Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 34: Niye Ní Ehe Ko

Ní kasemi 34: Niye Ní Ehe Ko

ANƐ o ma nyɛ maa tsɔɔ nɔ́ nɛ ni ɔmɛ ngɛ muɔɔe ngɛ zugba a lo? E ngɛ kaa ngo. E ngɛ futaa, nɛ e mi ti we nɛ e pupleeɔ. Se pi ngo hulɔ; e ji nɔ́ nɛ a yeɔ.

Israelbi ɔmɛ nɛ a ngɛ mana nya buae

Maa pee nyɔhiɔ kake pɛ ji nɛ ɔ, nɛ́ Israelbi ɔmɛ je Mizraim. A ngɛ nga kplanaa a nɔ. Niye ní bɔɔ pɛ lɛ ngɛ zugba nɛ ɔ nɔ, lɔɔ he ɔ Israelbi ɔmɛ tu munyu kɛ si Mawu ke: ‘Wa ná nɛ Yehowa gbe wɔ mohu ngɛ Mizraim zugba a nɔ. Ke e hí kulaa a, niye ní lɛɛ wa naa nɛ wa yeɔ bɔnɛ wa suɔ.’

Enɛ ɔ ha Yehowa de ke: ‘Ma ha niye ní maa nɛ kɛ je hiɔwe ngɔ pue si ha nyɛ.’ Yehowa pee enɛ ɔ pɛpɛɛpɛ. E nɔ jena benɛ Israelbi ɔmɛ na nɔ́ futafuta nɛ ɔ nɛ pueɔ si ɔ, a bɔni a sibi bimi ke, ‘Mɛni ji nɛ ɔ?’

Mose de mɛ ke: ‘Niye ní nɛ Yehowa ha nyɛ nɛ nyɛɛ ye ji nɛ ɔ nɛ.’ Mabi ɔmɛ wo lɛ biɛ ke MANA. E ngɔmi ngɛ kaa keeki nɛ a wo mi hwo.

Mose de ni ɔmɛ ke: ‘Nyɛɛ muɔɔ bɔnɛ e maa su nɔ kake yemi nya.’ A peeɔ enɛ ɔ daa mɔtu. Se ke pu ɔ nya wa pɛ kɛkɛ mana nɛ piɛ ngɛ zugba a tsuo sile.

Mose de mɛ kɛ piɛɛ he hu ke: ‘Nɔ ko nɔ ko nɛ́ ko ngɔ mana a eko kɛ to nɛ́ je nɛ na yi.’ Se ni ɔmɛ a ti ni komɛ bui nɔ́ nɛ Mose de mɛ ɔ tue. O le nɔ́ nɛ ba lo? E nɔ jena a, mana a nɛ́ a muɔɔ kɛ to si ɔ sa, nɛ e wo gɔgɔ, nɛ e ngɛ fu jee!

Otsi ɔ mi ligbi kake ko ngɛ nɛ Yehowa de mabi ɔmɛ kaa a muɔɔ mana nɛ maa su mɛ si enyɔ yemi. Ligbi nɛ ɔ ji ligbi ekpane ɔ. Yehowa de mɛ ke a ngɔ mana a eko kɛ to si kɛ ha e nɔ jena, ejakaa mana a eko be nɛe ha mɛ ngɛ ligbi kpaagone ɔ nɔ. Ke a kɛ mana a to si nɛ je na yi ha ligbi kpaagone ɔ, e sa we, nɛ e wui gɔgɔ hulɔ! Nyakpɛ ní kpa hu ji nɛ ɔ nɛ!

Yehowa lɛ Israelbi ɔmɛ kɛ mana jehahi abɔ tsuo nɛ a hi nga a nɔ ɔ.

2 Mose 16:1-36; 4 Mose 11:7-9; Yoshua 5:10-12.



Sane Bimihi

  • Mɛni o na ngɛ foni ɔ mi nɛ́ ni ɔmɛ ngɛ muɔɔe ngɛ zugba a?
  • Mɛni Mose de ni ɔmɛ ngɛ mana a muɔɔmi he?
  • Mɛni Yehowa de ni ɔmɛ ke a pee ngɛ ligbi ekpane ɔ nɔ, nɛ mɛni heje?
  • Mɛni ji nyakpɛ nɔ́ ko nɛ Yehowa peeɔ ke ni ɔmɛ ngɔ mana a eko kɛ to kɛ ha ligbi kpaagone ɔ?
  • Yehowa lɛ mabi ɔmɛ kɛ mana kɛ ya si mɛni be?

Sane bimi kpahi

  • Kane 2 Mose 16:1-36 kɛ 4 Mose 11:7-9.

    Mɛni 2 Mose 16:8 tsɔɔ ngɛ bɔnɛ e sa kaa waa bu blɔ nya nɛ Mawu kɛ ha nihi ngɛ Kristofoli asafo ɔ mi ha he? (Heb. 13:17)

    Benɛ Israelbi ɔmɛ ngɛ nga a nɔ ɔ, mɛni blɔ nɔ a kai mɛ ngɛ kaa e sa nɛ a ngɔ a he kɛ fɔ Yehowa nɔ daa ligbi? (2 Mose 16:14-16, 35; 5 Mose 8:2, 3)

    Mɛni okadi peemi sisi numi Yesu tsɔɔ ngɛ mana a he, nɛ wa ma ná “abolo nɛ je hiɔwe” nɛ ɔ he se ngɛ mɛni blɔ nɔ? (Yoh. 6:31-35, 40)

  • Kane Yoshua 5:10-12.

    Jeha enyɛmɛ nɛ Israelbi ɔmɛ ye mana, nɛ mɛni blɔ nɔ enɛ ɔ pee ka kɛ ha mɛ? Nɛ mɛni wa ma nyɛ maa kase kɛ je enɛ ɔ mi? (2 Mose 16:35; 4 Mose 11:4-6; 1 Kor. 10:10, 11)