Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 52: Gideon kɛ Nyumuhi 300 Ɔmɛ

Ní kasemi 52: Gideon kɛ Nyumuhi 300 Ɔmɛ

ANƐ o na nɔ́ nɛ ngɛ nɔ yae ngɛ hiɛ ɔ lo? Israel ta hwuli sɔuu ji nɛ ɔ nɛ. Nyumuhi nɛ a ba si ɔ ngɛ nyu nue. Nyadalɔ Gideon nɛ daa si ngɛ a kasa nya a nɛ. E ngɛ bɔnɛ a plɛ kɛ ngɛ nyu ɔ nue ha a hyɛe.

Moo hyɛ blɔ slɔɔtohi a nɔ nɛ a gu kɛ ngɛ nyu ɔ nue ha. Ni komɛ ngɔ a nya kɛ bu nyu ɔ mi. Se nɔ kake wo e yi nɔ nɛ e ngɔ e nine kɛ ngɛ nyu ɔ nue, bɔnɛ pee nɛ e nyɛ nɛ e hyɛ e he kɛ kpe. Enɛ ɔ he hia wawɛɛ, ejakaa Yehowa de Gideon ke e hla nihi nɛ a hɛ maa hi a he nɔ benɛ a ngɛ nyu ɔ nue ɔ pɛ. Nihi nɛ piɛ ɔ lɛɛ Mawu de ke e ha nɛ a ho we mi ya. Ha nɛ waa hyɛ nɔ́ heje ha.

Israelbi ɔmɛ sɛ haomi nɛ nya wa mi ekohu. Nɔ́ nɛ ha e ba ja ji kaa a bui Yehowa tue. Midianbi ɔmɛ ná a nɔ he wami nɛ a ngɛ mɛ piie. Enɛ ɔ ha Israel fo ya kɛ tsɛ Yehowa, nɛ e he mɛ nɔ.

Yehowa de Gideon kaa e bua ta hwuli a nya, lɔɔ he ɔ, Gideon bua nyumuhi ta hwuli 32,000 nya. Se ta hwuli nɛ kɛ Israel ma ta hwumi ɔ hiɛmi ji 135,000. Se kɛ̃ ɔ, Yehowa de Gideon ke: ‘O ta hwuli ɔmɛ a he hiɛ tsɔ.’ Mɛni heje Yehowa de ja?

Ke Israel ye kunimi ngɛ ta a mi ɔ, a ma susu kaa mɛ nitsɛmɛ a he wami nya nɛ a ye kunimi ngɛ. A ma susu hu kaa Yehowa yemi kɛ buami he hia we mɛ. Enɛ ɔ he ɔ, Yehowa de Gideon ke: ‘Ha nihi nɛ ngɛ gbeye yee ɔ tsuo nɛ a ho we mi ya.’ Benɛ Gideon de mɛ ja a, ta hwuli 22,000 kpale kɛ ho we mi ya. Nɛ e piɛ nihi 10,000 pɛ ha lɛ nɛ́ a kɛ ta hwuli 135,000 ma ya kpe.

Gideon nɛ ngɛ e tabuli ɔmɛ kae

Se, bu tue! Yehowa de lɛ ke: ‘Kɛ̃ ɔ, o ni ɔmɛ a he hiɛ tsɔ.’ Lɔɔ he ɔ, E de Gideon kaa e ngɔ ta hwuli ɔmɛ kɛ ya pa nya nɛ a ya nu nyu, konɛ e ha nɛ nihi tsuo nɛ a maa ngɔ a nya kɛ bu nyu ɔ mi ɔ, a ho we mi ya. Yehowa wo lɛ si ke: ‘Ma ha o maa ye kunimi kɛ nimli 300 ɔmɛ nɛ benɛ a ngɛ nyu ɔ nue ɔ, a wo a yi nɔ ɔ.’

Ta hwumi be ɔ ba su. Gideon gba e ta hwuli ɔmɛ a mi kɛ wo kuuhi etɛ mi. E ha nɔ tsuaa nɔ bɛ, kɛ buɛ nɛ jatɛ ngɛ mi. Benɛ e su nyɔ mi ɔ, mɛ tsuo a ya bɔle a henyɛli ɔmɛ ngɛ a sito he ɔ. Kɛkɛ nɛ mɛ tsuo a kpa a bɛ ɔmɛ nɛ a ywia buɛ ɔmɛ si kake too, nɛ a kpa ngmlaa wawɛɛ ke: ‘Yehowa kɛ Gideon klaate!’ Benɛ henyɛli ɔmɛ te si ɔ, a tsui po nɛ a juɛmi futu. Mɛ tsuo a bɔni fo tumi, kɛkɛ nɛ Israelbi ɔmɛ ye a nɔ kunimi.

Manyadali yi 6 kɛ ya si 8.



Sane Bimihi

  • Mɛni heje Israelbi ɔmɛ sɛ haomi mi, nɛ ngɛ mɛni blɔ nɔ?
  • Mɛni heje Yehowa de Gideon kaa e tabuli ɔmɛ hiɛ tsɔ ɔ?
  • Tabuli enyɛmɛ piɛ benɛ Gideon de nihi nɛ ngɛ gbeye yee ɔ kaa a ho we mi ya a?
  • Hyɛ foni ɔ, konɛ o tsɔɔ nɔ́ nɛ Yehowa pee nɛ e kɛ je Gideon tabuli ɔmɛ a nɔ kɛ ba 300?
  • Kɛ Gideon to e tabuli 300 a he blɔ nya ha kɛɛ, nɛ mɛni blɔ nɔ Israel gu kɛ ye kunimi ngɛ ta a mi?

Sane bimi kpahi

  • Kane Manyadali 6:36-40.

    Mɛni Gideon pee kɛ ná nɔmi mami ngɛ Yehowa suɔmi nya ní peemi he?

    Mɛni wa peeɔ mwɔnɛ ɔ konɛ wa kɛ le Yehowa suɔmi nya ní? (Abɛ 2:3-6; Mat. 7:7-11; 2 Tim. 3:16, 17)

  • Kane Manyadali 7:1-25.

    Mɛni wa ma nyɛ maa kase kɛ je nimli 300 nɛ a hɛ ngɛ a he nɔ ɔ, kɛ ni nɛmɛ nɛ a hɛ be a he nɔ ɔ he? (Many. 7:3, 6; Rom. 13:11, 12; Efe. 5:15-17)

    Kaa bɔnɛ nyumuhi 300 hyɛ Gideon nɛ a kase lɛ ɔ, kɛ wɔ hu wa ma plɛ kɛ hyɛ Gideon Ngua a nɛ ji Yesu Kristo ɔ nɛ́ waa kase lɛ kɛɛ? (Many. 7:17; Mat. 11:29, 30; 28:19, 20; 1 Pet. 2:21)

    Mɛni blɔ nɔ Manyadali 7:21 maa ye bua wɔ ngɛ konɛ wa bua nɛ jɔ he saisaa nɛ a ha wɔ kaa wa sɔmɔ ngɛ ngɛ Yehowa asafo ɔ mi ɔ he? (1 Kor. 4:2; 12:14-18; Yak. 4:10)

  • Kane Manyadali 8:1-3.

    Mɛni wa ma nyɛ kase kɛ je bɔnɛ Gideon tsu pɛ nɛ te si ngɛ e kɛ Efraimbi ɔmɛ a kpɛti ɔ he ní ɔ mi ke e ba kaa waa kɛ wa nyɛmi ko ná sane ko? (Abɛ 15:1; Mat. 5:23, 24; Luka 9:48)