Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 80: Mawu Webi Je Babilon

Ní kasemi 80: Mawu Webi Je Babilon

MAA pee jeha enyɔ ji nɛ ɔ, nɛ́ Mediabi kɛ Persiabi ba ngɔ Babilon ma a. Nɛ amlɔ nɛ ɔ, hyɛ nɔ́ nɛ ngɛ nɔ yae! Israelbi ɔmɛ ngɛ Babilon jee. Mɛni ha a ye a he? Nɛ mɛnɔ ha mɛ blɔ kaa a ho?

Koresh, nɛ ji Persia matsɛ ɔ nɛ ha mɛ blɔ. Blema lokoo benɛ a fɔ we Koresh lolo ɔ, Yehowa ha e gbalɔ Yesaya ngma ngɛ e he ke: ‘O maa pee bɔnɛ i suɔ ɔ pɛpɛɛpɛ. Agbo ɔmɛ ma bli kɛ fɔ si ha mo nɛ o ma ya ngɔ ma a.’ Nɛ niinɛ hu ɔ, Koresh nyɛɛ hɛ mi nɛ a kɛ ya ngɔ Babilon ma a. Mediabi kɛ Persiabi ɔmɛ gu agbohi nɛ a bli kɛ fɔ si ɔmɛ a mi nyɔ mi kɛ sɛ ma a mi.

Se Yehowa gbalɔ Yesaya de hu kaa Koresh ma fã kaa a ya po Yerusalem ma a, konɛ a ma sɔlemi we ɔ ekohu. Anɛ Koresh ha fãmi nɛ ɔ lo? Ee, e pee ja. Nɔ́ nɛ Koresh de Israelbi ɔmɛ ji nɛ ɔ nɛ: ‘Nyɛɛ ya Yerusalem amlɔ, nɛ nyɛ ya ma Yehowa nyɛ Mawu ɔ sɔlemi we ɔ.’ Enɛ ɔ ji nɔ́ nɛ Israelbi ɔmɛ yaa konɛ a ya pee ɔ nɛ.

Israelbi nɛ a ngɛ Babilon jee

Se Israelbi ɔmɛ tsuo be nyɛe maa hia blɔ gagaaga nɛ ɔ kɛ kpale kɛ ya Yerusalem. Ejakaa, blɔ ɔ kɛ, nɛ nihi fuu bwɔ, nɛ ni komɛ hu be he wami bɔnɛ a ma nyɛ maa hia blɔ nɛ e kɛmi maa su si tomi 500 (kilomita 800). Ni komɛ hu be nyɛe maa ya ngɛ ní kpa komɛ a heje. Lɔɔ he ɔ, Koresh de nihi nɛ be nyɛe maa ya a ke: ‘Nyɛ ha nihi nɛ maa ya amɛ sika tsu kɛ sika hiɔ, kɛ nike ní kpahi konɛ a kɛ ya po Yerusalem ma a, nɛ a ma sɔlemi we ɔ.’

Lɔɔ he ɔ, Israelbi ɔmɛ nɛ kpale kɛ yaa Yerusalem ɔ ná nike ní fuu. Jehanɛ se ɔ, Koresh ngɔ kãhi kɛ kpluhi nɛ́ Matsɛ Nebukadnezar ya muɔɔ kɛ je Yehowa sɔlemi we ɔ benɛ e ya kpata Yerusalem hɛ mi ɔ hu kɛ ha mɛ. Israelbi ɔmɛ ná níhi fuu nɛ a maa ngɔ kɛ ho a ma mi ya.

Benɛ Israelbi ɔmɛ hia blɔ maa pee nyɔhiɔ eywiɛ se ɔ, a ya su Yerusalem. Jeha 70 pɛpɛɛpɛ ji nɛ ɔ nɛ́ a kpata ma a hɛ mi, nɛ zugba a fɔ si gu nɛ́ nɔ ko nɔ ko hí nɔ. E ngɛ mi kaa Israelbi ɔmɛ kpale kɛ ya su mɛ nitsɛmɛ a ma mi mohu, se a kɛ haomihi maa kpe, kaa bɔnɛ wa maa na ngɛ ní kasemi nɛ nyɛɛ se ɔ mi ɔ.

Yesaya 44:28; 45:1-4; Ezra 1:1-11.



Sane Bimihi

  • Kaa bɔnɛ e ngɛ foni ɔ mi ɔ, mɛni Israelbi ɔmɛ ngɛ pee?
  • Mɛni blɔ nɔ Koresh ha Yehowa gbami nɛ e kɛ gu Yesaya nɔ ɔ ba mi ngɛ?
  • Mɛni Koresh de Israelbi nɛ a be nyɛe maa kpale kɛ ya Yerusalem ɔ?
  • Mɛni Koresh kɛ ha ni ɔmɛ konɛ a kɛ kpale kɛ ya Yerusalem?
  • Be enyɛmɛ Israelbi ɔmɛ kɛ hia blɔ kɛ kpale ya su Yerusalem?
  • Jeha enyɛmɛ ba be nɛ zugba a fɔ si gu nɛ nɔ ko nɔ ko hí nɔ?

Sane bimi kpahi

  • Kane Yesaya 44:28 kɛ 45:1-4.

    Mɛni blɔ nɔ Yehowa ma nɔ mi ngɛ kaa gbami nɛ kɔ Koresh he ɔ maa ba mi kokooko? (Yes. 55:10, 11; Rom. 4:17)

    Mɛni blɔ nɔ Yesaya gbami nɛ kɔ Koresh he ɔ, tsɔɔ bɔnɛ Yehowa ngɛ he wami nɛ e kɛ tsɔɔ nɔ́ nɛ maa ba hwɔɔ se ha? (Yes. 42:9; 45:21; 46:10, 11; 2 Pet. 1:20)

  • Kane Ezra 1:1-11.

    Mɛni blɔ nɔ wa ma nyɛ maa ‘wo’ nihi nɛ ngɔ a be tsuo kɛ ngɛ sɔmɔe ɔ ‘dɛ mi’ kaa bɔnɛ nihi nɛ nyɛ we nɛ a kpale kɛ ya Yerusalem pee ɔ? (Ezra 1:4, 6; Rom. 12:13; Kol. 4:12)