Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 61: A Wo David Matsɛ

Ní kasemi 61: A Wo David Matsɛ

SAUL ka kaa e nine maa su David nɔ ekohu. E ngɔ e tabuli ɔmɛ a kpɛti katsɛmɛ 3,000 nɛ e kɛ mɛ ho konɛ a ya hla David. Benɛ David ná le enɛ ɔ, e tsɔ slaali konɛ a ya hla he nɛ Saul kɛ e tabuli ɔmɛ ya to. Lɔɔ se ɔ, David bi e tabuli ɔmɛ a kpɛti ni enyɔ ke: ‘Nyɛ kpɛti mɛnɔ kɛ mi maa ya Saul sito he ɔ?’

David nɛ e ngɛ Matsɛ Saul tsɛe

Abishai ha heto ke: ‘Ma ya.’ Abishai ji David nyɛmiyo Zeruya binyumu. Benɛ Saul kɛ e tabuli ɔmɛ hwɔ mahe ɔ, David kɛ Abishai pee blɛuu kɛ ya a sito he ɔ. Kɛkɛ nɛ a ngɔ Saul akplɔ kɛ e nyu tɔ nɛ fɔɔ si ngɛ e yi tetle mi ɔ kɛ je. Nɔ ko nɛ mɛ, nɛ nɔ ko hu nui a he ejakaa a hwɔ mahe vii.

Hyɛ David kɛ Abishai amlɔ nɛ ɔ. A je kɛ ya da si ngɛ yoku ko nɔ ngɛ he ko banee. David kpa ngmlaa kɛ tsɛ Israel tabuli ɔmɛ a nyatsɛ ɔ ke: ‘Abner, mɛni heje nɛ o bui o nyɔmtsɛ, nɛ ji matsɛ ɔ he? Hyɛ! Jije e akplɔ kɛ nyu tɔ ɔ ngɛ?’

Saul hɛ tsiɛ. E le David gbi mi tso, nɛ e bi lɛ ke: ‘David, mo ji nɛ ɔ?’ Anɛ o na Saul kɛ Abner nɛ a daa si ngɛ foni ɔ mi ngɛ sisi blɔ lo?

David he nɔ ke: ‘Ee, ye nyɔmtsɛ.’ Nɛ David bi lɛ ke: ‘Mɛni heje o ngɛ hlae nɛ o gbe mi? Mɛni yayami i pee mo? Matsɛ, hyɛ o we akplɔ ɔ. Ha nɛ o tabuli ɔmɛ a kpɛti nɔ kake nɛ e ba ngɔ.’

Matsɛ Saul kɛ Abner

Saul he nɔ ke: ‘I tɔ̃, nɛ i je kuasia.’ Kɛkɛ nɛ David si lejɛ ɔ, nɛ Saul hu pue blɔ kɛ ho we mi ya. Se David de e he ke: ‘Ligbi kake nɛ Saul maa gbe mi. Ma tu fo kɛ ho Filistibi ɔmɛ a zugba a nɔ ya.’ Nɛ e pee ja. David nyɛ nɛ e sisi Filistibi ɔmɛ nɛ a he ye kaa amlɔ nɛ ɔ lɛɛ e ngɛ a blɔ fa mi.

Pee se ɔ, Filistibi ɔmɛ kɛ Israelbi ɔmɛ ya hwu ta. Nɛ a gbe Saul kɛ Yonatan tsuo ngɛ ta a mi. Enɛ ɔ wo David aywilɛho wawɛɛ, nɛ e po la ko ke: ‘Ye nyɛmi Yonatan, i ngɛ o he aywilɛho yee. I suɔ mo saminya!’

Enɛ ɔ se ɔ, David kpale kɛ ho Hebron ya, ngɛ Israel. Kɛkɛ nɛ ta ba te si ngɛ Saul webi nɛ suɔ kaa Saul binyumu Ishboshet nɛ ye matsɛ kɛ nihi hu nɛ suɔ kaa David nɛ ye matsɛ ɔ a kpɛti. Se nyagbe ɔ, David webi ɔmɛ ye a nɔ kunimi. David ye jeha 30 nɛ a wo lɛ matsɛ. E ye tsɛ ngɛ Hebron jeha kpaago kɛ fa. Nɛ bimɛ nɛ e fɔ ngɛ lejɛ ɔ ekomɛ a biɛ ji Amnon, Absalom kɛ Adoniya.

Be ba su nɛ David kɛ e webi ɔmɛ ya ngɔ ma ngua nɛ ngɛ fɛu nɛ a tsɛɛ lɛ Yerusalem ɔ. Yoab nɛ ji David nyɛmiyo Zeruya binyumu ɔmɛ a ti nɔ kake nɛ nyɛɛ ta a hɛ mi. Enɛ ɔ he ɔ, David pee Yoab e tabuli ɔmɛ a tatsɛ nɔkɔtɔma. Jehanɛ ɔ, David bɔni tsɛ yemi ngɛ Yerusalem.

1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Kronika 11:1-9.



Sane Bimihi

  • Mɛni David kɛ Abishai pee benɛ Saul hwɔ mahe ngɛ e sito he ɔ?
  • Mɛni munyuhi David bi Saul?
  • Jije David ho benɛ e je Saul ngɔ?
  • Mɛni wo David aywilɛho nɛ e po la a?
  • Jeha enyɛmɛ David ye benɛ a wo lɛ matsɛ ngɛ Hebron ɔ, nɛ kɛ a tsɛɛ e bimɛ ɔmɛ ekomɛ kɛɛ?
  • Jije David ya ye matsɛ ngɛ pee se?

Sane bimi kpahi

  • Kane 1 Samuel 26:1-25.

    David munyu nɛ e tu ngɛ 1 Samuel 26:11 tsɔɔ kaa wa je mɛni su kpo ngɛ Mawu blɔ nya tomi he? (La 37:7; Rom. 13:2)

    Ke wa pee nɔ ko kpakpa se nɔ ɔ je we hɛsa kpo ngɛ he ɔ, mɛni blɔ nɔ David munyu nɛ ngɛ 1 Samuel 26:23 ma nyɛ maa ye bua wɔ konɛ waa hɛɛ juɛmi nɛ da? (1 Ma. 8:32; La 18:20)

  • Kane 2 Samuel 1:26.

    Mɛni blɔ nɔ Kristofoli nɛ a ngɛ mwɔnɛ ɔ ma nyɛ ma ná ‘suɔmi nɛ mi wa kɛ ha a sibi’ kaa bɔnɛ e hi David kɛ Yonatan kpɛti ɔ? (1 Pet. 4:8; Kol. 3:14; 1 Yoh. 4:12)

  • Kane 2 Samuel 5:1-10.

    David ye matsɛ jeha enyɛmɛ, nɛ kɛ a gba be ɔ mi ha kɛɛ? (2 Sam. 5:4, 5)

    Mɛnɔ ha David pee nɔmlɔ nguaa, nɛ mɛni blɔ nɔ enɛ ɔ ji kaimi nɔ́ kɛ ha wɔ mwɔnɛ ɔ? (2 Sam. 5:10; 1 Sam. 16:13; 1 Kor. 1:31; Fil. 4:13)