Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 37: Bo Tsu kɛ ha Jami

Ní kasemi 37: Bo Tsu kɛ ha Jami

ANƐ o le tsu nɛ ɔ mi tso lo? E ji tsu klɛdɛɛ ko nɛ a ma konɛ a ja Yehowa ngɛ mi. A tsɛɛ lɛ kpe he bo tsu. Mabi ɔmɛ gbe tsu nɛ ɔ mami nya benɛ a je Mizraim ɔ jeha kake se. O le nɔ nɛ ha nɛ a ma bo tsu ɔ lo?

Kpe he bo tsu ɔ

Yehowa lɛ ha nɛ a ma tsu ɔ nɛ. Yehowa tsɔɔ Mose bɔnɛ a ma tsu ɔ ha benɛ e ya Sinai Yoku ɔ nɔ ɔ. E tsɔɔ lɛ kaa á ma tsu ɔ bɔnɛ a ma nyɛ maa gbɛ lɛ. Kɛkɛ ɔ, a ma nyɛ maa ngɔ kɛ ya he kpa, konɛ a ya ma ekohu. Lɔɔ he benɛ Israelbi ɔmɛ ngɛ nga a nɔ tsuo ɔ, a ngɔɔ bo tsu ɔ kɛ jee he kake kɛ yaa he kpa.

Ke o hyɛ tsu nyafii ɔ nɛ ngɛ bo tsu ɔ kɔ nya a mi ɔ, o maa na daka ko. A tsɛɛ lɛ somi daka. A pee sika tsu bɔfohi, nɛ ji kerubim enyɔ ngɛ daka a nɔ hiɛ kɛ hiɛ. Mawu ngma Mlaa Nyɔngma amɛ ekohu ngɛ tɛ tɛtlɛɛ enyɔ nɔ, ejakaa Mose ywia kekle tɛ ɔmɛ. A ngɔ tɛ nɛ ɔmɛ kɛ to somi daka a mi. A ngɔ mana nɛ́ a kɛ wo kplu mi hu kɛ to daka a mi. Anɛ o kai nɔ́ nɛ ji mana lo?

Yehowa hla Mose nyɛmi Aaron kɛ pee osɔfo nɔkɔtɔma. Lɛ ji nɔ nɛ nyɛɛɔ ma a hɛ mi kɛ jaa Yehowa. Nɛ e binyumu ɔmɛ hu sɔmɔɔ kaa osɔfohi ngɛ e sisi.

Jehanɛ ɔ, hyɛ bo tsu ɔ he nɛ kle pe kulaa a mi ha. E klemi ngɛ kaa tsu nyafii ɔ enyɔ nɛ a bla kake. O na daka a nɛ lasuku ngɛ mi jee ɔ lo? Enɛ ɔ ji latɛ nɛ osɔfo ɔmɛ sãa tsopa kɛ he via nɛ a tsɛɛ lɛ ohɛ́ ngɛ nɔ ɔ nɛ. Jehanɛ ɔ, kane tso nɛ kane kpaago maa si ngɛ nɔ hu ngɛ bo tsu ɔ mi. Nɔ́ etɛne nɛ ngɛ tsu ɔ mi ji okplɔɔ. A kɛ blodoo 12 pueɔ nɔ.

Ngɛ kpe he bo tsu ɔ kpo ɔ nɔ ɔ, o maa na kã ngua ko nɛ a yɛ nyu wo mi. Osɔfo ɔmɛ kɛ fɔɔ a he. Bɔ sami latɛ ngua ko hu ngɛ lejɛ ɔ. Hiɛ ɔ nɛ a sãa lohwehi nɛ a gbee mɛ ɔ ngɛ kaa afɔle kɛ haa Yehowa. Bo tsu ɔ ngɛ ma a sito he ɔ kpɛti tutuutu, nɛ Israelbi ɔmɛ ngɛ mɛ hu a bo tsuhi a mi kɛ bɔle lɛ.

2 Mose 25:8-40; 26:1-37; 27:1-8; 28:1; 30:1-10, 17-21; 34:1, 2; Hebribi 9:1-5.



Sane Bimihi

  • Kɛ a tsɛɛ tsu ɔ nɛ ngɛ foni ɔ mi ɔ kɛɛ, nɛ mɛni a peeɔ ngɛ mi?
  • Mɛni heje Yehowa de Mose ke e pee bo tsu ɔ bɔnɛ e gbɛmi be yee ɔ?
  • Mɛni daka lɛ ngɛ tsu nyafii ɔ nɛ ngɛ bo tsu ɔ kɔ nya a mi, nɛ mɛni ngɛ daka a mi?
  • Mɛnɔ Yehowa hla kaa e ye osɔfo nɔkɔtɔma, nɛ mɛni ji osɔfo nɔkɔtɔma a nítsumi?
  • Moo tsɔɔ níhi etɛ ɔmɛ nɛ ngɛ tsu ngua nɛ ngɛ bo tsu ɔ mi ɔ mi.
  • Mɛni níhi enyɔ nɛ ngɛ kpe he bo tsu ɔ kpo ɔ nɔ, nɛ mɛni a kɛ peeɔ?

Sane bimi kpahi

  • Kane 2 Mose 25:8-40; 26:1-37; 27:1-8; kɛ 28:1.

    Mɛni kerubim enyɔ nɛ ngɛ “somi daka” loo “odase yemi daka” a nɔ tsɔɔ? (2 Mose 25:20, 22; 4 Mose 7:89; 2 Ma. 19:15)

  • Kane 2 Mose 30:1-10, 17-21; 34:1, 2; kɛ Hebribi 9:1-5.

    Mɛni heje Yehowa ma bɔnɛ he tsɔmi he hia osɔfo ɔmɛ nɛ ngɛ sɔmɔe ngɛ kpe he bo tsu ɔ mi ɔ nɔ mi, nɛ mɛni enɛ ɔ biɔ nɛ waa pee mwɔnɛ ɔ? (2 Mose 30:18-21; 40:30, 31; Heb. 10:22)

    Mɛni blɔ nɔ bɔfo Paulo tsɔɔ ngɛ kaa kpe he bo tsu ɔ kɛ somi Mlaa ba nyagbe benɛ e ngma womi kɛ ya ha Hebri Kristofoli ɔmɛ ɔ? (Heb. 9:1, 9; 10:1)