Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 62: Haomi ngɛ David We ɔ Mi

Ní kasemi 62: Haomi ngɛ David We ɔ Mi

BENƐ David bɔni tsɛ yemi ngɛ Yerusalem ɔ, Yehowa ha e tabuli ɔmɛ ye a henyɛli ɔmɛ a nɔ kunimi ngɛ tahi fuu mi. Yehowa wo si kaa e maa ngɔ Kanaan zugba a kɛ ha Israelbi ɔmɛ. Amlɔ nɛ ɔ, ngɛ Yehowa yemi kɛ buami nya a, zugba a tsuo ba pee a nɔ.

David ji nɔ yelɔ kpakpa. E suɔ Yehowa. Lɔɔ he ɔ, benɛ e ngɔ Yerusalem se ɔ, níhi nɛ e pee kekleekle ɔ a kpɛti kake ji kaa, e ngɔ Yehowa somi daka a kɛ ba Yerusalem. Nɛ e suɔ kaa e ma sɔlemi we konɛ e ngɔ somi daka kɛ to lejɛ ɔ.

Benɛ David ba wa a, e pee yayami agbo ko. David le kaa e ji tɔmi kaa e maa ngɔ nɔ́ ko nɛ ji nɔ kpa nɔ́. Se gbɔkuɛ nya si ko, benɛ David ngɛ si slaae ngɛ e tsu ɔ yi mi ngɛ matsɛ we ɔ mi ɔ, e hyɛ zugba nɛ e na yo ko nɛ́ he ngɛ fɛu saminya. A tsɛɛ lɛ ke Batsheba, nɛ e huno ɔ ji David tabuli ɔmɛ a ti nɔ kake nɛ a tsɛɛ lɛ Uria.

David bua jɔ Batsheba he saminya, heje ɔ, e tsɔ nɛ a ya ngɔ lɛ kɛ ba matsɛ we ɔ mi. E huno ɔ ho ta ya. David kɛ Batsheba hwɔ si, nɛ pee se ɔ, Batsheba na kaa e ngɔ hɔ. David hao wawɛɛ nɛ e tsɔ kɛ ya de e tatsɛ nɔkɔtɔma Yoab kaa e ngɔ Uria kɛ da ta a nya ngɛ he nɛ a maa gbe lɛ. Benɛ Uria gbo ɔ, David ngɔ Batsheba kɛ pee e yo.

Yehowa mi mi fu David wawɛɛ. Lɔɔ he ɔ, e tsɔ gbalɔ Natan nɛ e ya de David ní yayamihi nɛ e pee ɔ. Natan ji nɔ nɛ ngɛ munyu tue kɛ ngɛ David tsɔɔe ngɛ foni ɔ mi ɔ nɛ. David pia e he wawɛɛ ngɛ nɔ́ nɛ e pee ɔ he, lɔɔ heje ɔ, Yehowa gbi lɛ. Se Yehowa de lɛ ke: ‘Akɛnɛ o pee ní yayamihi nɛ ɔmɛ heje ɔ, haomihi fuu maa ba o we ɔ mi.’ Nɛ hyɛ haomi nɛ ba David nɔ!

Natan nɛ e ngɛ munyu tue kɛ ngɛ David tsɔɔe

Kekleekle ɔ, Batsheba bimwɔyo ɔ gbo. Nɛ David bitɛte Amnon hu nu e nyɛmiyo Tamar pani nya nɛ e kɛ lɛ hwɔ si. Enɛ ɔ ha David binyumu Absalom mi mi fu Amnon wawɛɛ, nɛ e gbe lɛ. Pee se ɔ, nihi fuu ba nyɛɛ Absalom se nɛ e ha a wo lɛ matsɛ. Nyagbe ɔ, David ye Absalom nɔ kunimi, nɛ a gbe Absalom. Niinɛ, David kɛ haomihi fuu kpe.

Be nɛ ní nɛ ɔmɛ ngɛ nɔ yae ɔ, Batsheba fɔ binyumu nɛ a wo lɛ biɛ ke Salomo. Benɛ David bwɔ nɛ e be he wami ɔ, e binyumu Adoniya ka kaa e maa ye matsɛ. Lɔɔ he ɔ, David ha osɔfo Zadok pɔ Salomo nu kɛ tsɔɔ kaa lɛ nɛ e maa ye matsɛ ngɛ David se. Lɔɔ se ɔ, e kɛ we nɛ David gbo benɛ e ye jeha 70. David ye matsɛ jeha 40, se amlɔ nɛ ɔ lɛɛ, Salomo ji Israel matsɛ.

2 Samuel 11:1-27; 12:1-18; 1 Matsɛmɛ 1:1-48.



Sane Bimihi

  • Nyagbe ɔ, mɛni ba Kanaan zugba a nɔ ngɛ Yehowa yemi kɛ buami nya?
  • Mɛni ba ligbi ko gbɔkuɛ nya si benɛ David ngɛ e tsu ɔ yi mi ngɛ matsɛ we ɔ mi ɔ?
  • Mɛni heje Yehowa mi mi fu David wawɛɛ?
  • Kaa bɔnɛ e ngɛ foni ɔ mi ɔ, mɛnɔ Yehowa tsɔ kɛ ya David ngɔ nɛ e ya de lɛ ní yayamihi nɛ e pee ɔ, nɛ mɛni nyumu ɔ de David kaa e maa ba e nɔ?
  • Mɛni haomi ba David nɔ?
  • Mɛnɔ ba ye David se kaa Israel matsɛ?

Sane bimi kpahi

  • Kane 2 Samuel 11:1-27.

    Mɛni blɔ nɔ Yehowa sɔmɔmi nɛ waa kɛ wa he woɔ mi daa a ji he piɛ pomi kɛ ha wɔ?

    Mɛni ha David pee yayami ɔ, nɛ mɛni ji kɔkɔ bɔmi nɛ ngɛ enɛ ɔ mi kɛ ha Yehowa tsɔli mwɔnɛ ɔ? (2 Sam. 11:2; Mat. 5:27-29; 1 Kor. 10:12; Yak. 1:14, 15)

  • Kane 2 Samuel 12:1-18.

    Mɛni asafo mi nikɔtɔmahi kɛ fɔli ma nyɛ maa kase ngɛ blɔ nɔ nɛ Natan gu kɛ wo David ga a mi? (2 Sam. 12:1-4; Abɛ 12:18; Mat. 13:34)

    Mɛni heje Yehowa na David mɔbɔ ɔ? (2 Sam. 12:13; La 32:5; 2 Kor. 7:9, 10)