Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 59: Nɔ́ Heje nɛ E Sa kaa David nɛ Tu Fo

Ní kasemi 59: Nɔ́ Heje nɛ E Sa kaa David nɛ Tu Fo

BENƐ David gbe Goliat se ɔ, Israel tatsɛ Abner ngɔ lɛ kɛ ba Saul ngɔ. Saul bua jɔ David he saminya. Nɛ e ngɔ David kɛ to e tabuli ɔmɛ a nya asafoatsɛ, nɛ e ha nɛ e hi matsɛ we ɔ mi.

Pee se benɛ tabuli ɔmɛ je a kɛ Filistibi ɔmɛ a ta hwumi ɔ kɛ ba a, Israel yi ɔmɛ la ke: ‘Saul gbe akpehi, se David lɛɛ e gbe akpe nyɔngmahi.’ Enɛ ɔ ha Saul je David he hunga, ejakaa a ngɔ anunyami fuu kɛ ha David pe lɛ. Se Saul binyumu Yonatan lɛɛ e ji David he hunga. E suɔ David saminya, nɛ David hu suɔ lɛ. Lɔɔ he ɔ, mɛ ni enyɔ ɔmɛ a wo a sibi si kaa a maa pee huɛmɛ daa.

Matsɛ Saul nɛ e ngɛ akplɔ ɔ fɔe

David le sanku fiami saminya, nɛ Saul suɔ e la amɛ. Se ligbi ko ɔ, Saul hunga jemi ɔ ha nɛ e pee nɔ́ ko nɛ hi sãasaa. Benɛ David ngɛ sanku ɔ fiae ɔ, Saul ngɔ e we akplɔ ɔ, nɛ e fɔ konɛ e kɛ gbe David. Nɛ e de ke: ‘Ma hɛ David akplɔ kɛ pi gbogbo ɔ!’ Se David yu e he, nɛ akplɔ ɔ ya hɛ gbogbo ɔ. Lɔɔ se ɔ, Saul ka David akplɔ hɛmi ekohu se akplɔ ɔ na we lɛ. Jehanɛ ɔ, David na kaa e sa nɛ e hyɛ e he nɔ saminya.

Anɛ o kai Saul si womi ɔ lo? E de kaa e maa ngɔ e biyo ɔ kɛ ha nyumu nɛ maa gbe Goliat. Nyagbe ɔ, Saul de David ke e maa ngɔ e biyo Mikal kɛ ha lɛ, se loko e ma ha lɛ e biyo ɔ, ja e gbe a henyɛli nɛ ji Filistibi 100. Mo susu enɛ ɔ he nɛ o hyɛ! Saul susumi ji kaa Filistibi ɔmɛ maa gbe David. Se a nyɛ we nɛ a gbe lɛ, lɔɔ heje ɔ, Saul ngɔ e biyo ɔ kɛ ha David.

Ligbi ko ɔ, Saul de Yonatan kɛ e tsɔli ɔmɛ tsuo kaa e maa gbe David. Se Yonatan de e tsɛ ɔ ke: ‘Koo ye David awi. Ejakaa e pee we mo nɔ́ yayami ko. Mohu ɔ, o ná nɔ́ tsuaa nɔ́ nɛ e pee ɔ he se babauu. E ngɔ e wami kɛ wo oslaa mi kɛ gbe Goliat, nɛ o bua jɔ.’

David nɛ e ngɛ e he yue ngɛ akplɔ ko he

Saul bu e bi ɔ tue nɛ e wo si kaa e be David awi yee. Lɔɔ heje ɔ, Saul ha David kpale kɛ ba e we ɔ mi, nɛ e ba bɔni lɛ sɔmɔmi ekohu. Se ligbi ko benɛ David ngɛ sanku fiae ɔ, Saul fɔ e we akplɔ ɔ ekohu kaa e ma kɛ hɛ David. David yu e he, nɛ akplɔ ɔ ya hɛ gbogbo ɔ. Enɛ ɔ ji si etɛne nɛ Saul ka David gbemi! Jehanɛ ɔ lɛɛ, David yɔse kaa e sa nɛ e tu fo!

Jamɛ a nyɔ ɔ mi nɔuu ɔ, David ho lɛ nitsɛ e we mi ya. Se Saul tsɔ ni komɛ kaa a ya gbe lɛ ngɛ lejɛ ɔ. Mikal le nɔ́ nɛ e tsɛ ɔ to kaa e maa pee ɔ. Lɔɔ heje ɔ, e de e huno ɔ ke: ‘Ke o ji hiɛ ɔ nyɔ nɛ ɔ mi ɔ, o ma gbo loko je maa na.’ Jamɛ a nyɔ ɔ mi ɔ, Mikal ye bua David nɛ e gu saflɛ mi kɛ tu fo. David hi laami tso mi maa pee jeha kpaago bɔnɛ pee nɛ Saul nine nɛ ko su e nɔ.

1 Samuel 18:1-30; 19:1-18.



Sane Bimihi

  • Mɛni heje Saul je David he hunga, se e slo Saul binyumu Yonatan ngɛ mɛni blɔ nɔ?
  • Mɛni ba ligbi ko nɛ́ David ngɛ sanku fiae ha Saul ɔ?
  • Mɛni Saul de kaa David nɛ pee loko e maa ngɔ e biyo Mikal kɛ ha lɛ, nɛ mɛni heje Saul de ja?
  • Kaa bɔnɛ o na ngɛ foni ɔ mi ɔ, mɛni ba si etɛne benɛ David ngɛ sanku fiae ha Saul?
  • Mɛni Mikal pee kɛ baa David yi, nɛ mɛni David pee jeha kpaago?

Sane bimi kpahi

  • Kane 1 Samuel 18:1-30.

    Mɛni blɔ nɔ suɔmi nɛ mi wa nɛ hi David kɛ Yonatan kpɛti ɔ peeɔ suɔmi nɛ ngɛ “to kpa” amɛ kɛ “asafo kuu nyafii” ɔ a kpɛti ɔ he foni? (1 Sam. 18:1; Yoh. 10:16; Luka 12:32; Zak. 8:23)

    E ngɛ mi kaa Yonatan ji nɔ nɛ ko ye Saul se kaa matsɛ mohu, se mɛni blɔ nɔ 1 Samuel 18:4 tsɔɔ he si bami nitsɛ nɛ Yonatan kɛ kplɛɛ nɔ nɛ Mawu hla a nɔ?

    Mɛni blɔ nɔ Saul nɔhyɛ nɔ́ ɔ tsɔɔ kaa hunga jemi ma nyɛ ma ha nɛ nɔ ko nɛ pee yayami nɛ hɛdɔ ngɛ he, nɛ mɛni kɔkɔ bɔmi enɛ ɔ ji kɛ ha wɔ? (1 Sam. 18:7-9, 25; Yak. 3:14-16)

  • Kane 1 Samuel 19:1-17.

    Mɛni blɔ nɔ Yonatan ngɔ e wami kɛ wo oslaa mi benɛ e de Saul kaa e sɛ kaa e ye David awi ɔ? (1 Sam. 19:1, 4-6; Abɛ 16:14)