Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 51: Rut Kɛ Naomi

Ní kasemi 51: Rut Kɛ Naomi

KE O hyɛ Baiblo ɔ mi ɔ, o maa na womi ko nɛ a tsɛɛ ke Rut. E ji sane nɛ kɔ weku ko nɛ hi si benɛ nyadali nyɛɛ Israel ma a hɛ mi ɔ he. Rut ji yiheyo ko nɛ je Moab zugba a nɔ; e piɛɛ we Mawu ma nɛ ji Israel ɔ he. Se benɛ Rut kase anɔkuale Mawu nɛ ji Yehowa a he ní ɔ, e ba ná suɔmi nitsɛ kɛ ha lɛ. Naomi ji yo nɔkɔtɔma ko nɛ ye bua Rut nɛ e ba le Yehowa.

Naomi ji Israelyo. E kɛ e huno kɛ e binyumuhi enyɔ hia blɔ kɛ ho Moab zugba a nɔ ya akɛnɛ hwɔ ba Israel heje. Kɛkɛ nɛ ligbi ko ɔ, Naomi huno ɔ ba gbo. Pee se ɔ, Naomi binyumuhi enyɔ ɔmɛ ngɔ Moab yihi, nɛ́ a tsɛɛ mɛ Rut kɛ Orpa. Se maa pee jeha 10 se ɔ, Naomi binyumuhi enyɔ ɔmɛ hu ba gbo. Enɛ ɔ pee aywilɛho sane wawɛɛ kɛ ha Naomi kɛ yihewi enyɔ ɔmɛ! Kɛ Naomi maa pee kɛɛ?

Ligbi ko ɔ, Naomi pee e juɛmi kaa e maa kpale kɛ ho e ma mi ya. Rut kɛ Orpa suɔ kaa a kɛ lɛ maa hi si, heje ɔ, a nyɛɛ e se. Se benɛ a ngɛ blɔ nɔ kɛ yaa saii ɔ, Naomi plɛ nɛ e de yihewi ɔmɛ ke: ‘Nyɛɛ kpale kɛ ho nyɛ nyɛmɛ a ngɔ ya ngɛ we mi.’

Naomi fiɔ yihewi ɔmɛ a nya he nɛ e kɛ mɛ ye sɛ. Kɛkɛ nɛ a bɔni ya fomi ejakaa a suɔ Naomi saminya. A de lɛ ke: ‘Dɛbi! Waa kɛ mo maa ya o ma a mi.’ Se Naomi de mɛ ke: ‘Ye bimɛ, nyɛɛ kpale nyɛ se kɛ ho we mi ya. E maa hi ha nyɛ ngɛ nyɛ wehi a mi mohu pe ngɛ ye ngɔ.’ Kɛkɛ nɛ Orpa kpale e se kɛ pue we mi blɔ. Se Rut lɛɛ e kpale we.

Naomi plɛ nɛ e hyɛ Rut nɛ e de lɛ ke: ‘Orpa je o he. Mo hu kpale o se kɛ ya ná lɛ konɛ nyɛɛ ho.’ Se Rut ha lɛ heto ke: ‘Koo nyɛ ye nɔ kaa ma si mo! Ha nɛ i kɛ mo nɛ ho. He nɛ o maa ya a, ma ya, nɛ he nɛ o maa hi ɔ, lejɛ ɔ ma hi. O ma maa pee ye ma, nɛ o Mawu maa pee ye Mawu. He nɛ o ma gbo ngɛ ɔ, ma gbo ngɛ lejɛ ɔ, nɛ lejɛ ɔ nɔuu a maa pu mi ngɛ.’ Benɛ Rut de kikɛ ɔ, Naomi de we lɛ kaa e kpale e se hu.

Nyagbe mi ɔ, yihi enyɔ nɛ ɔmɛ ya su Israel. A ya je si himi ehe sisi. Amlɔ nɔuu Rut ya bɔni ní tsumi ngɛ ngmɔhi a nɔ, ejakaa e su ngma kpami be. Nyumu ko nɛ a tsɛɛ lɛ Boaz ha lɛ blɔ konɛ e kukuɔ ngma ngɛ e ngmɔ ɔ nɔ. Anɛ o le Boaz nyɛ lo? Lɛ ji Rahab, nɛ je Yeriko ɔ nɛ.

Ligbi ko ɔ, Boaz de Rut ke: ‘I nu o he, kɛ ní kpakpahi tsuo nɛ o pee kɛ ha Naomi ɔ. I le bɔnɛ o si o tsɛ kɛ o nyɛ, kɛ mo nitsɛ o ma mi nɛ́ o ba je nihi nɛ o li a kpɛti ha. Yehowa nɛ́ ye bua mo!’

Rut he nɔ ke: ‘Etsɛ, o je mi mi himi kpo ha mi nitsɛ. Nɛ o munyu ngɔngɔɛ nɛ o tu ɔ ha ye bua jɔ.’ Boaz suɔ Rut sane saminya, heje ɔ, e kɛ we tsɔ nɛ e kɛ lɛ sɛ gba si himi mi. Enɛ ɔ ha nɛ Naomi bua jɔ nitsɛ! Se benɛ Rut kɛ Boaz fɔ a kekle binyumu Obed ɔ, Naomi bua jɔmi ɔ pa kle po pe kekle ɔ. Pee se ɔ, Obed ba plɛ David nɛnɛ. Wa maa kase David he ní pee se.

Rut kɛ Naomi

Baiblo mi womi nɛ ji Rut 1-4.



Sane Bimihi

  • Kɛ ba kɛɛ nɛ Naomi ya je Moab zugba a nɔ?
  • Mɛnɔmɛ ji Rut kɛ Orpa?
  • Kɛ Rut kɛ Orpa pee a ní ha kɛɛ benɛ Naomi de mɛ ke a kpale kɛ ho a wehi a mi ya a?
  • Mɛnɔ ji Boaz, nɛ mɛni blɔ nɔ e ye bua Rut kɛ Naomi ngɛ?
  • Kɛ a tsɛɛ Boaz kɛ Rut binyumu ɔ kɛɛ, nɛ mɛni heje e hia kaa wa kai lɛ?

Sane bimi kpahi

  • Kane Rut 1:1-17.

    Mɛni munyu Rut tu nɛ tsɔɔ anɔkuale suɔmi nɛ e ngɛ kɛ ha Naomi? (Rut 1:16, 17)

    Mɛni blɔ nɔ Rut juɛmi nɛ e ngɛ ɔ tsɔɔ su nɛ “to kpa amɛ” hɛɛ ngɛ nihi nɛ a pɔ mɛ nu nɛ a ngɛ zugba a nɔ ɔ he mwɔnɛ ɔ? (Yoh. 10:16; Zak. 8:23)

  • Kane Rut 2:1-23.

    Mɛni blɔ nɔ Rut pee nɔhyɛ nɔ́ kpakpa kɛ ha yihewi mwɔnɛ ɔ? (Rut 2:17, 18; Abɛ 23:22; 31:15)

  • Kane Rut 3:5-13.

    Kɛ Boaz susu ngɛ bɔnɛ Rut kplɛɛ kaa e maa gba lɛ mohu pe niheyo ɔ he kɛɛ?

    Mɛni Rut su ɔ tsɔɔ wɔ ngɛ anɔkuale suɔmi he? (Rut 3:10; 1 Kor. 13:4, 5)

  • Kane Rut 4:7-17.

    Mɛni blɔ nɔ Kristofoli nyumuhi ma nyɛ maa kase Boaz mwɔnɛ ɔ? (Rut 4:9, 10; 1 Tim. 3:1, 12, 13; 5:8)