Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 67: Yehoshafat Ngɔ E He kɛ Fɔ Yehowa Nɔ

Ní kasemi 67: Yehoshafat Ngɔ E He kɛ Fɔ Yehowa Nɔ

ANƐ o le nimli nɛ nyumuhi nɛ ɔmɛ ji, nɛ o le nɔ́ nɛ a ngɛ pee ɔ lo? A yaa hwu ta, nɛ nihi nɛ nyɛɛ hɛ mi ɔ ngɛ lae. Se eko ɔ, o ma bi ke: ‘Mɛni heje lali ɔmɛ hɛɛ we klaate kɛ akplɔ nɛ a ma kɛ hwu ta a?’ Ha nɛ waa hyɛ.

Israelbi ɔmɛ nɛ a ngɛ sala bɔe kɛ yaa ta

Yehoshafat ji Israel wɛtso enyɔ ɔ matsɛ. E kɛ Matsɛ Ahab nɛ ji yiti je wɛtso 10 matsɛ kɛ e yo Yezebel hi si ngɛ be kake mi. Yehoshafat ji matsɛ kpakpa kaa e tsɛ Asa. Lɔɔ heje ɔ, woyi je wɛtso enyɔ matsɛ yemi sisi bi ɔmɛ hi si ngɛ tue mi jɔmi mi jehahi babauu.

Se amlɔ nɛ ɔ, nɔ́ ko ba nɛ́ ha mabi ɔmɛ ye gbeye. Tsɔli ba bɔ Yehoshafat amaniɛ ke: ‘Tabuli babauu je Moab, Amon kɛ Seir Yoku ɔ nɔ kɛ ma mo tuami.’ Israelbi ɔmɛ fuu ya bua a he nya ngɛ Yerusalem konɛ a bi Yehowa dɛ mi yemi kɛ buami. A ya sɔlemi we ɔ, nɛ Yehoshafat sɔle ke: ‘Oo Yehowa wa Mawu, wa li bɔnɛ wa maa pee ha. Wa be nyɛe maa da ta nɛ ɔ nya. Wa ngɛ mo blɔ hyɛe nɛ o ye bua wɔ.’

Yehowa bu Yehoshafat sɔlemi ɔ tue, nɛ e ha e gbalɔ de mabi ɔmɛ ke: ‘Ta a pi nyɛ nɔ́, se Mawu nɔ́. E hia we nɛ nyɛɛ hwu ta. Nyɛɛ lɛɛ nyɛɛ mlɛ, nɛ́ nyɛɛ hyɛ bɔnɛ Yehowa ma he nyɛ yi wami ha.’

E nɔ jena a, Yehoshafat de mabi ɔmɛ ke: ‘Nyɛɛ ngɔ nyɛ he kɛ fɔ Yehowa nɔ!’ Kɛkɛ nɛ e ha lali la Yehowa yi jemi lahi kɛ nyɛɛ tabuli ɔmɛ a hlami. Anɛ o le nɔ́ nɛ ba benɛ e piɛ bɔɔ nɛ a maa su ta nga a nɔ lo? Yehowa ha nɛ henyɛli ɔmɛ kɛ mɛ nitsɛmɛ a he nɔ kunɔ. Nɛ benɛ Israelbi ɔmɛ ya su lejɛ ɔ, a na kaa tabuli ɔmɛ tsuo gbo kɛ pue si!

Anɛ e pi nile blɔ kaa Yehoshafat ngɔ e he kɛ fɔ Yehowa nɔ lo? Wɔ hu wa maa pee ní leli ke wa ngɔ wa he kɛ fɔ Yehowa nɔ.

1 Matsɛmɛ 22:41-53; 2 Kronika 20:1-30.


Sane Bimihi

  • Mɛnɔ ji Yehoshafat, nɛ mɛni be mi e hi si?
  • Mɛni heje Israelbi ɔmɛ ye gbeye, nɛ mɛni a kpɛti nihi fuu pee?
  • Mɛni heto Yehowa kɛ ha Yehoshafat ngɛ e sɔlemi ɔ he?
  • Mɛni Yehowa ha e ba loko ta hwumi be ɔ su?
  • Mɛni wa ma nyɛ maa kase ngɛ Yehoshafat he?

Sane bimi kpahi

  • Kane 2 Kronika 20:1-30.

    Mɛni Yehoshafat pee kɛ tsɔɔ bɔnɛ e sa kaa Mawu tsɔli anɔkuafohi peeɔ a ní ha ke a kɛ he gbeye womi ko kpe? (2 Kron. 20:12; La 25:15; 62:1)

    Yehowa ngɛ blɔ nɛ e guu nɔ nɛ e kɛ e webi tuɔ munyu, lɔɔ he ɔ, mɛni ji kikɛmɛ a blɔ nɛ ɔ mwɔnɛ ɔ? (2 Kron. 20:14, 15; Mat. 24:45-47; Yoh. 15:15)

    Ke “Mawu Ope ɔ ligbi nguaa nɔ ta” a je sisi ɔ, mɛni blɔ nɔ wa si himi ɔ maa pee kaa Yehoshafat nɔ́ ɔ? (2 Kron. 20:15, 17; 32:8; Kpoj. 16:14, 16)

    Mɛni blɔ gbali kɛ ma se sane kpakpa fiɛɛli ngɛ pee mwɔnɛ ɔ kɛ ngɛ je kɛ wɛ fiɛɛmi nítsumi ɔ se fie nɛ́ tsɔɔ kaa a ngɛ Levibi ɔmɛ kasee? (2 Kron. 20:19, 21; Rom. 10:13-15; 2 Tim. 4:2)