Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 55: Jokuɛ Nyumuyo ko Sɔmɔ Mawu

Ní kasemi 55: Jokuɛ Nyumuyo ko Sɔmɔ Mawu

TSE jokuɛ nyumuyo nɛ ɔ he ngɛ fɛu saminya? E biɛ ji Samuel. Nɛ nyumu ɔ nɛ ngɔ e nine kɛ fɔ Samuel yi kpɛti ɔ ji Israel osɔfo nɔkɔtɔma Eli. Samuel tsɛ Elkana kɛ e nyɛ Hana ji nihi nɛ ngɔ Samuel kɛ ba ngɛ Eli hae ɔ nɛ.

Samuel nɛ a kɛ lɛ ya osɔfo Eli ngɔ

Samuel ye maa pee jeha eywiɛ loo enuɔ ko pɛ. Se e kɛ Eli kɛ osɔfo kpa amɛ maa hi hiɛ ɔ, ngɛ Yehowa kpe he bo tsu ɔ mi. Mɛni heje Elkana kɛ Hana ngɔ a bi wayoo kikɛ ɔ kɛ ya ha kaa e sɔmɔ Yehowa ngɛ kpe he bo tsu ɔ mi ɔ? Ha nɛ waa hyɛ.

Jeha bɔɔ ko pɛ ji nɛ ɔ, nɛ Hana ye aywilɛho wawɛɛ. Ejakaa e be bi, nɛ e suɔ kaa e fɔ. Lɔɔ he ɔ, ligbi ko nɛ́ Hana ya Yehowa kpe he bo tsu ɔ mi ɔ, e sɔle ke: ‘O Yehowa, o hɛ nɛ ko je ye nɔ! I ngɛ mo kita kãe kaa ke o ha mi binyumu ɔ, ma ngɔ lɛ kɛ ha mo konɛ e sɔmɔ mo e wami ligbi tsuo.’

Yehowa bu Hana sɔlemi ɔ tue, nɛ nyɔhiɔ komɛ a se ɔ, e fɔ Samuel. Hana suɔ e binyumuyo nɛ ɔ saminya, nɛ e bɔni lɛ Yehowa he ní tsɔɔmi kɛ je benɛ e wɛ kulaa. E de e huno ɔ ke: ‘Ke i po Samuel nyɔ pɛ ɔ, ma ngɔ lɛ kɛ ya kpe he bo tsu ɔ mi, konɛ e ya hi lejɛ ɔ kɛ sɔmɔ Yehowa.’

Enɛ ɔ ji nɔ́ nɛ Hana kɛ Elkana ngɛ pee ngɛ foni ɔ mi ɔ nɛ. Nɛ akɛnɛ Samuel fɔli tsɔɔ lɛ ní saminya heje ɔ, e bua jɔ he kaa e ma sɔmɔ Yehowa ngɛ E bo tsu ɔ mi. Daa jeha a, Hana kɛ Elkana ba jaa Mawu ngɛ bo tsu nɛ ngɛ slɔɔto nɛ ɔ mi, nɛ a slaa a binyumuyo ɔ hulɔ. Daa jeha ke Hana ma a, e kpɛɔ tade ehe kɛ ba haa Samuel.

Samuel ya nɔ nɛ e sɔmɔ ngɛ Yehowa kpe he bo tsu ɔ mi jehahi babauu, nɛ Yehowa kɛ ni kpahi tsuo ná e he bua jɔmi nitsɛ. Se osɔfo nɔkɔtɔma Eli binyumuhi nɛ ji Hofni kɛ Finehas be jemiba kpakpa. A peeɔ ní yayamihi fuu, nɛ a ha ni kpahi hu bui Yehowa. Jinɛ e sa kaa Eli ko kpa mɛ osɔfo yemi ɔ, se e pee we ja.

Se nyumuyo Samuel lɛɛ e ha we nɛ ní yayamihi nɛ a ngɛ pee ngɛ kpe he bo tsu ɔ mi ɔ nɛ ha e kpa Yehowa sɔmɔmi. Nɛ akɛnɛ nihi bɔɔ pɛ lɛ suɔ Yehowa heje ɔ, Yehowa kɛ adesahi kpa munyu tumi kɛ. Se benɛ Samuel wa bɔɔ ɔ, nɔ́ nɛ ba ji nɛ ɔ nɛ:

Ligbi ko ɔ, Samuel hwɔ mahe ngɛ kpe he bo tsu ɔ mi, kɛkɛ nɛ gbi ko tsiɛ lɛ. E hine ke: ‘Ne mi.’ Kɛkɛ nɛ e te si nɛ e tu fo kɛ ya Eli ngɔ, nɛ e ya de lɛ ke: ‘I nu kaa o tsɛ mi, i ba.’

Se Eli de lɛ ke: ‘I tsɛ we mo; kpale kɛ ya hwɔ si.’ Lɔɔ he ɔ, Samuel kpale ya hwɔ si.

Gbi ɔ tsɛ lɛ si enyɔne ke: ‘Samuel!’ Kɛkɛ nɛ Samuel te si ekohu nɛ e tu fo kɛ ho Eli ngɔ ya, nɛ e ya de lɛ ke: ‘I nu kaa o tsɛ mi, i ba.’ Se Eli de lɛ ke: ‘I tsɛ we mo, ye bi. Yaa hwɔ si ekohu.’ Kɛkɛ nɛ Samuel kpale ya hwɔ si.

Gbi ɔ kpale tsɛ lɛ ekohu si etɛne ke: ‘Samuel!’ Lɔɔ he ɔ, Samuel tu fo kɛ ho Eli ngɔ ya ekohu. E ya de lɛ ke: ‘I ba, piɔ lɛɛ i heɔ yeɔ kaa o tsɛ mi niinɛ.’ Amlɔ nɛ ɔ, Eli na kaa Yehowa ji nɔ nɛ ngɛ Samuel tsɛe ɔ nɛ. Lɔɔ he e de Samuel ke: ‘Yaa nɛ o ya hwɔ si, nɛ ke e tsɛ mo ekohu ɔ, de ke: “Moo tu munyu Yehowa, o tsɔlɔ ngɛ mo tue bue.”’

Benɛ Yehowa tsɛ Samuel ekohu ɔ, e de bɔnɛ Eli de lɛ ɔ. Yehowa de Samuel kaa e maa gbla Eli kɛ e binyumu ɔmɛ a tue. Pee se ɔ, Hofni kɛ Finehas ya gbo ngɛ Filistibi ɔmɛ a dɛ mi ngɛ ta mi. Nɛ benɛ Eli nu a gbenɔ ɔ he ɔ, e nɔ si nɛ e kuɛ ku nɛ lɛ hu e gbo. Enɛ ɔ ha nɔ́ nɛ Yehowa de ɔ ba mi.

Samuel ba wa nɛ e ba pee Israel nyagbe ma nyadalɔ. Benɛ Samuel bwɔ ɔ, mabi ɔmɛ de lɛ ke: ‘Moo to matsɛ ha wɔ nɛ e ye wa nɔ.’ Samuel sume kaa e maa pee nɔ́ nɛ mabi ɔmɛ ngɛ hlae ɔ, ejakaa ngɛ anɔkuale mi ɔ, Yehowa ji a matsɛ. Se Yehowa de lɛ ke e bu mabi ɔmɛ a munyu ɔ tue.

1 Samuel 1:1-28; 2:11-36; 4:16-18; 8:4-9.



Sane Bimihi

  • Kɛ a tsɛɛ jokuɛ nyumuyo ɔ nɛ ngɛ foni ɔ mi ɔ kɛɛ, nɛ ni kpa amɛ nɛɛ?
  • Mɛni sɔlemi Hana sɔle ligbi ko nɛ e ya Yehowa bo tsu ɔ mi ɔ, nɛ kɛ Yehowa ha lɛ heto kɛɛ?
  • Jeha enyɛmɛ Samuel ye benɛ a ngɔ lɛ kɛ ya nɛ e ya sɔmɔ ngɛ Yehowa bo tsu ɔ mi ɔ, nɛ mɛni e nyɛ peeɔ kɛ haa lɛ daa jeha?
  • Kɛ a tsɛɛ Eli binyumu ɔmɛ kɛɛ, nɛ mɛni nimli ji mɛ?
  • Mɛni blɔ nɔ Yehowa gu kɛ tsɛ Samuel, nɛ mɛni sɛgbi E kɛ ha lɛ?
  • Benɛ Samuel wa a, mɛni e ba plɛ, nɛ benɛ e ba bwɔ ɔ, mɛni ba?

Sane bimi kpahi

  • Kane 1 Samuel 1:1-28.

    Mɛni nɔhyɛ nɔ́ kpakpa Elkana pee kɛ fɔ si ha wekuyihi ngɛ weku ɔ hɛ mi nyɛɛmi ngɛ anɔkuale jami mi ɔ he? (1 Sam. 1:3, 21; Mat. 6:33; Fil. 1:10)

    Mɛni wa ma nyɛ maa kase kɛ je bɔnɛ Hana tsu haomi nɛ mi wa nɛ e kɛ kpe ɔ he ní ɔ mi? (1 Sam. 1:10, 11; La 55:22; Rom. 12:12)

  • Kane 1 Samuel 2:11-36.

    Mɛni blɔ nɔ Eli bu e binyumu ɔmɛ pe Yehowa, nɛ mɛni blɔ nɔ enɛ ɔ ji kɔkɔ bɔmi kɛ ha wɔ? (1 Sam. 2:22-24, 27, 29; 5 Mose 21:18-21; Mat. 10:36, 37)

  • Kane 1 Samuel 4:16-18.

    Mɛni sɛgbi nɛ haoɔ nɔ eywiɛ a kɛ je ta nga a nɔ kɛ ba ha Eli, nɛ mɛni amaniɛ bɔmi nɛ ɔ ngɔ kɛ ba e nɔ?

  • Kane 1 Samuel 8:4-9.

    Mɛni Israelbi ɔmɛ pee kɛ tɔ̃ Yehowa nɔ wawɛɛ, nɛ mɛni blɔ nɔ wa ma nyɛ ma fĩ e Matsɛ Yemi ɔ se mwɔnɛ ɔ? (1 Sam. 8:5, 7; Yoh. 17:16; Yak. 4:4)