Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 54: Nyumu nɛ He Wa Pe Nɔ Tsuaa Nɔ

Ní kasemi 54: Nyumu nɛ He Wa Pe Nɔ Tsuaa Nɔ

ANƐ o le nyumu nɛ he wa pe kulaa nɛ hi si hyɛ ɔ biɛ lo? E ji ma nyadalɔ, nɛ a tsɛɛ lɛ ke Samson. Yehowa ji nɔ nɛ ha Samson he wami ɔ nɛ. Loko a ma fɔ Samson ɔ, Yehowa de e nyɛ ke: ‘E be kɛe nɛ o ma fɔ binyumu. E maa nyɛɛ Israel hɛ mi kɛ kpɔ ma a kɛ je Filistibi ɔmɛ a dɛ.’

Samson nɛ e kɛ jata ngɛ kunɔ nɔe

Filistibi ɔmɛ ji nimli yayamihi nɛ a ngɛ Kanaan. A ngɛ tabuli babauu, nɛ a haoɔ Israelbi ɔmɛ wawɛɛ. Ligbi ko ɔ, benɛ Samson yaa Filistibi ɔmɛ a ngɔ ɔ, jata ngua ko kɛ lɛ ba kpe ngɛ blɔ nɔ. Se Samson ngɔ e nine kɛkɛ nɛ e kɛ gbe jata a. Jehanɛ se ɔ, e gbe Filistibi yayamihi fuu hulɔ.

Pee se ɔ, Samson ya ngɔ yo ko nɛ a tsɛɛ lɛ Delila. Filistibi ɔmɛ a nyatsɛmɛ ɔmɛ wo Delila si kaa, ke e tsɔɔ mɛ nɔ́ nɛ ha Samson he wami ɔ, a ti nɔ tsuaa nɔ ma ha lɛ sika hiɔ 1,100. Delila suɔ kaa e ná sika fuu nɛ a tsɔɔ nɛ ɔ. Pi Samson, loo Mawu webi a huɛ kpakpa ji Delila. Enɛ ɔ heje ɔ, e bi Samson si abɔ konɛ e tsɔɔ lɛ he nɛ e ná e he wami ɔ kɛ je.

Delila kɛ Samson

Delila hao Samson hluu nɛ nyagbe ɔ, Samson tsɔɔ lɛ he nɛ e he wami ɔ ngɛ. E de lɛ ke: ‘Kɛ je benɛ a fɔ mi ɔ, a sã we ye yi bwɔmi ɔ hyɛ. Ejakaa Mawu hla mi kaa ma pee e sɔmɔlɔ slɔɔto ko nɛ ji Nazirno. Ke a sã ye yi bwɔmi ɔ pɛ, ye he wami ɔ maa je ye mi.’

Benɛ Delila nu munyu nɛ ɔ, e ha Samson hwɔ mahe ngɛ e tɛ nɔ. Kɛkɛ nɛ e tsɛ nyumu ko nɛ e ba sã Samson yi bwɔmi ɔ. Benɛ Samson hɛ tsiɛ ɔ, e he wami ɔ je e mi. Filistibi ɔmɛ ba nɛ a ba nu lɛ. A tá e hɛngmɛ enyɔ ɔmɛ, nɛ a ngɔ lɛ kɛ pee a nyɔguɛ.

Samson nɛ e ngɛ titima amɛ kue

Ligbi ko ɔ, Filistibi ɔmɛ ngmɛ okplɔɔ nguaa ko, konɛ a kɛ wo a mawu nɛ ji Dagon ɔ hɛ mi nyami. Lɔɔ he ɔ, a ya je Samson kɛ je tsu ɔ mi kɛ ba lejɛ ɔ, konɛ a ye e he fɛu. Se, Samson yi bwɔmi ɔ bɔni hɛmi ekohu. Lɔɔ he ɔ, Samson de nyumuyo ɔ nɛ pɛtɛ e nine si ɔ ke: ‘Ha ma pɛtɛ titima amɛ a he nɛ ma hyɛ.’ Kɛkɛ nɛ Samson pɛtɛ titima amɛ a he, nɛ e sɔle ha Yehowa kaa e ha lɛ he wami ekohu. E kpa ngmlaa nɛ e de ke: ‘Ha nɛ i kɛ Filistibi ɔmɛ nɛ gbo.’ Filistibi 3,000 nɛ a ngɛ okplɔɔ ngmɛmi ɔ sisi. Nɛ benɛ Samson tsitsɛɛ tɛ ɔmɛ ɔ, tsu ɔ hule kɛ pue nimli yayami nɛ ɔmɛ tsuo a nɔ nɛ a gbo.

Manyadali yi 13 kɛ ya si 16.



Sane Bimihi

  • Kɛ a tsɛɛ nyumu nɛ he wa pe kulaa nɛ hi si hyɛ ɔ kɛɛ, nɛ mɛnɔ ha lɛ he wami ɔ?
  • Ligbi ko ɔ, mɛni Samson pee jata agbo ko kaa bɔnɛ o na ngɛ foni ɔ mi ɔ?
  • Mɛni laami mi sane Samson ngɛ sɛɛe ha Delila ngɛ foni ɔ mi ɔ, nɛ mɛni blɔ nɔ enɛ ɔ ha Filistibi ɔmɛ ná e he blɔ nɛ a nu lɛ?
  • Mɛni blɔ nɔ Samson gbe henyɛli nɛ ji Filistibi 3,000 ngɛ ligbi nɛ e gbo ɔ nɔ?

Sane bimi kpahi

  • Kane Manyadali 13:1-14.

    Mɛni blɔ nɔ Manoa kɛ e yo ɔ pee bimɛ a lɛmi he nɔhyɛ nɔ́ kpakpa kɛ fɔ si ha fɔli? (Many. 13:8; La 127:3; Efe. 6:4)

  • Kane Manyadali 14:5-9 kɛ 15:9-16.

    Mɛni lɛ jata nɛ́ Samson gbe, kɛ kpa nɛ a kɛ fi lɛ nɛ e tsɔ mi, kɛ teji tsitsa wu nɛ e kɛ gbe nyumuhi 1,000 he sane ɔ tsɔɔ ngɛ bɔnɛ Yehowa mumi klɔuklɔu ɔ tsuɔ ní ha a he?

    Mɛni blɔhi a nɔ mumi klɔuklɔu yeɔ bua wɔ mwɔnɛ ɔ? (Many. 14:6; 15:14; Zak. 4:6; Níts. 4:31)

  • Kane Manyadali 16:18-31.

    Mɛni blɔ nɔ huɛ bɔmi yayami ye Samson awi ngɛ, nɛ mɛni wa ma nyɛ maa kase kɛ je enɛ ɔ mi? (Many. 16:18, 19; 1 Kor. 15:33)