Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 60: Abigail Kɛ David

Ní kasemi 60: Abigail Kɛ David

ANƐ o le yo kɛ e he fɛu nɛ́ e kɛ David ma kpemi ɔ lo? A tsɛɛ lɛ Abigail. E ngɛ nile, lɔɔ heje ɔ, e tsi David nya ngɛ nɔ́ yayami ko peemi he. Se loko wa maa kase lɔɔ ɔ, ha nɛ waa hyɛ níhi nɛ ya nɔ ngɛ David si himi mi.

Benɛ David tu fo kɛ je Saul nya a, e ya laa ngɛ tɛ puɔ ko mi. E nyɛminyumu ɔmɛ kɛ e wekuli tsuo ya piɛɛ e he ngɛ lejɛ ɔ. Nyumuhi maa pee kaa 400 ya piɛɛ e he, nɛ David pee a nyatsɛ. Jehanɛ ɔ, David ya Moab matsɛ ɔ ngɔ nɛ e ya de lɛ ke: ‘I kpa mo pɛɛ, ha ye tsɛ kɛ ye nyɛ nɛ a hi o ngɔ kɛ ya si benɛ ma na ye níhi a nya.’ Pee se ɔ, David kɛ nyumuhi nɛ piɛɛ e he ɔ ya laa ngɛ yokuhi a mi.

Enɛ ɔ se nɛ David kɛ Abigail ya kpe ɔ nɛ. E huno Nabal ɔ ji niatsɛ nɛ ngɛ zugba. E ngɛ jijɔ 3,000 kɛ apletsi hu 1,000. Nabal ji kpɛletsɛ. E yo Abigail lɛɛ e he ngɛ fɛu saminya nɛ e le bɔnɛ a peeɔ nɔ́ kpakpa hulɔ. Be ko po ɔ, e baa e weku ɔ yi. Ha nɛ waa hyɛ bɔnɛ e ba ha.

David kɛ e webi ɔmɛ pee Nabal kpakpa. A bu e to ɔmɛ a he ha lɛ. Lɔɔ he ɔ, ligbi ko ɔ, David tsɔ e webi ɔmɛ ekomɛ kɛ ya Nabal ngɔ kaa e dloo mɛ niye ní bɔɔ. David tsɔli ɔmɛ ya su Nabal ngɔ benɛ e kɛ e we apaatsɛmɛ ɔmɛ ngɛ e to ɔmɛ a he bwɔmi sãe. Jamɛ a ligbi ɔ ji okplɔɔ ngmɛmi ligbi, heje ɔ, Nabal ngɛ niye ní kpakpahi fuu nɛ a maa ye. Lɔɔ heje ɔ, David tsɔli ɔmɛ de lɛ ke: ‘Wa pee mo kpakpa. Wa jui o to ɔmɛ eko, mohu ɔ, wa bu a he ha mo. Lɔɔ he ɔ, wa kpa mo pɛɛ nɛ o ha wɔ niye ní bɔɔ ko nɛ wa ya ye.’

Nabal de mɛ ke: ‘I kɛ ye niye ní be nimli kaa nyɛ hae.’ E jɛ David, nɛ e tu munyu yayahi fuu kɛ si lɛ. David tsɔli ɔmɛ kpale a se nɛ a ya bɔ David amaniɛ. David mi mi fu wawɛɛ. E de mɛ ke: ‘Nyɛɛ ngɔ nyɛ klaate ɔmɛ!’ Kɛkɛ nɛ a pue Nabal we ɔ mi blɔ konɛ a ya gbe e kɛ e tsɔli ɔmɛ.

Nabal apaatsɛmɛ ɔmɛ a ti nɔ kake nu munyu nɛ Nabal tu ɔ, nɛ e ho ya de Abigail. Amlɔ nɔuu nɛ Abigail to niye ní he blɔ nya. E ngɔ niye ní ɔ kɛ pue tejihi a nɔ nɛ e pue blɔ. Benɛ e kɛ David ya kpe ɔ, e kple si ngɛ e teji ɔ nɔ nɛ e kpla si ngɛ David hɛ mi, nɛ e de ke: ‘Ye nyɔmtsɛ, i kpa mo pɛɛ, koo po ye huno ɔ nya mi. E biɛɛ, nɛ e peeɔ níhi nɛ nile be mi. O nɛ́ nike ní ko. I kpa mo pɛɛ, ngɔɔ nike ní nɛ ɔ, konɛ o ngɔ wa tɔmi ɔ kɛ pa wɔ.’

Abigail nɛ e ngɔ niye ní kɛ ma David hami

David de lɛ ke: ‘Yo ní lelɔ ji mo. O tsi ye nya kɛ je Nabal gbemi he, ngɛ kpɛle su nɛ e je kpo ɔ heje. Yaa o we mi ngɛ he jɔmi mi.’ Pee se benɛ Nabal gbo ɔ, Abigail ba pee David yi ɔmɛ a ti nɔ kake.

1 Samuel 22:1-4; 25:1-43.



Sane Bimihi

  • Kɛ a tsɛɛ yo ɔ nɛ e kɛ David ma kpemi ngɛ foni ɔ mi ɔ kɛɛ, nɛ mɛni ji e su?
  • Mɛnɔ ji Nabal?
  • Mɛni heje David tsɔ e webi ɔmɛ kɛ ya Nabal ngɔ kaa e dloo mɛ niye ní ɔ?
  • Mɛni Nabal de David tsɔli ɔmɛ, nɛ kɛ David pee e ní ngɛ he kɛɛ?
  • Mɛni Abigail pee kɛ tsɔɔ kaa yo ní lelɔ ji lɛ?

Sane bimi kpahi

  • Kane 1 Samuel 22:1-4.

    Mɛni blɔ nɔ David weku ɔ pee nɔhyɛ nɔ́ kpakpa ngɛ bɔnɛ e sa kaa waa ye bua wa sibi ngɛ asafo ɔ mi ha a he? (Abɛ 17:17; 1 Tes. 5:14)

  • Kane 1 Samuel 25:1-43.

    Mɛni heje a kale Nabal kaa nɔmlɔ nɛ bu be e he kulaa a? (1 Sam. 25:2-5, 10, 14, 21, 25)

    Mɛni mwɔnɛ ɔ Kristofoli yigbayi ma nyɛ maa kase kɛ je Abigail nɔhyɛ nɔ́ ɔ mi? (1 Sam. 25:32, 33; Abɛ 31:26; Efe. 5:24)

    Mɛni ní yayamihi enyɔ Abigail tsi David nya ngɛ he? (1 Sam. 25:31, 33; Rom. 12:19; Efe. 4:26)

    Mɛni blɔ nɔ bɔnɛ David bu Abigail ga womi ɔ tue ɔ, yeɔ bua nyumuhi mwɔnɛ ɔ konɛ a ná Yehowa juɛmi ngɛ yihi a he? (Níts. 21:8, 9; Rom. 2:11; 1 Pet. 3:7)