Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 38: Slaali 12 Ɔmɛ

Ní kasemi 38: Slaali 12 Ɔmɛ
Israelbi slaali ɔmɛ nɛ a tloo tso yiblii

MOO hyɛ tso yiblii nɛ nyumu ɔmɛ hɛɛ ɔ. Hyɛ bɔnɛ wai yiblii kɛ sau ɔ kle ha. Ni enyɔ nɛ a hɛɛ lɛ ngɛ tso he. Nɛ hyɛ ngmɔkɔ ɔ kɛ tso yiblii ko kaa akutu ɔ hu ha. Jije a ya ngɔ tso yiblii nɛ ngɛ akɔnɔ kikɛ kɛ je? A kɛ je Kanaan zugba a nɔ. Mo kai kaa Kanaan ji he nɛ Abraham, Isak, kɛ Yakob hi. Se hwɔ nɛ ba zugba a nɔ ɔ ha Yakob kɛ e weku ɔ hia kɛ ba Mizraim. Jehanɛ ɔ, maa pee jeha 216 se ɔ, Mose nyɛɛ Israelbi ɔmɛ a hɛ mi kɛ kpale kɛ yaa Kanaan. A ba su he ko ngɛ nga a nɔ nɛ a tsɛɛ ke Kadesh.

Nimli yayamihi ngɛ Kanaan zugba a nɔ. Lɔɔ he ɔ, Mose tsɔ nyumuhi 12 kaa a ya slaa ma a, nɛ e de mɛ ke: ‘Nyɛɛ hyɛ nimli ɔmɛ a he hiɛmi ngɛ ma a mi, nɛ nyɛɛ hyɛ keji a he wa loo a he wɛ. Nyɛɛ hyɛ kaa zugba a baa ní loo e bɛ ní. Nɛ nyɛɛ bɔ mɔde konɛ nyɛɛ ngɔ zugba a nɔ tso yiblii ɔ eko kɛ ba.’

Benɛ slaali ɔmɛ kpale kɛ ba Kadesh ɔ, a ba de Mose ke: ‘Wa na kaa zugba a ji zugba kpakpa nɛ baa ní.’ A ngɔ zugba a nɔ tso yiblii ɔ ekomɛ kɛ tsɔɔ Mose kaa odase nɛ tsɔɔ kaa zugba a hi. Se, slaali ɔmɛ a kpɛti nihi 10 de ke: ‘Mabi ɔmɛ ji nimli oblaihi nɛ a he wa. Ke wa ka kaa wa maa ngɔ zugba a, a maa gbe wɔ.’

Israelbi ɔmɛ a tsui po benɛ a nu amaniɛ bɔmi nɛ ɔ. A de ke: ‘Afani nɛ wa gbo ngɛ Mizraim zugba a nɔ loo ngɛ nga a nɔ hiɛ ɔ mohu, pe nɛ́ a maa gbe wɔ ngɛ ta mi, nɛ́ a maa ngɔ wa yihi kɛ wa bimɛ nyɔguɛhi. Nyɛ ha nɛ́ waa hla wa nyatsɛ kpa kɛ da Mose nane mi nɛ́ waa kpale kɛ ho Mizraim ya!’

Se slaali ɔmɛ a kpɛti ni enyɔ ngɛ hemi kɛ yemi ngɛ Yehowa mi, lɔɔ he ɔ, a bɔ mɔde kaa a maa jɔɔ mabi ɔmɛ a tsui he. A tsɛɛ mɛ Yoshua kɛ Kaleb. A de mabi ɔmɛ ke: ‘Nyɛ ko ye gbeye. Yehowa ngɛ wa se. Zugba a ngɔmi be yee ha wɔ kulaa.’ Se ni ɔmɛ bui mɛ tue. A ka Yoshua kɛ Kaleb gbemi po.

Enɛ ɔ ha nɛ Yehowa mi mi fu wawɛɛ, nɛ e de Mose ke: ‘Nihi tsuo nɛ ye kɛ je jeha 20 kɛ yaa, a ti nɔ ko nɔ ko be Kanaan zugba a nɔ yae. A na okadihi nɛ i pee ngɛ Mizraim kɛ nga a nɔ, se kɛ̃ ɔ, a ná we hemi kɛ yemi ngɛ ye mi. Enɛ ɔ he ɔ, a maa nyɛɛ ngɛ nga a nɔ jeha 40 kɛ ya si be nɛ a nyagbe nɔ ɔ ma gbo. Yoshua kɛ Kaleb pɛ nɛ a maa ya Kanaan zugba a nɔ.’

4 Mose 13:1-33; 14:1-38.



Sane Bimihi

  • Mɛni o yo ngɛ wai kɛ sau nɛ́ ngɛ foni ɔ mi ɔ he, nɛ jije a kɛ je?
  • Mɛni heje Mose tsɔ slaali 12 ɔmɛ kɛ ya Kanaan zugba a nɔ ɔ?
  • Mɛni amaniɛ bɔmi slaali nyɔngma ngɔ kɛ ba ha Mose?
  • Mɛni blɔ nɔ slaali enyɔ je he kɛ nɔ fɔmi nɛ a ngɛ ngɛ Yehowa mi ɔ kpo, nɛ kɛ a tsɛɛ mɛ kɛɛ?
  • Mɛni heje Yehowa mi mi fu, nɛ mɛni e de Mose?

Sane bimi kpahi

  • Kane 4 Mose 13:1-33.

    Mɛnɔmɛ a tsɔ nɛ a ya slaa Kanaan zugba a, nɛ mɛni ji he blɔ agbo nɛ enɛ ɔ ha mɛ? (4 Mose 13:2, 3, 18-20)

    Mɛni heje nɛ Yoshua kɛ Kaleb juɛmi je ekpa ngɛ slaali kpa amɛ a nɔ́ ɔ he ɔ, nɛ mɛni enɛ ɔ tsɔɔ wɔ? (4 Mose 13:28-30; Mat. 17:20; 2 Kor. 5:7)

  • Kane 4 Mose 14:1-38.

    Mɛni ji munyu huitihuiti tumi kɛ si Yehowa nane mi dali ngɛ zugba a nɔ ɔ he kɔkɔ bɔmi nɛ e sa kaa waa bu tue? (4 Mose 14:2, 3, 27; Mat. 25:40, 45; 1 Kor. 10:10)

    Mɛni blɔ nɔ 4 Mose 14:24 tsɔɔ ngɛ kaa Yehowa susuɔ e tsɔli a he kaa ni kakaaka? (1 Ma. 19:18; Abɛ 15:3)