Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 46: Yeriko Gbogbo ɔ

Ní kasemi 46: Yeriko Gbogbo ɔ

MƐNI ha Yeriko gbogbo ɔ ngɛ kue kɛ ngɛ si puee ɔ? E pee kaa nɔ́ nɛ a fia oplɛmi ngua ko kɛ ná lɛ. Se oplɛmihi be jamɛ a be ɔ mi; a be tuhi po. Enɛ ɔ ji nyakpɛ nɔ́ kpa nɛ Yehowa pee! Ha nɛ waa hyɛ bɔnɛ e ba ha.

Yeriko gbogbo ɔ nɛ ngɛ hulee

Nɔ́ nɛ Yehowa de Yoshua ji nɛ ɔ nɛ: ‘O kɛ o tabuli ɔmɛ nɛ́ nyɛɛ kɛ bɔle ma a. Nyɛɛ bɔle ma a ligbi ekpa, si kake daa ligbi. Nyɛɛ tloo somi daka a kɛ nyɛɛ. Osɔfohi kpaago nɛ́ a kpa a bɛ ɔmɛ kɛ nyɛɛ hɛ mi.

‘Ligbi kpaagone ɔ, nyɛɛ bɔle ma a si kpaago. Lɔɔ se ɔ, nyɛ kpa bɛ ɔmɛ wawɛɛ, nɛ o ha nɔ tsuaa nɔ nɛ́ kpa ngmlaa kɛ he ose. Kɛkɛ ɔ, gbogbo ɔ maa hule kɛ pue si butuu!’

Yoshua kɛ mabi ɔmɛ pee bɔnɛ Yehowa de mɛ ɔ. Benɛ a ngɛ nyɛɛe kɛ ngɛ ma a bɔlee ɔ, nɔ tsuaa nɔ pee dii. Nɔ ko nɔ ko tui munyu si kake po. Bɛ ɔmɛ kɛ ni ɔmɛ a nane si pɛmi he pɛ nɛ a ngɛ nue. Yehowa webi ɔmɛ a henyɛli ɔmɛ a tsui maa po wawɛɛ nitsɛ. O na kpa tsutsu ɔ ngɛ saflɛ ɔ nya lo? Mɛnɔ saflɛ ji lɔɔ? Rahab pee nɔ́ nɛ slaali enyɔ ɔmɛ de lɛ kaa e pee ɔ. E wekuli tsuo piɛɛ e he ngɛ e we ɔ mi, nɛ a ngɛ nɔ́ nɛ ngɛ nɔ yae ɔ hyɛe.

Yoshua

Nyagbe ɔ, ligbi kpaago ɔ ba su, nɛ benɛ a bɔle ma a si kpaago ɔ, a kpa bɛ ɔmɛ, nɛ tabuli ɔmɛ kpa ngmlaa kɛ he ose, kɛkɛ nɛ ma a gbogbo ɔ hule kɛ pue si. Yoshua de mɛ ke: ‘Nyɛɛ gbe nɔ tsuaa nɔ ngɛ ma a mi, nɛ́ nyɛɛ ngɔ la kɛ sã ma a. Nyɛɛ sã nɔ́ tsuaa nɔ́. Se sika hiɔ, sika tsu, akɔblee kɛ dade ní ɔmɛ lɛɛ nyɛɛ muɔɔ mɛ kɛ ba Yehowa níto he ɔ ngɛ bo tsu ɔ mi.’

Yoshua de slaali enyɔ ɔmɛ ke: ‘Nyɛɛ ya Rahab we ɔ mi, nɛ́ nyɛ ya ngɔ lɛ kɛ e wekuli tsuo kɛ ba.’ A baa Rahab kɛ e weku ɔ tsuo yi, kaa bɔnɛ slaali ɔmɛ wo lɛ si kaa a maa pee ɔ.

Yoshua 6:1-25.



Sane Bimihi

  • Mɛni Yehowa de tabuli ɔmɛ kɛ osɔfo ɔmɛ kaa a pee ligbi ekpa?
  • Mɛni e sa kaa nyumu ɔmɛ nɛ a pee ngɛ ligbi kpaago ɔ nɔ?
  • Kaa bɔnɛ o na ngɛ foni ɔ mi ɔ, kɛ Yeriko gbogbo ɔ ngɛ pee kɛɛ?
  • Mɛni heje kpa tsutsu kpla si ngɛ saflɛ ɔ nya?
  • Mɛni Yoshua de tabuli ɔmɛ kaa a pee mabi ɔmɛ kɛ ma a, se sika tsu, sika hiɔ, akɔblee kɛ dade ní ɔmɛ lɛɛ mɛni e de mɛ ke a pee a he?
  • Mɛni Yoshua de slaali enyɔ ɔmɛ nɛ a pee?

Sane bimi kpahi

  • Kane Yoshua 6:1-25.

    Mɛni blɔ nɔ Israelbi ɔmɛ a nyɛɛmi nɛ a nyɛɛ ngɛ ligbi kpaago ɔ nɔ kɛ bɔle Yeriko ma a kɛ Yehowa Odasefoli a fiɛɛmi nítsumi ɔ sɔ mwɔnɛ ɔ? (Yosh. 6:15, 16; Yes. 60:22; Mat. 24:14; 1 Kor. 9:16)

    Kɛ gbami nɛ ngɛ Yoshua 6:26 ba mi ngɛ jeha 500 se ha kɛɛ, nɛ mɛni enɛ ɔ tsɔɔ wɔ ngɛ munyu nɛ Yehowa tuɔ ɔ he? (1 Ma. 16:34; Yes. 55:11)