Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 73: Israel Nyagbe Matsɛ Kpakpa

Ní kasemi 73: Israel Nyagbe Matsɛ Kpakpa

YOSIA ye jeha kpaanyɔ pɛ nɛ a wo lɛ matsɛ ngɛ Israel woyi je wɛtso enyɔ ɔ nya. E wɛ kulaa kɛ ha matsɛ yemi. Lɔɔ he ɔ, sisije ɔ nikɔtɔmahi komɛ ye bua lɛ kɛ ye ma a nɔ.

Benɛ Yosia ye matsɛ jeha kpaago ɔ, e bɔni Yehowa se blɔ hlami. E nyɛɛ matsɛmɛ kpakpahi kaa David, Yehoshafat, kɛ Hezekia nɔhyɛ nɔ́ ɔ se. Nɛ benɛ e yi jeha nyingmi enyɔ lolo po ɔ, e pee nɔ́ ko nɛ́ biɔ kã peemi.

Matsɛ Yosia kɛ e nyumu ɔmɛ nɛ a ngɛ wɔ ɔmɛ puɛe

Israelbi ɔmɛ babauu pee ní yayamihi be kɛkɛɛ. A ja wɔhi. Nɛ a kpla si ha amagahi. Lɔɔ he ɔ, Yosia kɛ e webi ɔmɛ sɛ ma a mi nɛ a ya puɛ lakpa jami he ní ɔmɛ tsuo. Nítsumi nɛ ɔ he wa nitsɛ ejakaa wɔ jali ɔmɛ hiɛ. Hyɛ Yosia kɛ e webi ɔmɛ ngɛ foni ɔ mi nɛ a ngɛ amaga amɛ kue pue si.

Pee se ɔ, Yosia hla nyumuhi etɛ konɛ a hyɛ nɛ a dla Yehowa sɔlemi we ɔ. Mabi ɔmɛ tsu sika kɛ ha mɛ konɛ a kɛ wo nítsumi ɔ he hiɔ. Ligbi ko nɛ́ a ngɛ ní ɔ tsue ngɛ sɔlemi we ɔ, Osɔfo nɔkɔtɔma Hilkia na nɔ́ ko nɛ he hia wawɛɛ. Lɔɔ ji mlaa womi nɛ́ Yehowa ha Mose ngma fɔ si blema lokoo ɔ. E laa jeha babauu.

A ngɔ womi ɔ ya ha Yosia, nɛ e ha a kane ha lɛ. Benɛ Yosia ngɛ womi ɔ kanemi ɔ tue bue ɔ, e na kaa mabi ɔmɛ yi Yehowa mlaa nɔ kulaa. E dɔ lɛ wawɛɛ, nɛ enɛ ɔ ha e gba e tade ngɛ e he, kaa bɔnɛ o na ngɛ foni ɔ mi ɔ. E de ke: ‘Yehowa mi mi fu wɔ, ejakaa wa tsɛmɛ ɔmɛ yi mlaa nɛ́ a ngma ngɛ womi nɛ ɔ mi ɔ nɔ.’

Shafan kɛ Matsɛ Yosia

Enɛ ɔ he ɔ, Yosia fã osɔfo nɔkɔtɔma Hilkia kaa e ya bi nɔ́ nɛ Yehowa maa pee mɛ. Hilkia ya gbalɔyo Hulda ngɔ, nɛ e ya bi lɛ nɔ́ nɛ maa ba. Sɛgbi nɛ je Yehowa ngɔ nɛ gbalɔyo ɔ kɛ ha Hilkia kaa e ya de Yosia ji: ‘A maa gbla Yerusalem kɛ mabi ɔmɛ tsuo tue, ejakaa a ja wɔhi nɛ a ha ma a mi hyi tɔ kɛ yayami peemi. Se mo Yosia, akɛnɛ o pee nɔ́ nɛ da heje ɔ, tue gblami nɛ ɔ maa ba ngɛ o gbenɔ se.’

2 Kronika 34:1-28.



Sane Bimihi

  • Jeha enyɛmɛ Yosia ye nɛ a wo lɛ matsɛ, nɛ mɛni e bɔni peemi benɛ e ye tsɛ jeha kpaago ɔ?
  • Mɛni o na kaa Yosia ngɛ pee ngɛ kekle foni ɔ mi?
  • Benɛ a ngɛ sɔlemi we ɔ dlae ɔ, mɛni osɔfo nɔkɔtɔma a ya na?
  • Mɛni heje Yosia gba e tade ɔ?
  • Mɛni sɛgbi nɛ́ je Yehowa ngɔ lɛ gbalɔyo Hulda kɛ ha Yosia?

Sane bimi kpahi

  • Kane 2 Kronika 34:1-28.

    Mɛni nɔhyɛ nɔ́ Yosia pee kɛ ha nihi nɛ a kɛ si himi nɛ mi wa kpe ngɛ a jokuɛwi a si ɔ? (2 Kron. 33:21-25; 34:1, 2; La 27:10)

    Mɛni ní peepee ko nɛ he hia saminya Yosia pee kɛ fĩ anɔkuale jami se ngɛ e nɔyemi ɔ we jeha 8, 12, kɛ 18 nɔ? (2 Kron. 34:3, 8)

    Mɛni wa ma nyɛ maa kase ngɛ bɔnɛ e sa kaa waa hɛɛ wa jami he ɔmɛ ha ngɛ Matsɛ Yosia kɛ Osɔfo Nɔkɔtɔma Hilkia nɔhyɛ nɔ́ ɔ mi? (2 Kron. 34:9-13; Abɛ 11:14; 1 Kor. 10:31)