Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 49: Pu ɔ Da Si

Ní kasemi 49: Pu ɔ Da Si

HYƐ Yoshua. E ngɛ dee ke: ‘Pu, da si!’ Kɛkɛ nɛ pu ɔ da si. Pu ɔ da si ngɛ hiɔwe ligbi ɔ tsuo. Yehowa ji nɔ nɛ ha e ba mi jã nɛ! Se ha nɛ waa hyɛ yi mi tomi heje nɛ Yoshua ngɛ hlae kaa pu ɔ nɛ hi tsoe kpamisa a.

Pu ɔ

Benɛ Kanaan zugba a nɔ matsɛmɛ enuɔ ɔmɛ je ta kɛ wo Gibeonbi ɔmɛ ɔ, Gibeonbi ɔmɛ tsɔ nɔ kɛ fo kɛ ya tsɛ Yoshua konɛ e ba ye bua mɛ. Tsɔlɔ ɔ ya de Yoshua ke: ‘Ba esɔesɔ nɛ o ba kpɔ wɔ! Matsɛmɛ ɔmɛ tsuo nɛ ngɛ yoku ɔmɛ a nɔ ɔ ba nɛ́ a kɛ wɔ ba hwu ta.’

Amlɔ nɛ Yoshua kɛ e tabuli ɔmɛ tsuo pue nɔ kɛ ho. A nyɛɛ nyɔnyɔɔnyɔ. Nɛ benɛ a ya su Gibeon ɔ, matsɛmɛ enuɔ ɔmɛ a ta hwuli ɔmɛ a tsui po nɛ a bɔni fo tumi. Kɛkɛ nɛ Yehowa ha aisi tɛ nguahi nɛ kɛ je hiɔwe, nɛ e gbe ta hwuli ɔmɛ babauu po pe nihi nɛ Yoshua webi ɔmɛ gbe ɔ.

Yoshua

Yoshua na kaa e be kɛe nɛ pu ɔ maa nɔ si. Nɛ diblii maa wo, kɛkɛ ɔ, matsɛmɛ enuɔ ɔmɛ a ta hwuli ɔmɛ maa tu fo. Enɛ ɔ heje nɛ Yoshua sɔle ha Yehowa nɛ e de ke: ‘Pu, da si!’ ɔ nɛ. Nɛ akɛnɛ pu ɔ da si be kɛkɛɛ heje ɔ, Israelbi ɔmɛ nyɛ nɛ a ye kunimi ngɛ ta a mi.

Matsɛmɛ yayamihi fuu ngɛ Kanaan zugba a nɔ nɛ́ sume Mawu webi ɔmɛ a sane. Yoshua kɛ e ta hwuli ɔmɛ ngɔ jeha ekpa kɛ ye matsɛmɛ 31 nɔ kunimi ngɛ zugba a nɔ. Enɛ ɔ se ɔ, Yoshua ha nɛ a gba Kanaan zugba a ngɔ ha wɛtsohi nɛ ná we zugba a eko lolo ɔ.

Jehahi babauu ba be, nɛ nyagbe ɔ Yoshua gbo benɛ e ye jeha 110. Be abɔ tsuo nɛ Yoshua kɛ e huɛmɛ ɔmɛ hi si ɔ, mabi ɔmɛ bu Yehowa tue. Se benɛ nimli kpakpa nɛ ɔmɛ tsuo gbo ta a, mabi ɔmɛ kpale bɔni ní yayamihi peemi ekohu nɛ enɛ ɔ ngɔ haomi kɛ ba a nɔ. Lɔɔ ha Mawu dɛ mi yemi kɛ buami he ba hia mɛ nitsɛnitsɛ.

Yoshua 10:6-15; 12:7-24; 14:1-5; Manyadali 2:8-13.



Sane Bimihi

  • Mɛni Yoshua ngɛ dee ngɛ foni ɔ mi, nɛ mɛni heje?
  • Mɛni blɔ nɔ Yehowa gu kɛ ye bua Yoshua kɛ e tabuli ɔmɛ?
  • Matsɛmɛ nɛ ji Israel henyɛli enyɛmɛ Yoshua ye a nɔ kunimi, nɛ jeha enyɛmɛ e ngɔ?
  • Mɛni heje Yoshua gba Kanaan zugba a?
  • Jeha enyɛmɛ Yoshua ye loko e gbo, nɛ e gbenɔ se ɔ, mɛni mabi ɔmɛ pee?

Sane bimi kpahi

  • Kane Yoshua 10:6-15.

    Mɛni he kɛ nɔ fɔmi pu kɛ nyɔhiɔ nɛ́ Yehowa ha a da si ha Israelbi ɔmɛ haa wɔ mwɔnɛ ɔ? (Yosh. 10:8, 10, 12, 13; La 18:3; Abɛ 18:10)

  • Kane Yoshua 12:7-24.

    Mɛnɔ ji nɔ tutuutu nɛ ha Israelbi ɔmɛ ye Kanaan matsɛmɛ 31 nɔ kunimi ɔ, nɛ mɛni heje enɛ ɔ sa kadimi mwɔnɛ ɔ? (Yosh. 12:7; 24:11-13; 5 Mose 31:8; Luka 21:9, 25-28)

  • Kane Yoshua 14:1-5.

    Mɛni blɔ nɔ a gu kɛ gba zugba a ngɔ ha Israel wɛtso ɔmɛ, nɛ mɛni enɛ ɔ tsɔɔ wɔ ngɛ weto ní nɛ wa ma ná ngɛ paradeiso ɔ mi he? (Yosh. 14:2; Yes. 65:21; Ezek. 47:21-23; 1 Kor. 14:33)

  • Kane Manyadali 2:8-13.

    Mɛnɔmɛ ngɛ hemi kɛ yemi kuami nya tsie mwɔnɛ ɔ, kaa bɔnɛ Yoshua pee ngɛ Israel? (Many. 2:8, 10, 11; Mat. 24:45-47; 2 Tes. 2:3-6; Tito 1:7-9; Kpoj. 1:1; 2:1, 2)