Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 41: Akɔblee Sinɔ ɔ

Ní kasemi 41: Akɔblee Sinɔ ɔ
Mose kɛ akɔblee sinɔ ɔ

ANƐ sinɔ nitsɛ lɛ kpla tso ɔ he ɔ lo? Pi sinɔ nitsɛ. Akɔblee nɛ a kɛ pee. Yehowa de Mose kaa e ngɔ kɛ kpla tso ɔ he ha ma a nɛ́ a hyɛ, konɛ a ná wami. Se sinɔ kpa amɛ nɛ a ngɛ zugba a ji sinɔ nitsɛhi. Sinɔ kpa amɛ kɔɔ ni ɔmɛ nɛ a nu hiɔ. O le nɔ́ heje lo?

Nɔ́ heje ji kaa, Israelbi ɔmɛ tu munyu kɛ si Mawu kɛ Mose. A de ke: ‘Mɛni heje nɛ nyɛ kpaka wɔ kɛ je Mizraim kɛ ba nga nɛ ɔ nɔ nɛ wa ba gbo? Niye ní loo nyu ko be hiɛ ɔ. Nɛ mana nɛ ɔ lɛɛ wa be nyɛe maa ye hu.’

Se kɛ̃ ɔ, mana a ji niye ní kpakpa. Yehowa gu nyakpɛ blɔ nɔ nɛ e ngɔ mana a kɛ ha mɛ. Nɛ e gu nyakpɛ blɔ nɔ kɛ ha mɛ nyu hulɔ. Se mabi ɔmɛ nɛ́ Yehowa si ngɛ bɔnɛ e hyɛ a nɔ ha a he. Lɔɔ heje ɔ, Yehowa gu sinɔhi nɛ a duɔ nya wa nɔ kɛ gbla Israelbi ɔmɛ a tue. Sinɔ ɔmɛ kɔɔ mɛ, nɛ a ti nihi babauu gbo.

Israelbi ɔmɛ nɛ sinɔhi ngɛ mɛ kɔe

Nyagbe ɔ, mabi ɔmɛ ba Mose ngɔ nɛ a ba de lɛ ke: ‘Wa pee yayami kaa wa tu munyu kɛ si mo kɛ Yehowa. Mo kpa Yehowa pɛɛ nɛ e je sinɔ nɛ ɔmɛ kɛ je wa kpɛti.’

Enɛ ɔ he ɔ, Mose kpa pɛɛ ha mabi ɔmɛ. Nɛ Yehowa de Mose kaa e pee akɔblee sinɔ nɛ ɔ. E de lɛ ke e kɛ kpla si ngɛ tso he, konɛ ke sinɔ kɔ a ti nɔ ko ɔ, e hyɛ akɔblee sinɔ ɔ. Mose pee bɔnɛ Mawu de lɛ ɔ pɛpɛɛpɛ. Nɛ nihi nɛ́ sinɔ kɔ mɛ ɔ hyɛ akɔblee sinɔ ɔ nɛ a ná he wami ekohu.

Ní kasemi ngɛ sane nɛ ɔ mi kɛ ha wɔ. Ngɛ blɔ ko nɔ ɔ, wɔ tsuo wa ngɛ kaa Israelbi nɛ sinɔ ɔmɛ kɔɔ mɛ ɔ. Wɔ tsuo wa ngɛ gboe. Ke o hyɛ o he kɛ kpe ɔ, o maa na kaa nihi bwɔɔ, a nuɔ hiɔ, nɛ a gboɔ. Nɔ́ nɛ ha e ba ja ji kaa, kekleekle nimli, nɛ ji Adam kɛ Hawa kua Yehowa, nɛ a bimɛ ji wɔ tsuo. Se Yehowa to blɔ nya konɛ wa nyɛ nɛ́ waa hi si kɛ ya neneene.

Yehowa tsɔ e Bi Yesu Kristo kɛ ba zugba a nɔ. A sɛu Yesu ngɛ tso nɔ, ejakaa nihi babauu susu kaa nɔmlɔ yayami ji lɛ. Se Yehowa tsɔ Yesu konɛ e ba kpɔ wɔ. Ke wa he lɛ ye, nɛ wa nyɛɛ e se ɔ, wa ma ná neneene wami. Se pee se ɔ, wa maa kase enɛ ɔ he ní fuu.

4 Mose 21:4-9; Yohane 3:14, 15.



Sane Bimihi

  • Mɛni kpla tso ɔ he ngɛ foni ɔ mi ɔ, nɛ mɛni heje Yehowa de Mose kaa e kɛ kpla tso ɔ he?
  • Mɛni mabi ɔmɛ pee nɛ́ tsɔɔ kaa a be hɛsa ngɛ níhi tsuo nɛ Yehowa pee ha mɛ ɔ he?
  • Mɛni ni ɔmɛ de Mose ke e pee ha mɛ benɛ Yehowa ha sinɔ duɔtsɛmɛ ba kɔɔ mɛ ɔ?
  • Mɛni heje Yehowa de Mose ke e pee akɔblee sinɔ ɔ?
  • Mɛni wa ma nyɛ maa kase ngɛ sane nɛ ɔ mi?

Sane bimi kpahi

  • Kane 4 Mose 21:4-9.

    Munyu nɛ Israelbi ɔmɛ tu kɛ si blɔ nya nɛ Yehowa to ha mɛ ɔ peeɔ mɛni kɔkɔ bɔmi kɛ haa wɔ? (4 Mose 21:5, 6; Rom. 2:4)

    Jeha komɛ a se ɔ, mɛni blɔ nɔ Israelbi ɔmɛ ngɔ akɔblee sinɔ ɔ kɛ tsu ní, nɛ mɛni Matsɛ Hezekia pee ngɛ he? (4 Mose 21:9; 2 Ma. 18:1-4)

  • Kane Yohane 3:14, 15.

    Mɛni blɔ nɔ akɔblee sinɔ ɔ nɛ a kɛ kpla tso ɔ he ɔ pee Yesu Kristo sɛumi he foni? (Gal. 3:13; 1 Pet. 2:24)