Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 101: A Gbe Yesu

Ní kasemi 101: A Gbe Yesu

HYƐ yiwutso ní peepee nɛ ngɛ nɔ yae ngɛ hiɛ ɔ! A ngɛ Yesu gbee. A ngɔ lɛ kɛ fɔ sɛumi tso nɔ. Nɛ a ka plɛɛko kɛ wo e dɛ mi kɛ e nane mi. Mɛni heje nɛ a pee Yesu kikɛ?

Yesu nɛ e gbo

Nɔ́ heje ji kaa ni komɛ sume Yesu sane. O le nihi nɛ a ji lo? A kpɛti nɔ kake ji hiɔwe bɔfo yayami nɛ ji Satan Abosiami. Lɛ ji nɔ nɛ sisi Adam kɛ Hawa nɛ a gbo Mawu tue ɔ nɛ. Nɛ Satan nɔuu ji nɔ nɛ ha Yesu henyɛli ɔmɛ pee yayami agbo nɛ ɔ nɛ.

Loko a ma ka Yesu ngɛ sɛumi tso ɔ nɔ po ɔ, e henyɛli ɔmɛ pee lɛ yi kpɛti wawɛ níhi. O kai benɛ a ba Getsemane abɔɔ ɔ mi nɛ a ba nu lɛ kɛ ho ɔ lo? Mɛnɔmɛ ji henyɛli nɛ ɔmɛ? Mɛ ji jami hɛ mi nyɛɛli ɔmɛ. Yoo, ha waa hyɛ nɔ́ nɛ ba ngɛ enɛ ɔ se.

Benɛ a ngɔ Yesu kɛ ho jami hɛ mi nyɛɛli ɔmɛ a ngɔ ya a, e bɔfo ɔmɛ tu fo. Ejakaa a ye gbeye, nɛ a si Yesu nɔ kake ngɛ e henyɛli ɔmɛ a dɛ mi. Se e kaseli nɛ ji Petro kɛ Yohane lɛɛ a yɛ tsitsaa. A nyɛɛ a se kɛ ho konɛ a ya hyɛ nɔ́ nɛ a maa pee Yesu.

Osɔfo ɔmɛ ngɔ Yesu kɛ ya nɔmo Ana nɛ e ye osɔfo nɔkɔtɔma be ko ɔ ngɔ. Nimli babauu ɔ ye be kpiti pɛ ngɛ hiɛ ɔ. Lɔɔ se ɔ, a ngɔ Yesu kɛ ya Kaiafa, nɛ ji osɔfo nɔkɔtɔma a ngɔ. Jami hɛ mi nyɛɛli fuu ya bua a he nya ngɛ e we ɔ mi.

A kojo Yesu ngɛ Kaiafa we ɔ mi. A ngɔ nihi kɛ ba nɛ a ba ye Yesu he lakpa odase. Nɛ jami hɛ mi nyɛɛli ɔmɛ tsuo kɛ gbi kake de ke: ‘E sa kaa a gbe Yesu.’ Lɔɔ se ɔ, a su lada kɛ pue e hɛ mi, nɛ a fiaa lɛ kɔ̃.

Benɛ ní nɛ ɔmɛ tsuo ngɛ nɔ yae ɔ, Petro ngɛ kpo ɔ nɔ ngɛ we ɔ mi. Fiɛ ngɛ yee jamɛ a nyɔ mi ɔ, lɔɔ he ɔ, ni ɔmɛ slɛ la. Nɛ benɛ a ngɛ la a hluie ɔ, mawa ko hyɛ Petro too, kɛkɛ nɛ e de ke: ‘Nyumu nɛ ɔ hu piɛɛ Yesu he.’

Petro ha heto ke: ‘Dɛbi i piɛɛ we e he.’

Nihi de si etɛ kaa Petro piɛɛ Yesu he. Se ke a de ɔ, kɛkɛ Petro de ke e be mi. Nɛ si etɛne ɔ, Yesu plɛ kɛ ya hyɛ Petro. E dɔ Petro wawɛɛ kaa e ye lakpa, lɔɔ he ɔ, e je kpo nɛ e ya fo ya.

E nɔ Soha mɔtu benɛ pu ɔ bɔni si temi ɔ, osɔfo ɔmɛ ngɔ Yesu kɛ ho a Kpe Nguaa asa a nɔ ya. Nɛ a ya susu nɔ́ nɛ a maa pee lɛ ɔ he. Lɔɔ se ɔ, a ngɔ lɛ kɛ ya Pontio Pilato, nɛ ji Yudea kpo ɔ nɔ yelɔ ɔ ngɔ.

Osɔfo ɔmɛ de Pilato ke: ‘Nyumu nɛ ɔ ji nɔmlɔ yayami. E sa kaa a gbe lɛ.’ Benɛ Pilato bi Yesu munyu se ɔ, e de ke: ‘I nɛ́ nɔ́ yayami ko ngɛ e he.’ Lɔɔ se ɔ, Pilato ha a ngɔ Yesu kɛ ho Herode Antipa ngɔ ya. Herode ji Galilea nɔ yelɔ, se Yerusalem ji he nɛ e ngɛ. Herode hu nɛ́ nɔ́ yayami ko ngɛ Yesu he, lɔɔ he ɔ, e ha a kpale Yesu kɛ ba Pilato ngɔ.

Pilato suɔ kaa e ngmɛɛ Yesu he. Se Yesu henyɛli ɔmɛ suɔ nɛ e ngmɛɛ nyumu ko nɛ a wo lɛ tsu ɔ mohu he. Nyumu nɛ ɔ ji ojo fialɔ, nɛ e biɛ ji Baraba. E su piani jehanɛ ɔ, nɛ Pilato ngɔ Yesu kɛ ba kpo ɔ nɔ. Nɛ e de ni ɔmɛ ke: ‘Ne nyɛ matsɛ ɔ!’ Se osɔfo nikɔtɔma amɛ kpa ngmlaa kɛ de ke: ‘Ngɔɔ lɛ kɛ ho! Gbee lɛ! Gbee lɛ!’ Lɔɔ he ɔ, Pilato ngmɛɛ Baraba he, nɛ e ha a ngɔ Yesu kɛ ho konɛ a ya gbe lɛ.

Soha piani mi ɔ, a ka Yesu kɛ wo sɛumi tso ɔ he. Nɛ a ka awi yeli enyɔ komɛ hu ngɛ sɛumi tso nɔ kɛ piɛɛ Yesu he ngɛ́ e hiɔ nɔ kɛ e muɔ nɔ. Se a be foni ɔ mi. Loko Yesu ma gbo ɔ, awi yeli ɔmɛ a kpɛti nɔ kake de lɛ ke: ‘Mo kai mi ke o ba o matsɛ yemi ɔ mi.’ Nɛ Yesu ha lɛ heto ke: ‘I ngɛ mo si woe kaa o kɛ mi maa hi Paradeiso.’

Anɛ pi si womi nɛ ngɛ bua jɔmi ji nɛ ɔ lo? Anɛ o le paradeiso nɛ Yesu tu he munyu ɔ lo? Sisije ɔ, jije Mawu pee Paradeiso ɔ ngɛ? E pee ngɛ zugba nɛ ɔ nɔ. Ke Yesu ye matsɛ ngɛ hiɔwe ɔ, e ma tle nyumu nɛ ɔ si kɛ ba wami mi ekohu ngɛ zugba a nɔ, nɛ e ma ná bua jɔmi ngɛ Paradeiso ehe ɔ nɛ maa ba a mi. Anɛ enɛ ɔ jɔɛ wa bua lo?

Mateo 26:57-75; 27:1-50; Luka 22:54-71; 23:1-49; Yohane 18:12-40; 19:1-30.



Sane Bimihi

  • Mɛnɔ ji nɔ tutuutu nɛ ha a gbe Yesu?
  • Mɛni bɔfo ɔmɛ pee benɛ jami hɛ mi nyɛɛli ɔmɛ nu Yesu kɛ ho ɔ?
  • Mɛni ya nɔ ngɛ osɔfo nɔkɔtɔma Kaiafa we ɔ mi?
  • Mɛni heje Petro ya fo ya a?
  • Benɛ a kpale Yesu kɛ ba Pilato ngɔ ɔ, mɛni osɔfo nikɔtɔma amɛ kpa ngmlaa kɛ de?
  • Mɛni a pee Yesu Soha piani ɔ, nɛ mɛni si womi e kɛ ha Yayami peelɔ nɛ ngɛ sɛumi tso nɔ ngɛ e kasa nya a?
  • Jije paradeiso nɛ Yesu tu he munyu ɔ maa hi?

Sane bimi kpahi

  • Kane Mateo 26:57-75.

    Mɛni blɔ nɔ nɛ Yuda kojomi he nguaa mi bi ɔmɛ tsɔɔ ngɛ kaa a hɛɛ tsui yayami? (Mat. 26:59, 67, 68)

  • Kane Mateo 27:1-50.

    Mɛni heje wa ma nyɛ ma de kaa Yuda he piami ɔ pi anɔkuale he piami? (Mat 27:3, 4; Mar. 3:29; 14:21; 2 Kor. 7:10, 11)

  • Kane Luka 22:54-71.

    Jamɛ a nyɔ mi nɛ a tsɔɔ Yesu se blɔ nɛ a nu lɛ ɔ, mɛni wa ma nyɛ maa kase kɛ je kuami nɛ Petro kua Yesu ɔ mi? (Luka 22:60-62; Mat. 26:31-35; 1 Kor. 10:12)

  • Kane Luka 23:1-49.

    Kɛ Yesu pee e ní ngɛ yayami nɛ a pee lɛ ɔ he kɛɛ, nɛ mɛni wa ma nyɛ maa kase kɛ je mi? (Luka 23:33, 34; Rom. 12:17-19; 1 Pet. 2:23)

  • Kane Yohane 18:12-40.

    Mɛni tsɔɔ kaa Petro ye adesa gbeye yemi su nɛ e ná be kpiti ko ɔ nɔ, nɛ e ba plɛ bɔfo nɛ ngɛ kã? (Yoh. 18:25-27; 1 Kor. 4:2; 1 Pet. 3:14, 15; 5:8, 9)

  • Kane Yohane 19:1-30.

    Mɛni juɛmi nɛ́ da nɛ Yesu hɛɛ ngɛ helo nya níhi a he? (Yoh. 2:1, 2, 9, 10; 19:23, 24; Mat. 6:31, 32; 8:20)

    Mɛni blɔ nɔ munyu nɛ Yesu tu ngɛ faii mi loko e gbo ɔ tsɔɔ kaa e fi Yehowa je mi tsuo nɔyemi ɔ se kɛ pi si? (Yoh. 16:33; 19:30; 2 Pet. 3:14; 1 Yoh. 5:4)