Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 56: Saul—Israel Matsɛ Kekle

Ní kasemi 56: Saul—Israel Matsɛ Kekle
Samuel nɛ e ngɛ Saul nu pɔe kaa matsɛ

HYƐ Samuel nɛ ngɛ nu plɛe kɛ ngɛ nyumu ɔ yi kpɛti puee. Enɛ ɔ ji nɔ́ nɛ a peeɔ ha nɔ ko kɛ tsɔɔ kaa a to lɛ matsɛ. Yehowa de Samuel kaa e plɛ nu ɔ kɛ pue Saul yi kpɛti. Nu nɛ ɔ ji nu slɔɔto ko nɛ jee via saminya.

Saul susuu we kaa e sa nɔ nɛ yeɔ matsɛ. E de Samuel ke: ‘Benyamin wɛtso nɛ ji nyafii pe kulaa ngɛ Israel ɔ mi no ji mi. Mɛni heje nɛ o ke ma ye matsɛ ɔ?’ Yehowa suɔ Saul ejakaa e pee we e he kaa nɔmlɔ ngua ko nɛ́ he ngɛ se nami. Enɛ ɔ heje nɛ Mawu to lɛ matsɛ ɔ nɛ.

Se Saul pi nɔmlɔ nyafii loo ohiatsɛ. E je sikatsɛmɛ a weku mi, nɛ e ka gagaa gbãuu kɛ e he fɛu. Nɔ ko nɔ ko be Israel nɛ e kami kɛ lɛ sɔ! Jehanɛ se, Saul ji nyumu nɛ he wa saminya, nɛ e he sɔɔ kɛ fo tumi wawɛɛ hulɔ. Mabi ɔmɛ a bua jɔ he kaa Yehowa hla Saul konɛ e ye a nɔ matsɛ. Mɛ tsuo a kpa ngmlaa kɛ de ke: ‘Matsɛ ɔ yi nɛ ná wami!’

Israel henyɛli ɔmɛ a he wa saminya. A ngɛ Israelbi ɔmɛ haoe kpamisa. Benɛ a to Saul matsɛ ɔ, e kɛ we tsɔ nɛ Amonbi ɔmɛ je ta kɛ ba ná mɛ. Se Saul bua ta hwuli babauu nya, nɛ e kɛ ye Amonbi ɔmɛ a nɔ kunimi. Enɛ ɔ ha mabi ɔmɛ a bua jɔ nitsɛ kaa Saul ji a matsɛ.

Saul nyɛɛ Israel hɛ mi ngɛ jeha amɛ a mi kɛ ye a henyɛli ɔmɛ a nɔ kunimi babauu. Saul ngɛ binyumu kãtsɛ ko nɛ a tsɛɛ lɛ Yonatan. Yonatan hu ye bua Israel kɛ ye kunimi ngɛ tahi fuu mi. Se loloolo ɔ, Filistibi ɔmɛ ji Israel henyɛli pe kulaa. Ligbi ko ɔ, Filistibi akpeakpehi abɔ ba ná Israel konɛ a kɛ mɛ nɛ hwu ta.

Samuel de Saul kaa e mlɛ lɛ nɛ́ e ba sa bɔ, aloo e ngɔ nike ní kɛ ha Yehowa loko a ya ta a. Se Samuel ya sui lejɛ ɔ mla. Nɛ akɛnɛ Saul ye gbeye kaa Filistibi ɔmɛ maa je ta a sisi heje ɔ, lɛ nitsɛ e ho ya sa bɔ ɔ. Benɛ Samuel ba su ɔ, e de Saul kaa nɔ́ nɛ e pee ɔ ji tue gbomi. Samuel de lɛ ke: ‘Yehowa maa hla nɔ kpa konɛ e ye Israel nɔ matsɛ.’

Pee se ɔ, Saul gbo tue ekohu. Lɔɔ he ɔ, Samuel de lɛ ke: ‘E hi kaa o maa bu Yehowa tue pe nɛ́ o maa ngɔ to nɛ tu zɔ pe kulaa kɛ ha lɛ kaa nike ní. Akɛnɛ o gbo Yehowa tue heje ɔ, e ma kpa mo Israel nɔ matsɛ yemi.’

Ní kasemi agbo ngɛ sane nɛ ɔ mi kɛ ha wɔ. E tsɔɔ wɔ bɔnɛ e he hia ha kaa waa bu Yehowa tue be tsuaa be. Jehanɛ hu e tsɔɔ wɔ kaa, nɔmlɔ kpakpa kaa bɔnɛ Saul ji kekle ɔ, ma nyɛ ma tsake kɛ pee nɔmlɔ yayami. Wa sume kaa waa pee nimli yayamihi, aloo pi ja?

1 Samuel yi 9 kɛ ya si 11; 13:5-14; 14:47-52; 15:1-35; 2 Samuel 1:23.



Sane Bimihi

  • Mɛni Samuel ngɛ pee ngɛ foni ɔ mi ɔ, nɛ mɛni heje?
  • Mɛni ha Yehowa suɔ Saul sane, nɛ mɛni nɔmlɔ ji lɛ?
  • Kɛ a tsɛɛ Saul binyumu ɔ kɛɛ, nɛ mɛni e pee?
  • Kɛ ba kɛɛ nɛ Saul mlɛ́ Samuel nɛ lɛ nitsɛ e sã afɔle ɔ?
  • Mɛni wa ma nyɛ maa kase ngɛ Saul sane ɔ he?

Sane bimi kpahi

  • Kane 1 Samuel 9:15-21 kɛ 10:17-27.

    Mɛni blɔ nɔ he si bami su nɛ Saul ngɛ ɔ ye bua lɛ nɛ e ngɔɛ esɔ yemi kɛ pee nɔ́ ko nɛ dɛ benɛ nyumuhi komɛ jɛ lɛ ɔ? (1 Sam. 9:21; 10:21, 22, 27; Abɛ 17:27)

  • Kane 1 Samuel 13:5-14.

    Mɛni yayami Saul pee ngɛ Gilgal? (1 Sam. 10:8; 13:8, 9, 13)

  • Kane 1 Samuel 15:1-35.

    Mɛni yayami nɛ ngɛ hɛdɔ Saul pee ngɛ Amalek Matsɛ Agag sane ɔ mi? (1 Sam. 15:2, 3, 8, 9, 22)

    Mɛni blɔ nɔ Saul je e nya ngɛ nɛ e kɛ tsɔɔ kaa nɔ́ nɛ e pee ɔ da? (1 Sam. 15:24)

    Ke a wo wɔ ga a, mɛni kɔkɔ bɔmi e sa kaa wa kɛ tsu ní mwɔnɛ ɔ? (1 Sam. 15:19-21; La 141:5; Abɛ 9:8, 9; 11:2)