Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 79: Daniel Ngɛ́ Jatahi A Muɔ Mi

Ní kasemi 79: Daniel Ngɛ́ Jatahi A Muɔ Mi

AO, AO! E pee kaa Daniel sɛ haomi nguaa ko mi. Se jata amɛ pee we lɛ nɔ́ ko! O le nɔ́ heje lo? Mɛnɔ ngɔ Daniel kɛ wo jata amɛ a kpɛti? Ha nɛ waa hyɛ.

Matsɛ nɛ́ ngɛ Babilon nɔ yee amlɔ nɛ ɔ ji Dario. E suɔ Daniel sane saminya, ejakaa Daniel ji nɔmlɔ kpakpa, nɛ e le ní hulɔ. Dario pee Daniel nɔ yelɔ nguaa ngɛ e matsɛ yemi ɔ mi. Enɛ ɔ ha ni kpa amɛ ngɛ matsɛ yemi ɔ mi ɔ, je e he hunga, nɛ nɔ́ nɛ a pee ji nɛ ɔ nɛ.

Dario

A ya Dario ngɔ nɛ a ya de lɛ ke: ‘Matsɛ, wɔ tsuo wa ba gbi kpami kaa, o wo mlaa kaa nɔ ko nɔ ko nɛ ko sɔle ha mawu ko aloo nɔ kpa ko, pe mo pɛ ligbi nyingmi 30. Nɛ ke nɔ ko gbo tue ɔ, á sake lɛ ngɔ fɔ jata amɛ a muɔ mi.’ Dario li nɔ́ nɛ ha ni ɔmɛ ngɛ hlae kaa e wo mlaa nɛ ɔ. Se e susu kaa juɛmi kpakpa kpo lɛ a ba je, lɔɔ he ɔ, e ha a ngma mlaa a. Jehanɛ ɔ lɛɛ a be nyɛe ma tsake mlaa a hu.

Benɛ Daniel nu kaa a wo mlaa a, e ho we mi ya, nɛ e ya sɔle kaa bɔnɛ e peeɔ daa a. Nimli yayami ɔmɛ le kaa Daniel be sɔlemi nɛ e sɔleɔ kɛ haa Yehowa daa a kpae. A bua jɔ ejakaa e pee kaa nɔ́ nɛ a ga nɛ a tsɔ̃ konɛ a kɛ gbe Daniel ɔ ngɛ ní tsue ha mɛ.

Benɛ Matsɛ Dario ba ná le yi mi tomi heje nɛ nimli nɛ ɔmɛ ha nɛ e wo mlaa a, e dɔ lɛ wawɛɛ. Se e be nyɛe ma tsake mlaa a hulɔ, heje ɔ, e fã kaa a ya sake Daniel kɛ wo jata amɛ a muɔ mi. Se matsɛ ɔ de Daniel ke: ‘I heɔ yeɔ kaa o Mawu ɔ nɛ o sɔmɔɔ lɛ ɔ, ma kpɔ mo.’

Dario hao wawɛɛ, heje ɔ, e nyɛ we nɛ e hwɔ mahe jamɛ a nyɔ ɔ mi tsuo. E nɔ jena a, e sá e he kɛ ya jata amɛ a muɔ ɔ nya, kaa bɔnɛ o na ngɛ foni ɔ mi ɔ. Nɛ e kpa ngmlaa kɛ de ke: ‘Daniel, Mawu hɛ kalɔ ɔ sɔmɔlɔ! Anɛ o Mawu ɔ nɛ o sɔmɔɔ lɛ ɔ kpɔ mo kɛ je jata amɛ a dɛ mi lo?’

Daniel ngɛ́ jatahi a muɔ mi

Daniel he nɔ ke: ‘Mawu tsɔ e bɔfo nɛ e ba ma jata amɛ a nya nɛ a yi mi awi.’

Matsɛ ɔ bua jɔ saminya. E fã kaa a ya je Daniel kɛ je muɔ ɔ mi. Kɛkɛ nɛ e ha nɛ a ya nuu nimli yayami ɔmɛ nɛ ka Daniel gbemi ɔ, nɛ a sake mɛ ngɔ ha jata amɛ ngɛ muɔ ɔ mi. A nɔɛ muɔ ɔ mi tete nɛ jata amɛ gblɔ mɛ nɛ a ywia a wuhi tsuo.

Kɛkɛ nɛ Matsɛ Dario ngma womi kɛ ya ha nihi tsuo nɛ ngɛ e matsɛ yemi ɔ mi ke: ‘I fã kaa nɔ tsuaa nɔ nɛ́ bu Daniel Mawu ɔ. Ejakaa e peeɔ nyakpɛ ní nguahi. E kpɔ Daniel kɛ je jata amɛ a dɛ mi.’

Daniel 6:1-28.



Sane Bimihi

  • Mɛnɔ ji Dario, nɛ mɛni ji e juɛmi ngɛ Daniel he?
  • Mɛni nyumuhi komɛ nɛ je Daniel he hunga a ha Dario pee?
  • Mɛni Daniel pee benɛ e nu kaa a wo mlaa ehe ɔ?
  • Mɛni ha Dario hao wawɛɛ nɛ e nyɛ we nɛ e hwɔ mahe ɔ, nɛ mɛni e pee e nɔ jena?
  • Mɛni heto Daniel kɛ ha Dario?
  • Mɛni a pee nihi nɛ ka Daniel gbemi ɔ, nɛ mɛni Dario ngma kɛ ya ha nihi tsuo nɛ ngɛ e matsɛ yemi ɔ mi?

Sane bimi kpahi

  • Kane Daniel 6:1-28.

    Mɛni blɔ nɔ bɔnɛ a so Daniel yi nɔ ɔ kaiɔ wɔ nɔ́ nɛ henyɛli pee konɛ a kɛ tsi Yehowa Odasefoli a nítsumi ɔ nya mwɔnɛ ɔ? (Dan. 6:7; La 94:20; Yes. 10:1; Rom. 8:31)

    Mɛni blɔ nɔ Mawu sɔmɔli nɛ ngɛ mwɔnɛ ɔ ma nyɛ maa kase Daniel ngɛ he si bami nɛ a maa pee kɛ ha “ma nɔ yeli” ɔ mi? (Dan. 6:5, 10; Rom. 13:1; Níts. 5:29)

    Mɛni blɔ nɔ wa ma nyɛ maa kase Daniel ngɛ bɔnɛ e sɔmɔ Yehowa “daa” a he? (Dan. 6:16, 20; Fil. 3:16; Kpoj. 7:15)