Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 57: Mawu Hla David

Ní kasemi 57: Mawu Hla David
David nɛ e ngɛ to bi ko kpɔe ngɛ lohwe ko dɛ

ANƐ o na nɔ́ nɛ ba a lo? Nyumuyo ɔ kpɔ to bi nɛ ɔ kɛ je osisiblisi ɔ dɛ mi. Osisiblisi ɔ ba nu to bi ɔ kɛ yaa nɛ́ e ya kpe lɛ. Se nyumuyo ɔ tu fo kɛ nyɛɛ a se, nɛ e ya kpɔ to bi ɔ ngɛ osisiblisi ɔ nya mi. Nɛ benɛ osisiblisi ɔ plɛ kɛ wo lɛ ɔ, nyumuyo ɔ fia lɛ nɔ́ nɛ e gbo! Be kpa ko hu ɔ, e kpɔ jijɔ ɔmɛ kake kɛ je jata dɛ. Anɛ pi nyumuyo kãtsɛ ji nɛ ɔ lo? O le nɔ nɛ e ji lo?

Lɛ ji nyumuyo David. E ngɛ Betlehem. E nɛnɛ ji Obed, nɛ ji Rut kɛ Boaz bi ɔ. Anɛ o kai mɛ lo? Nɛ David tsɛ ji Ishai. David hyɛɔ e tsɛ tohi. A fɔ David benɛ Yehowa to Saul matsɛ jeha 10 se.

Be ba su nɛ Yehowa de Samuel ke: ‘Ngɔɔ nu nɛ o ya Ishai we ɔ mi ngɛ Betlehem. I hla e binyumu ɔmɛ a kpɛti nɔ kake kaa e ye matsɛ.’ Benɛ Samuel na Eliab nɛ ji Ishai binyumu nɔkɔtɔma a, e de ngɛ e yi mi ke: ‘Niinɛ, nɔ nɛ ɔ ji nɔ nɛ Yehowa hla a nɛ.’ Se Yehowa de lɛ ke: ‘Koo hyɛ e kami kɛ e he fɛu ɔ. Pi lɛ nɛ i hla kaa e ye matsɛ.’

Enɛ ɔ he ɔ, Ishai tsɛ e binyumu Abinadab kɛ ba Samuel ngɔ. Se Samuel de lɛ ke: ‘Dɛbi, lɛ hu Yehowa hlɛ lɛ.’ Lɔɔ se ɔ, Ishai tsɛ e binyumu nɛ nyɛɛ se nɛ ji Shama hu kɛ ba. Se Samuel de ke: ‘Dɛbi, lɛ hu Yehowa hlɛ lɛ.’ Ishai ngɔ e binyumuhi kpaago kɛ ba Samuel hɛ mi, se Yehowa kplɛɛ we a ti nɔ ko nɔ ko nɔ. Samuel bi Ishai ke: ‘O binyumu ɔmɛ tsuo ji nɛ ɔ lo?’

Ishai ha heto ke: ‘E piɛ a senɔ wayoo kulaa a, se e ya ngɛ tohi hyɛe ngɛ nga a nɔ.’ Benɛ a ya tsɛ David kɛ ba a, Samuel na kaa e he ngɛ fɛu saminya. Yehowa de Samuel ke: ‘Lɛ ji nɛ ɔ nɛ, pɔɔ lɛ nu ɔ.’ Samuel pee bɔnɛ a de lɛ ɔ. Be maa su nɛ David maa ye Israel nɔ matsɛ.

1 Samuel 17:34, 35; 16:1-13.



Sane Bimihi

  • Kɛ a tsɛɛ nyumuyo ɔ nɛ ngɛ foni ɔ mi ɔ kɛɛ, nɛ kɛ wa peeɔ kɛ leɔ kaa e ngɛ kã kɛɛ?
  • Jije David hi, nɛ kɛ a tsɛɛ e tsɛ kɛ e nɛ kɛɛ?
  • Mɛni heje nɛ Yehowa de Samuel kaa e ya Ishai we ɔ mi ngɛ Betlehem ɔ?
  • Mɛni ba benɛ Ishai ngɔ e binyumuhi kpaago kɛ ba Samuel ngɔ?
  • Benɛ a tsɛ David kɛ ba a, mɛni Yehowa de Samuel?

Sane bimi kpahi

  • Kane 1 Samuel 17:34, 35.

    Mɛni blɔ nɔ sane nɛ ɔmɛ ma nɔ mi kaa David ji kãtsɛ nɛ e kɛ e he hu fɔ Yehowa nɔ? (1 Sam. 17:37)

  • Kane 1 Samuel 16:1-14.

    Mɛni blɔ nɔ Yehowa munyu nɛ ngɛ 1 Samuel 16:7 yeɔ bua wɔ konɛ wa kua nihi a hɛ mi hyɛmi kɛ juɛmi yayami nɛ a náa ngɛ ni kpahi a he ɔ? (Níts. 10:34, 35; 1 Tim. 2:4)

    Mɛni blɔ nɔ nɔ́ nɛ ba Saul nɔ tsɔɔ ngɛ kaa ke Yehowa je e mumi klɔuklɔu ɔ kɛ je nɔ ko nɔ ɔ, mumi yayami, aloo he numi nɛ a náa kaa a pee nɔ́ yayami ɔ ma nyɛ ma ba da nane mi. (1 Sam. 16:14; Mat. 12:43-45; Gal. 5:16)