Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 63: Matsɛ Salomo Ní Lelɔ

Ní kasemi 63: Matsɛ Salomo Ní Lelɔ

SALOMO bɔni matsɛ yemi benɛ e ji niheyo wayoo. E suɔ Yehowa, nɛ e bu ga womi kpakpa nɛ e tsɛ David kɛ ha lɛ ɔ tue. Yehowa bua jɔ Salomo he, lɔɔ he ɔ, ligbi ko nyɔ mi ɔ, e bi Salomo ngɛ nlami mi ke: ‘Salomo, mɛni o suɔ nɛ ma pee ha mo?’

Salomo ha heto ke: ‘Yehowa ye Mawu, niheyo wayoo ji mi, nɛ i li bɔnɛ a yeɔ ma nɔ ha. Lɔɔ he ɔ, ha mi níle nɛ ma kɛ ye o ma a nɔ ngɛ blɔ nɛ da nɔ.’

Yehowa bua jɔ nɔ́ nɛ Salomo bi ɔ he. Lɔɔ he ɔ, Yehowa de Salomo ke: ‘Akɛnɛ o bi nile se pi wami se kɛmi loo ní nami heje ɔ, ma ha mo nile pe nɔ tsuaa nɔ nɛ́ hi si hyɛ. Se ma ha mo nɔ́ nɛ o bi we nɛ ji ní nami kɛ anunyami hulɔ.’

E yi be ko nɛ yihi enyɔ ngɔ sane ko nɛ mi wa kɛ ba fɔ Salomo hɛ mi. Yo nɛ sɛ hlami ɔ de ke: ‘I kɛ yo nɛ ɔ ngɛ we kake mi. I fɔ binyumu, nɛ ligbi enyɔ se ɔ, lɛ hu e fɔ binyumu. Se ligbi ko nyɔ mi ɔ, e bimwɔyo ɔ gbo. Nɛ benɛ i hwɔ mahe ɔ, e ngɔ e bi nɛ gbo ɔ kɛ ba tsake ye bi nɛ hɛ ngɛ ɔ. Benɛ i te si nɛ i hyɛ bimwɔyo nɛ gbo ɔ, i na kaa pi ye bi ɔ ji lɛ.’

Se yo kaketsɛ ɔ de ke: ‘Dɛbi! Bi nɛ́ hɛ ngɛ ɔ ji ye nɔ́, nɛ bi gbogboe ɔ ji e nɔ́!’ Yo nɛ sɛ hlami ɔ de ke: ‘O bua! Bi gbogboe ɔ ji o nɔ́, nɛ bi nɛ hɛ ngɛ ɔ ji ye nɔ́!’ Kikɛ ji bɔnɛ yi ɔmɛ je atsinyɛ. Kɛ Salomo maa pee kɛɛ?

Salomo tsɔ nɛ a ya ngɔ klaate kɛ ba, nɛ e de ke: ‘Dlaa bimwɔyo nɛ hɛ ngɛ ɔ mi enyɔ, nɛ́ o ngɔ fã kɛ ha yo nɛ sɛ hlami ɔ, konɛ o ngɔ fã hu kɛ ha yo kaketsɛ ɔ.’

Se nɔ nɛ ji bi nɛ hɛ ngɛ ɔ nyɛ tutuutu ɔ kpa ngmlaa ke: ‘Dɛbi! I kpa mo pɛɛ, koo gbe bimwɔyo ɔ. Ngɔɔ lɛ kɛ ha yo kpa a!’ Se yo kaketsɛ ɔ de ke: ‘Koo ngɔ kɛ ha wa ti nɔ ko nɔ ko; moo dla e mi enyɔ.’

Matsɛ Salomo nɛ e ngɛ sane ko nɛ he wa nya hlae

Nyagbe ɔ, Salomo de ke: ‘Koo gbe bimwɔyo ɔ! Ngɔɔ lɛ kɛ ha yo nɛ sɛ hlami ɔ. Lɛ ji bi ɔ nyɛ tutuutu.’ Salomo yɔse enɛ ɔ ejakaa binyɛ nitsɛ ɔ suɔ bimwɔyo ɔ wawɛɛ nɛ e suɔ kaa e ngɔ lɛ kɛ ha yo kaketsɛ ɔ bɔnɛ pee nɛ a ko gbe lɛ. Benɛ mabi ɔmɛ nu bɔnɛ Salomo tsu sane ɔ he ní ha a, a bua jɔ kaa a ngɛ matsɛ ní lelɔ kaa ja.

Benɛ Salomo ngɛ matsɛ yee ɔ, Mawu jɔɔ mabi ɔmɛ nɛ e ha zugba a ba ngma, wai tso yiblii, kɛ niye ní kpahi babauu. Mabi ɔmɛ woɔ tadehi nɛ́ ngɛ fɛu nɛ a hi wehi nɛ́ ngɛ fɛu hu a mi. Ní kpakpahi fuu ngɛ kɛ ha nɔ tsuaa nɔ.

1 Matsɛmɛ 3:3-28; 4:29-34.



Sane Bimihi

  • Mɛni Yehowa bi Salomo, nɛ mɛni heto Salomo ha?
  • Mɛni Yehowa wo si kaa e ma ha Salomo akɛnɛ E bua jɔ nɔ́ nɛ Salomo bi ɔ he ɔ?
  • Mɛni sane nɛ he wa ko yihi enyɔ komɛ kɛ ba fɔ Salomo hɛ mi?
  • Kaa bɔnɛ o na ngɛ foni ɔ mi ɔ, kɛ Salomo tsu haomi ɔ he ní ha kɛɛ?
  • Kɛ si himi ɔ ngɛ kɛɛ ngɛ Salomo nɔyemi ɔ sisi, nɛ mɛni heje?

Sane bimi kpahi

  • Kane 1 Matsɛmɛ 3:3-28.

    Mɛni ji nɔ́ nɛ nyumuhi nɛ a haa mɛ nítsumi ngɛ Yehowa asafo ɔ mi mwɔnɛ ɔ ma nyɛ maa kase ngɛ Salomo munyu nɛ ngɛ 1 Matsɛmɛ 3:7 mi? (La 119:105; Abɛ 3:5, 6)

    Ke wa ma bi nɔ́ ko kɛ je Yehowa ngɔ ɔ, mɛni blɔ nɔ nɔ́ nɛ Salomo bi ɔ ji nɔ́ hyɛmi nɔ kpakpa kɛ ha wɔ? (1 Ma. 3:9, 11; Abɛ 30:8, 9; 1 Yoh. 5:14)

    Blɔ nɔ nɛ Salomo gu kɛ tsu yihi enyɔ ɔmɛ a pɛ ɔ he ní ɔ, haa wɔ mɛni he kɛ nɔ fɔmi ngɛ Salomo Nguaa, nɛ ji Yesu Kristo hwɔɔ se nɔ yemi ɔ he? (1 Ma. 3:28; Yes. 9:6, 7; 11:2-4)

  • Kane 1 Matsɛmɛ 4:29-34.

    Kɛ Yehowa ha Salomo ní bimi kaa e ha lɛ hesi bami tsui ɔ heto kɛɛ? (1 Ma. 4:29)

    Ke wa susu bɔnɛ nihi bɔ mɔde nɛ a ba bu Salomo nile ɔ tue he ɔ, mɛni su e sa kaa wa kɛ kase Mawu Munyu ɔ? (1 Ma. 4:29, 34; Yoh. 17:3; 2 Tim. 3:16)