔ pɛ a fɔ lɛ ngɛ lohwehi a hwɔ he. Maria ngɔ Yesu kɛ yaa fɔ daka nɛ teji kɛ lohwe kpa amɛ yeɔ ní ngɛ mi ɔ mi. Se mɛni heje Maria kɛ Yosef ba je lohwe ɔmɛ a kpɛti ngɛ hiɛ ɔ? Pi bi fɔmi he ji hiɛ ɔ, aloo pi ja?

Ee, ja. Se nɔ́ nɛ ha a ba je hiɛ ɔ ji nɛ ɔ nɛ: Roma nɔ yelɔ nɛ ji Kaisare Augusto wo mlaa kaa nɔ tsuaa nɔ nɛ ho e ma mi he nɛ a fɔ lɛ ngɛ ɔ ya konɛ a ya ngma e biɛ kɛ wo womi mi. A fɔ Yosef ngɛ Betlehem. Se benɛ e kɛ Maria ya su ɔ, a nɛ́ tsu nɛ a to mi. Enɛ ɔ heje ɔ, e ba mi kaa a ba piɛɛ lohwe ɔmɛ a he ngɛ hiɛ ɔ. Jamɛ a ligbi ɔ nɔuu nɛ Maria fɔ Yesu ɔ nɛ! Se kaa bɔnɛ o na ngɛ foni ɔ mi ɔ, nɔ́ ko pee we lɛ.

Yosef, Maria, kɛ bimwɔyo Yesu

Anɛ o na to hyɛli ɔmɛ nɛ a ma Yesu ngɔ ɔ lo? A ngɛ a tohi a he bue nyɔ mi ngɛ nga nɔ, kɛkɛ nɛ la ko kpɛ kɛ bɔle mɛ. Bɔfo nɛ kpɛ la a nɛ! To hyɛli ɔmɛ ye gbeye wawɛɛ. Se bɔfo ɔ de mɛ ke: ‘Nyɛ ko ye gbeye! I hɛɛ sane kpakpa ko kɛ ha nyɛ. A fɔ Kristo, nɛ ji Nyɔmtsɛ ɔ mwɔnɛ ɔ ngɛ Betlehem. E ma he nimli a yi wami. Nyɛ maa na lɛ nɛ a kɛ bo blaa lɛ nɛ e hwɔɔ si ngɛ lohwehi a niye ní daka mi.’ Si kake too ɔ, bɔfohi fuu ba nɛ a ba bɔni Mawu yi jemi. Lɔɔ he ɔ, oya nɔuu nɛ to hyɛli ɔmɛ ho nɛ a ya hla Yesu, nɛ a na lɛ.

O le nɔ́ nɛ ha Yesu ngɛ slɔɔto ɔ lo? O le nɔ tutuutu nɛ e ji lo? Mo kai kaa wa kase Mawu kekle Bi ɔ he ní ngɛ kekleekle ní kasemi nɛ ngɛ womi nɛ ɔ mi ɔ mi. Bi nɛ ɔ ye bua Yehowa kɛ tsu ní nɛ e kɛ bɔ hiɔwe kɛ zugba kɛ nɔ́ tsuaa nɔ́. Lɔɔ he ɔ, nɔ nɛ Yesu ji ɔ ji nɛ ɔ nɛ!

Yehowa je e Bi ɔ wami kɛ je hiɔwe kɛ ba wo Maria mi mi. Amlɔ nɔuu kɛkɛ nɛ bimwɔyo bɔni wami ngɛ Maria mi mi kaa bɔnɛ bimwɔwi kpahi waa ngɛ a nyɛmɛ a mi mi ɔ. Se bimwɔyo nɛ ɔ lɛɛ Mawu Bi ji lɛ. Nyagbe ɔ, a fɔ Yesu ngɛ lohwehi a hwɔ he ngɛ Betlehem. Jehanɛ ɔ, o na nɔ́ nɛ ha bɔfo ɔmɛ a bua jɔ kaa a ma de nihi kaa a fɔ Yesu ɔ lo?

Luka 2:1-20.



Sane Bimihi

  • Mɛnɔ ji bimwɔyo ɔ nɛ ngɛ foni ɔ mi ɔ, nɛ jije Maria ngɔ lɛ kɛ yaa fɔ ɔ?
  • Mɛni heje nɛ a fɔ Yesu ngɛ lohwehi a hwɔ he?
  • Mɛnɔmɛ ji nyumuhi nɛ ma lohwe ɔmɛ a hwɔ he ɔ, nɛ mɛni bɔfo ko de mɛ?
  • Mɛni heje nɛ Yesu ngɛ slɔɔto ɔ?
  • Mɛni heje a tsɛɛ Yesu ke Mawu Bi ɔ?

Sane bimi kpahi

  • Kane Luka 2:1-20.

    Mɛni Kaisare Augusto pee nɛ e kɛ ha gbami nɛ kɔ Yesu fɔmi he ɔ ba mi? (Luka 2:1-4; Mika 5:2)

    Mɛni blɔ nɔ nɛ nɔ ko ma nyɛ ma ba piɛɛ “nimli nɛ a náa a he tsui” ɔ he? (Luka 2:14; Mat. 16:24; Yoh. 17:3; Níts. 3:19; Heb. 11:6)

    Ke Yuda to hyɛli he si bali ɔmɛ nya ngɛ Yi Wami Helɔ fɔmi he ɔ, lɛɛ mɛni heje e sa kaa Mawu sɔmɔli hu a bua nɛ jɔ wawɛɛ mwɔnɛ ɔ? (Luka 2:10, 11; Efe. 3:8, 9; Kpoj. 11:15; 14:6)