Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 50: Yihi Kãtsɛmɛ Enyɔ

Ní kasemi 50: Yihi Kãtsɛmɛ Enyɔ

BENƐ Israelbi ɔmɛ sɛ haomi mi ekohu ɔ, a fo kɛ tsɛ Yehowa. Yehowa he mɛ nɔ, nɛ e ha mɛ hɛ mi nyɛɛli kãtsɛmɛ, konɛ a ye bua mɛ. Baiblo ɔ tsɛɛ hɛ mi nyɛɛli nɛ ɔmɛ ke nyadali. Yoshua ji Israel ma a nyadalɔ nɛ sɛ hlami, nɛ ma nyadali kpahi komɛ hu nɛ ba hi si ngɛ e se ji, Otniel, Ehud kɛ Shamgar. Se nihi nɛ ye bua Israel ɔ, a kpɛti nihi enyɔ ji yihi, nɛ a tsɛɛ mɛ ke Debora kɛ Yael.

Debora nɛ e kɛ Barak ngɛ munyu tue

Gbalɔyo ji Debora. Yehowa deɔ lɛ níhi nɛ maa ba hwɔɔ se, nɛ lɛ hu e deɔ mabi ɔmɛ. Debora ji kojolɔ hulɔ. E pɔɔ si himi ngɛ tã ko sisi ngɛ ma ko nɛ ngɛ yoku ɔmɛ a nɔ ɔ mi, nɛ nihi baa e ngɔ nɛ e yeɔ kɛ buaa mɛ.

Jamɛ a be ɔ mi ɔ, Yabin ji Kanaan matsɛ. E ngɛ ta hwiliihi 900. Akɛnɛ e ta hwuli ɔmɛ a he wa saminya heje ɔ, e ha Israelbi ɔmɛ ba pee e sɔmɔli pani nya. A tsɛɛ Matsɛ Yabin tatsɛ ɔ ke, Sisera.

Ligbi ko ɔ, Debora tsɔ nɛ a ya tsɛ Nyadalɔ Barak kɛ ba e ngɔ, nɛ e de lɛ ke: ‘Yehowa de ke: “Ngɔɔ nyumuhi 10,000 nɛ o nyɛɛ a hɛ mi kɛ ya Tabor Yoku ɔ nɔ. Ma ngɔ Sisera kɛ wo o dɛ ngɛ lejɛ ɔ. Nɛ ma ha o ye e kɛ e ta hwuli ɔmɛ a nɔ kunimi.”’

Barak de Debora ke: ‘Ke o kɛ mi maa ya a, lɛɛ ma ya.’ Debora kplɛɛ nɔ kaa e maa ya, se e de Barak ke: ‘A be kunimi nɛ o maa ye ɔ mi hɛ mi nyami ɔ ngɔe kɛ ha mo, ejakaa Yehowa maa ngɔ Sisera kɛ wo yo dɛ mi.’ Nɛ enɛ ɔ ba mi jã pɛpɛɛpɛ.

Barak kple Tabor Yoku ɔ konɛ e kɛ Sisera ta hwuli ɔmɛ nɛ ya kpe. Tlukaa a, Yehowa ha nyu afua ko ba, nɛ e ba muɔɔ ta hwuli henyɛli ɔmɛ babauu kɛ ho. Se Sisera lɛɛ e kple si ngɛ e ta hwilii ɔ nɔ nɛ e tu fo.

Barak, Yael, kɛ Sisera

Pee se ɔ, Sisera ba su Yael bo tsu ɔ nya. Yael tsɛ lɛ kɛ ba sɛ e tsu ɔ mi, nɛ e ha lɛ nyɔ nyu nɛ e nu. Nyɔ nyu ɔ ha mahe de lɛ, nɛ e kɛ we tsɔ nɛ e hwɔ mahe. Kɛkɛ nɛ Yael ya ngɔ bo tsu plɛɛko nɛ e ba ka kɛ wo Sisera yi mi. Benɛ Barak ba su lejɛ ɔ, Yael tsɔɔ lɛ Sisera gbogboe! Lɔɔ he ɔ, tse o na kaa nɔ́ nɛ Debora de ɔ ba mi.

Nyagbe mi ɔ, a gbe Matsɛ Yabin hu, nɛ Israelbi ɔmɛ ná tue mi jɔmi ekohu.

Manyadali 2:14-22; 4:1-24; 5:1-31.



Sane Bimihi

  • Mɛnɔmɛ ji nyadali, nɛ kɛ a tsɛɛ a ti ni komɛ kɛɛ?
  • Mɛni he blɔ nɛ́ ngɛ slɔɔto Debora ngɛ, nɛ mɛni enɛ ɔ ha nɛ e tsu?
  • Benɛ Matsɛ Yabin kɛ e tatsɛ Sisera wo Israel he gbeye ɔ, mɛni sɛgbi Yehowa kɛ ha Debora nɛ e de Nyadalɔ Barak, nɛ mɛnɔ e tsɔɔ kaa e maa ngɔ anunyami ɔ?
  • Mɛni blɔ nɔ Yael tsɔɔ ngɛ kaa e ji yo kãtsɛ?
  • Mɛni ba ngɛ Matsɛ Yabin gbenɔ se?

Sane bimi kpahi

  • Kane Manyadali 2:14-22.

    Mɛni Israelbi ɔmɛ pee nɛ e ha Yehowa mi mi fu mɛ, nɛ mɛni wa ma nyɛ maa kase kɛ je mi? (Many. 2:20; Abɛ 3:1, 2; Ezek. 18:21-23)

  • Kane Manyadali 4:1-24.

    Mɛni Kristofoli yihi ma nyɛ maa kase ngɛ Debora kɛ Yael nɔhyɛ nɔ́ ɔ mi mwɔnɛ ɔ? (Many. 4:4, 8, 9, 14, 21, 22; Abɛ 31:30; 1 Kor. 16:13)

  • Kane Manyadali 5:1-31.

    Mɛni blɔ nɔ wa ma nyɛ maa ngɔ kunimi yemi la nɛ Barak kɛ Debora la a kɛ tsu ní kaa sɔlemi kɛ kɔ Harmagedon ta a nɛ ma a he? (Many. 5:3, 31; 1 Kron. 16:8-10; Kpoj. 7:9, 10; 16:16; 19:19-21)