Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 53: Yefta Siwo ɔ

Ní kasemi 53: Yefta Siwo ɔ
Yefta biyo ɔ

ANƐ o wo si ko nɛ pee se ɔ, e he wa ha mo kaa o maa ye nɔ hyɛ lo? Nyumu ɔ nɛ ngɛ foni ɔ mi ɔ pee ja, nɛ lɔɔ heje nɛ aywilɛho nu lɛ ɔ nɛ. Nyumu nɛ ɔ ji Israel ma nyadalɔ kãtsɛ ko, nɛ a tsɛɛ lɛ Yefta.

Yefta hi si benɛ Israelbi ɔmɛ kpa Yehowa jami. Ma a bɔni ní yayamihi peemi ekohu. Enɛ ɔ he ɔ, Yehowa ha nɛ Amonbi ɔmɛ hao mɛ. Kɛkɛ nɛ Israelbi ɔmɛ fo ya kɛ tsɛ Yehowa ke: ‘Wa pee yayami kɛ si mo. Wa kpa mo pɛɛ nɛ o he wa yi wami!’

Yefta kɛ e tabuli ɔmɛ

Mabi ɔmɛ pia a he ngɛ a ní yayamihi nɛ a pee ɔ he. Nɛ a bɔni Yehowa jami ekohu kɛ tsɔɔ kaa a pia a he niinɛ. Enɛ ɔ he ɔ, Yehowa ye bua mɛ ekohu.

Mabi ɔmɛ hla Yefta konɛ e kɛ Amonbi ɔmɛ nɛ́ ya hwu ta. Yefta suɔ kaa Yehowa nɛ́ ye bua lɛ ngɛ ta a mi. Enɛ ɔ he ɔ, e wo lɛ si ke: ‘Ke o ye bua mi nɛ i ye Amonbi ɔmɛ a nɔ kunimi ɔ, ma ngɔ nɔ nɛ maa je ye we ɔ mi kɛ ba kpee mi kekle ɔ kɛ ha mo.’

Yehowa bu Yefta siwo ɔ tue, nɛ e ha e ye manye ngɛ ta a mi. Benɛ Yefta je ta a kɛ ba a, anɛ o le nɔ nɛ ba kpee lɛ ngɛ blɔ nɔ kekle lo? Lɛ ji e biyo kake too pɛ nɛ e ngɛ ɔ. Yefta kpa ngmlaa ke: ‘Ao, ye bi! Mɛni aywilɛho nɛ o wo mi kikɛ? I wo Yehowa si, nɛ i be nyɛɛe ma kpale ye nya se.’

Benɛ Yefta de e biyo ɔ e si womi ɔ, lɛ hu e ye aywilɛho. Ejakaa lɔɔ tsɔɔ kaa, e maa je e tsɛ kɛ e huɛmɛ a he. Nɛ e maa ngɔ e wami be nɛ piɛ ɔ tsuo kɛ ya sɔmɔ Yehowa ngɛ E kpe he bo tsu ɔ mi ngɛ Shilo. Lɔɔ he ɔ, e de e tsɛ ɔ ke: ‘Ke o kã Yehowa kita a, lɛɛ e sa kaa o ye nɔ.’

Lɔɔ heje ɔ, Yefta biyo ɔ ya hi Shilo, nɛ e ngɔ e wami be nɛ piɛ ɔ tsuo kɛ sɔmɔ Yehowa ngɛ kpe he bo tsu ɔ mi. Daa jeha a, Israel yi ɔmɛ ya slaa lɛ nɛ a jeɔ e hɛja ligbi eywiɛ. Mabi ɔmɛ suɔ Yefta biyo ɔ sane, ejakaa e ji Yehowa sɔmɔlɔ kpakpa.

Manyadali 10:6-18; 11:1-40.



Sane Bimihi

  • Mɛnɔ ji Yefta, nɛ mɛni be mi e hi si?
  • Mɛni kita Yefta kã Yehowa?
  • Mɛni heje Yefta ye aywilɛho benɛ e ya ye Amonbi ɔmɛ a nɔ kunimi nɛ e kpale kɛ ba we mi ɔ?
  • Mɛni Yefta biyo ɔ de benɛ e tsɛ ɔ de lɛ kita nɛ e kã a?
  • Mɛni heje mabi ɔmɛ suɔ Yefta biyo ɔ sane ɔ?

Sane bimi kpahi

  • Kane Manyadali 10:6-18.

    Mɛni kɔkɔ bɔmi ngɛ Israelbi ɔmɛ a we anɔkuale nɛ a yi Yehowa nɛ a ngma kɛ fɔ si ɔ mi kɛ ha wɔ? (Many. 10:6, 15, 16; Rom. 15:4; Kpoj. 2:10)

  • Kane Manyadali 11:1-11, 29-40.

    Kɛ wa peeɔ kɛ leɔ kaa Yefta biyo ɔ nɛ e ngɔ ha kaa “sãmi bɔ” ɔ tsɔɔ we kaa a ya gbe lɛ kɛ sã afɔle? (Many. 11:31; 3 Mose 16:24; 5 Mose 18:10, 12)

    Mɛni blɔ nɔ Yefta ngɔ e biyo ɔ kɛ sã afɔle ngɛ?

    Mɛni wa ma nyɛ maa kase kɛ je bɔnɛ Yefta pee e ní ha ngɛ kita nɛ e kã Yehowa he ɔ mi? (Many. 11:35, 39; Fiɛlɔ 5:4, 5; Mat. 16:24)

    Mɛni blɔ nɔ Yefta biyo ɔ pee be tsuo sɔmɔmi nítsumi ɔ he nɔhyɛ nɔ́ kpakpa kɛ fɔ si ha Kristofoli nihewi kɛ yihewi? (Many. 11:36; Mat. 6:33; Fil. 3:8)