Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 68: Nyumuwi Enyɔ nɛ Ba Wami Mi Ekohu

Ní kasemi 68: Nyumuwi Enyɔ nɛ Ba Wami Mi Ekohu

KE O gbo nɛ a kpale ngɔ mo kɛ ba wami mi ekohu ɔ, kɛ o yayo maa pee kɛɛ? E bua maa jɔ wawɛɛ! Se anɛ nɔ ko nɛ e gbo ma nyɛ maa ba wami mi ekohu lo? Eko ba ja hyɛ lo?

Hyɛ nyumu ɔ, kɛ yo ɔ, kɛ jokuɛ nyumuyo ɔ ngɛ foni ɔ mi. Nyumu ɔ ji gbalɔ Eliya. Nɛ yo ɔ ji yalɔyo ko nɛ ngɛ Zarefat ma a mi, nɛ e bi ji jokuɛ nyumuyo ɔ. Ligbi ko ɔ, jokuɛ ɔ nu hiɔ wawɛɛ. E hiɔ ɔ mi ba wa nɛ nyagbe ɔ, e gbo. Kɛkɛ nɛ Eliya de yo ɔ ke: ‘Ngɔɔ jokuɛ ɔ kɛ ha mi.’

Eliya kɛ yalɔyo ko kɛ yalɔyo ɔ binyumuyo ɔ nɛ a tle lɛ si

Eliya ngɔ jokuɛ ɔ kɛ ho hiɔwe tsu ɔ mi ya, nɛ e kɛ lɛ ya fɔ sa nɔ. Kɛkɛ nɛ e sɔle ke: ‘Oo Yehowa, ha jokuɛ ɔ nɛ ba wami mi ekohu.’ Amlɔ nɔuu ɔ, jokuɛ ɔ bɔni mumu womi! Kɛkɛ nɛ Eliya ngɔ jokuɛ ɔ kɛ kple si ya ha e nyɛ ɔ, nɛ e de lɛ ke: ‘Hyɛ, o bi ɔ ba wami mi ekohu!’ Enɛ ɔ heje nɛ jokuɛ ɔ nyɛ ɔ bua jɔ wawɛɛ ɔ nɛ.

A tsɛɛ Yehowa gbalɔ ngua kpa ko hu ke Elisha. E sɔmɔ Eliya. Se pee se ɔ, Yehowa gu e nɔ kɛ pee nyakpɛ níhi fuu. Ligbi ko ɔ, Elisha ya Shunem ma a mi, nɛ yo ko pee lɛ kpakpa. Pee se ɔ, yo ɔ ba fɔ binyumuyo.

Benɛ jokuɛ ɔ wa saii ɔ, e kɛ e tsɛ ho ngmɔ mi ya ligbi ko mɔtu. Si kake too ɔ, jokuɛ ɔ hia ngmlaa ke: ‘Ye yi ngɛ mi yee!’ Benɛ a ngɔ jokuɛ ɔ kɛ ya su we ɔ mi ɔ, e gbo. E nyɛ ye aywilɛho! Amlɔ nɔuu nɛ e ho ya tsɛ Elisha.

Benɛ Elisha ba a, e ho he nɛ a ngɔ jokuɛ ɔ kɛ fɔ ɔ ya. E sɔle ha Yehowa, nɛ e ya bu jokuɛ ɔ nɔ. Amlɔ nɔuu ɔ, jokuɛ ɔ he dɔ la, kɛkɛ nɛ e tsile si kpaago. E nyɛ ɔ bua jɔ nitsɛ kaa e bi ɔ ba wami mi ekohu!

Nihi babauu gbo. Nɛ enɛ ɔ wo a wekuli kɛ a huɛmɛ aywilɛho. Wa be he wami nɛ waa kɛ maa tsiɛ gbogboehi. Se Yehowa lɛɛ e ngɛ he wami nɛ e ma kɛ pee ja. Pee se ɔ, wa maa kase bɔnɛ Yehowa maa pee ha kɛ ngɔ nihi ayɔhi abɔ nɛ gbo ɔ kɛ ba wami mi ekohu.

1 Matsɛmɛ 17:8-24; 2 Matsɛmɛ 4:8-37.


Sane Bimihi

  • Mɛnɔmɛ ji nimli etɛ nɛ a ngɛ foni ɔ mi ɔ, nɛ mɛni pee jokuɛ nyumuyo ɔ?
  • Mɛni sɔlemi Eliya sɔle ngɛ jokuɛ nyumuyo ɔ he, nɛ mɛni je mi kɛ ba?
  • Kɛ a tsɛɛ Eliya sɔmɔlɔ ɔ kɛɛ?
  • Mɛni heje a ya tsɛ Elisha kɛ ya Shunem yo ɔ we ɔ mi ɔ?
  • Mɛni Elisha pee, nɛ mɛni ba jokuɛ ɔ nɛ e gbo ɔ nɔ?
  • Mɛni he wami Yehowa ngɛ kaa bɔnɛ wa na kɛ gu Eliya kɛ Elisha nɔ ɔ?

Sane bimi kpahi

  • Kane 1 Matsɛmɛ 17:8-24.

    Mɛni blɔ nɔ a ka Eliya tue bumi kɛ e hemi kɛ yemi ngɛ? (1 Ma. 17:9; 19:1-4, 10)

    Mɛni ha Zarefat ahoyo ɔ hemi kɛ yemi ɔ ji nɔ́ nɛ ngɛ slɔɔto ɔ? (1 Ma. 17:12-16; Luka 4:25, 26)

    Mɛni blɔ nɔ níhi nɛ ya nɔ ngɛ Zarefat ahoyo ɔ blɔ fa mi ɔ tsɔɔ kaa Yesu munyu nɛ ngɛ Mateo 10:41, 42 ji anɔkuale? (1 Ma. 17:10-12, 17, 23, 24)

  • Kane 2 Matsɛmɛ 4:8-37.

    Mɛni wa kaseɔ ngɛ Shunem yo ɔ he ngɛ nubwɔ peemi he? (2 Ma. 4:8; Luka 6:38; Rom. 12:13; 1 Yoh. 3:17)

    Mɛni blɔhi a nɔ wa ma nyɛ maa pee Mawu tsɔli kpakpa mwɔnɛ ɔ? (Níts. 20:35; 28:1, 2; Gal. 6:9, 10; Heb. 6:10)