Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 40: Mose Ngɔ E Tso ɔ kɛ Fia Tɛsa

Ní kasemi 40: Mose Ngɔ E Tso ɔ kɛ Fia Tɛsa

JEHAHI babauu ba be—Jeha 10, jeha 20, jeha 30, jeha 39! Nɛ Israelbi ɔmɛ ngɛ nga kplanaa a nɔ kpamisa. Se, Yehowa hyɛ a nɔ ngɛ jeha nɛ ɔmɛ tsuo mi. E ngɔ mana kɛ lɛ mɛ. E kɛ bɔku titima nyɛɛ a hɛ mi piani, nɛ e kɛ la titima nyɛɛ a hɛ mi nyɔ mi. A tadehi gba we, nɛ a nanehi hu fuu we ngɛ jeha abɔ nɛ ɔmɛ tsuo mi.

Kɛ je benɛ a je Mizraim ɔ, amlɔ nɛ ɔ ji jeha nyingmi eywiɛne ɔ we kekle nyɔhiɔ ɔ. Israelbi ɔmɛ ba to si ngɛ Kadesh ekohu. Hiɛ ɔ lɛ a ngɛ loko a tsɔ slaali 12 ɔmɛ kɛ ya slaa Kanaan zugba a maa pee jeha 40 mi ji nɛ ɔ nɛ. Mose nyɛmiyo Miriam gbo ngɛ Kadesh. Nɛ haomi ba ngɛ hiɛ ɔ ekohu.

Ni ɔmɛ nɛ́ nyu nɛ a nu. Enɛ ɔ heje ɔ, a tu munyu kɛ si Mose ke: ‘Wa ná nɛ wa gbo mohu. Mɛni heje o kpaka wɔ kɛ je Mizraim kɛ ba zugba yaya nɛ niye ní ko be nɔ nɛ ɔ nɔ? Blɛfo be ɔ, ngmɔkɔ hu be; nɛ wai yiblii loo akutu ko hu be. Nyu nunui kɛkɛ hu be hiɛ ɔ.’

Mose nɛ e kɛ tso ɔ ngɛ tɛsa a fiae

Benɛ Mose kɛ Aaron ya kpe he bo tsu ɔ nya nɛ a ya sɔle ɔ, Yehowa de Mose ke: ‘Nyɛ bua ma a nya ngɛ he kake. Lɔɔ se ɔ, moo tu munyu kɛ tsɔɔ tɛsa a nɛ ngɛ lejɛ ɔ, ngɛ mɛ tsuo a hɛ mi. Nyu maa je tɛsa a mi kɛ ha ma a kɛ a lohwe ɔmɛ nɛ a nu.’

Lɔɔ he ɔ, Mose bua mabi ɔmɛ a nya, nɛ e de mɛ ke: ‘Nyɛɛ bu tue, nyɛ nihi nɛ nyɛ be hemi kɛ yemi ngɛ Mawu mi! Anɛ i kɛ Aaron ma je nyu kɛ je tɛsa nɛ ɔ mi kɛ ha nyɛ lo?’ Kɛkɛ nɛ Mose ngɔ e tso ɔ kɛ fia tɛsa a si enyɔ, nɛ nyu babauu kaa pa je mi kɛ pue si. Nimli ɔmɛ kɛ a lohwe ɔmɛ tsuo na nyu nɛ a nu.

Se Yehowa mi mi fu Mose kɛ Aaron. Mɛni heje? Ejakaa Mose kɛ Aaron de ke ji nihi nɛ ma ha nɛ nyu ɔ maa je tɛsa a mi kɛ ba. Se ngɛ anɔkuale mi ɔ, Yehowa lɛ ha nɛ nyu ɔ je tɛsa a mi kɛ ba a nɛ. Se akɛnɛ Mose kɛ Aaron tui mabi ɔmɛ anɔkuale heje ɔ, Yehowa de mɛ kaa e maa gbla a tue. E de mɛ ke: ‘Nyɛ be ye ma a hɛ mi nyɛɛe kɛ ya Kanaan zugba a nɔ hu.’

E kɛ we tsɔ̃ nɛ Israelbi ɔmɛ je Kadesh. Be bɔɔ se ɔ, a ya su Hor Yoku ɔ he. Yoku nɛ ɔ nɔ nɛ Aaron gbo ngɛ. E ye jeha 123 loko e gbo. Israel ma a ye aywilɛho, nɛ a fo Aaron he ya ligbi 30. Aaron bi Eleazar ba ye osɔfo nɔkɔtɔma ha Israel ma a.

4 Mose 20:1-13, 22-29; 5 Mose 29:5; Nehemia 9:21.



Sane Bimihi

  • Mɛni blɔ nɔ Yehowa hyɛ Israelbi ɔmɛ a nɔ benɛ a ngɛ nga a nɔ ɔ?
  • Mɛni he munyu Israelbi ɔmɛ tu benɛ a ya to si ngɛ Kadesh ɔ?
  • Mɛni blɔ nɔ Yehowa gu kɛ ha nimli ɔmɛ kɛ a lohwe ɔmɛ nyu?
  • Mɛnɔ ji nyumu ɔ nɛ ngɔ e nine kɛ pi e gugue nɔ ngɛ foni ɔ mi ɔ, nɛ mɛni heje e pee ja?
  • Mɛni heje Yehowa mi mi fu Mose kɛ Aaron, nɛ mɛni ji tue gblami nɛ a ná?
  • Mɛni ba ngɛ Hor Yoku ɔ nɔ, nɛ mɛnɔ ba ye osɔfo nɔkɔtɔma ha Israel ma a?

Sane bimi kpahi

  • Kane 4 Mose 20:1-13, 22-29 kɛ 5 Mose 29:5.

    Mɛni wa ma nyɛ maa kase kɛ je bɔnɛ Yehowa kɛ Israelbi ɔmɛ hi si ngɛ nga a nɔ ɔ mi? (5 Mose 29:5; Mat. 6:31; Heb. 13:5; Yak. 1:17)

    Kɛ ji bɔnɛ Yehowa na anunyami nɛ Mose kɛ Aaron kɛ ha we lɛ ngɛ Israelbi ɔmɛ a hɛ mi ɔ kɛɛ? (4 Mose 20:12; 1 Kor. 10:12; Kpo. 4:11)

    Mɛni wa ma nyɛ maa kase kɛ je bɔnɛ Mose pee e ní ha ngɛ tsɔsemi nɛ Yehowa kɛ ha lɛ ɔ mi? (4 Mose 12:3; 20:12, 27, 28; 5 Mose 32:4; Heb. 12:7-11)