Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 100: Yesu Ngɛ́ Abɔɔ ɔ Mi

Ní kasemi 100: Yesu Ngɛ́ Abɔɔ ɔ Mi

BENƐ Yesu kɛ e bɔfo ɔmɛ je hiɔwe tsu ɔ mi ɔ, a ba Getsemane abɔɔ ɔ mi. A ba hiɛ ɔ hluu. Yesu de mɛ ke a hwɔɔ nɛ́ a sɔle. Kɛkɛ nɛ e je a he kɛ ya hɛ mi bɔɔ, nɛ e ngɔ e hɛ mi kɛ bu si nɛ e sɔle.

Pee se ɔ, Yesu kpale kɛ ba e kaseli ɔmɛ a ngɔ. Mɛni o susu kaa a ngɛ pee? A hwɔ mahe pɔ̃pɔɔpɔ! Yesu de mɛ si etɛ kaa a hwɔɔ, se ke e kpale kɛ ba a, kɛkɛ e ba na mɛ nɛ a ngɛ mahe hwɔe. Benɛ Yesu kpale kɛ ba a ngɔ nyagbe ɔ, e de mɛ ke: ‘Mɛni heje nyɛ ngɛ mahe hwɔe be nɛ ɔ mi? Ngmlɛfia a su nɛ a maa ngɔ mi kɛ wo ye henyɛli a dɛ.’

Jamɛ a be ɔ mi nɔuu kɛkɛ nɛ a nu nɛ nimli babauu ngɛ ngmlaa kpae kɛ ma. Hyɛ! Ni ɔmɛ ma kɛ klaatehi kɛ tso kpotihi! Nɛ a hɛɛ kanehi. Benɛ a su Yesu kɛ e bɔfo ɔmɛ a he ɔ, nɔ ko nyɛɛ tɛ̃ɛ kɛ je ni ɔmɛ a kpɛti kɛ ba Yesu ngɔ. Nɛ e ba fĩɔ e nya he, kaa bɔnɛ o na ngɛ foni ɔ mi ɔ. Nyumu nɛ ɔ ji Yuda Iskariot! Mɛni heje nɛ e fiɔ̃ Yesu nya he ɔ?

Yuda nɛ ngɛ Yesu se blɔ tsɔɔe

Yesu bi lɛ ke: ‘Yuda, o ngɔ nya he fiɔ̃mi kɛ ngɛ ye se blɔ tsɔɔe lo?’ Ee, e nya he fĩɔmi ɔ ji okadi. Lɔɔ ha nɛ ni ɔmɛ nɛ kɛ Yuda ba a na kaa lɛ ji Yesu, nɔ nɛ a ngɛ hlae ɔ. Lɔɔ he ɔ, Yesu henyɛli ɔmɛ su e he nɛ a nu lɛ. Se Petro kplɛɛ we kaa a ngɔ Yesu kɛ ho jã kɛkɛ. E hia klaate nɛ e hɛɛ ɔ, nɛ e kɛ ja nyumu nɛ ngɛ e kasa nya a. Klaate ɔ ná we nyumu ɔ yi, se e ya po e hiɔ tue. Se Yesu ta nyumu ɔ tue ɔ he nɛ e tsa lɛ.

Yesu de Petro ke: ‘Kpale o klaate ɔ kɛ to e to he. Anɛ o li kaa ma nyɛ ma bi ye tsɛ nɛ e ha mi bɔfohi akpehi abɔ nɛ a ba kpɔ mi lo?’ Ee, e ma nyɛ maa pee! Se Yesu bi we Mawu nɛ e tsɔ bɔfohi kɛ ba kpɔ lɛ, ejakaa e le kaa be su nɛ e henyɛli ɔmɛ maa nu lɛ kɛ ho. Lɔɔ he ɔ, e ngmɛ blɔ nɛ a ngɔ lɛ kɛ ho. Ha nɛ waa hyɛ nɔ́ nɛ ba Yesu nɔ.

Mateo 26:36-56; Luka 22:39-53; Yohane 18:1-12.



Sane Bimihi

  • Jije Yesu kɛ e bɔfo ɔmɛ ho benɛ a je hiɔwe tsu ɔ mi ɔ, nɛ mɛni e de mɛ ke a pee?
  • Mɛni Yesu na benɛ e kpale kɛ ba he nɛ e bɔfo ɔmɛ ngɛ ɔ, nɛ si enyɛmɛ enɛ ɔ ya nɔ?
  • Kaa bɔnɛ o na ngɛ foni ɔ mi ɔ, mɛnɔmɛ ba abɔɔ ɔ mi, nɛ mɛni Yuda Iskariot pee?
  • Mɛni heje Yuda fiɔ Yesu nya he, nɛ mɛni Petro pee?
  • Mɛni Yesu de Petro, nɛ mɛni ha Yesu bi we Mawu konɛ e tsɔ bɔfohi kɛ ba e ngɔ?

Sane bimi kpahi

  • Kane Mateo 26:36-56.

    Mɛni blɔ nɔ bɔnɛ Yesu plɛ kɛ wo e kaseli ɔmɛ ga a ji nɔhyɛ nɔ́ kpakpa kɛ ha Kristofoli nikɔtɔmahi mwɔnɛ ɔ? (Mat. 20:25-28; 26:40, 41; Gal. 5:17; Efe. 4:29, 31, 32)

    Mɛni ji Yesu juɛmi ngɛ ta hwumi ní nitsɛ nɛ nɔ ko kɛ ma tua e nyɛmi ɔ he? (Mat. 26:52; Luka 6:27, 28; Yoh. 18:36)

  • Kane Luka 22:39-53.

    Anɛ bɔfo nɛ ba wo Yesu he wami ngɛ Getsemane abɔɔ ɔ mi ɔ tsɔɔ kaa Yesu hemi kɛ yemi ɔ gbɔjɔ lo? Moo tsɔɔ mi. (Luka 22:41-43; Yes. 49:8; Mat. 4:10, 11; Heb. 5:7)

  • Kane Yohane 18:1-12.

    Mɛni blɔ nɔ Yesu bu e kaseli ɔmɛ a he kɛ je a henyɛli ɔmɛ a he, nɛ mɛni ji nɔ́ nɛ wa ma nyɛ kase kɛ je nɔhyɛ nɔ́ nɛ ɔ mi? (Yoh. 10:11, 12; 18:1, 6-9; Heb. 13:6; Yak. 2:25)