Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 33: Wo Tsutsu ɔ Pomi

Ní kasemi 33: Wo Tsutsu ɔ Pomi

MOO hyɛ nɔ́ nɛ ngɛ nɔ yae ngɛ hiɛ ɔ! Mose nɛ e ngɔ e tso ɔ kɛ ngɛ Wo Tsutsu ɔ nɔ tsɔɔe ɔ nɛ. Israelbi ɔmɛ nɛ a baa a yi ɔ ji nihi nɛ daa si ngɛ e kasa nya a nɛ. Se Farao kɛ e tabuli ɔmɛ lɛɛ a ngɛ gboe ngɛ wo ɔ mi. Ha nɛ waa hyɛ nɔ́ nɛ ngɔ enɛ ɔ kɛ ba.

Mizraim tabuli ɔmɛ nɛ wo ɔ kɛ mɛ yaa

Kaa bɔnɛ wa kase kɛ sɛ hlami ɔ, benɛ Mawu ngɔ haomi nɛ ji 10 kɛ ba Mizraimbi ɔmɛ a nɔ se ɔ, Farao de Israelbi ɔmɛ ke a je Mizraim. Israel nyumuhi maa pee 600,000, kɛ yihi kɛ jokuɛwi babauu hu piɛɛ a he kɛ je. Nɛ nihi babauu nɛ pi Israelbi se a ba ná hemi kɛ yemi ngɛ Yehowa mi ɔ hu piɛɛ Israelbi ɔmɛ a he kɛ je. Mɛ tsuo a ngɔ a jijɔhi, apletsihi, kɛ nahi hu kɛ je.

Loko Israelbi ɔmɛ maa je Mizraim ɔ, a bi Mizraimbi ɔmɛ nɛ́ a ha mɛ tadehi, kɛ níhi nɛ a kɛ sika tsu kɛ sika hiɔ pee. Haomi nɛ ji nyɔngma a nɛ ba Mizraimbi ɔmɛ a nɔ ɔ ha a ye gbeye wawɛɛ. Lɔɔ heje ɔ, a ngɔ nɔ́ tsuaa nɔ́ nɛ Israelbi ɔmɛ bi mɛ ɔ kɛ ha mɛ.

Ligbihi komɛ a se ɔ, Israelbi ɔmɛ ba su Wo Tsutsu ɔ he. Nɛ a jɔɔ a he ngɛ lejɛ ɔ. Se Farao kɛ e webi ɔmɛ pia a he kaa a ngmɛɛ Israelbi ɔmɛ a he nɛ a je. A de a sibi ke: ‘Wa ngmɛɛ wa nyɔguɛ ɔmɛ a he nɛ a je!’

Lɔɔ heje ɔ, Farao tsake e juɛmi ekohu. Amlɔ nɔuu nɛ e ngɔ e ta hwilii nɛ e bua e tabuli ɔmɛ a nya. Kɛkɛ nɛ a ngɔ ta hwilii 600 kɛ ta hwilii kpahi tsuo nɛ ngɛ Mizraim ɔ nɛ a fiee Israelbi ɔmɛ a se.

Benɛ Israelbi ɔmɛ na Farao kɛ e tabuli ɔmɛ nɛ a ma a, a ye gbeye wawɛɛ. He ko be nɛ a ma tu fo kɛ gu. Wo Tsutsu ɔ ngɛ a hɛ mi, nɛ Mizraimbi ɔmɛ hu ngɛ a se kɛ ma. Se Yehowa ngɔ bɔku kɛ po e webi ɔmɛ kɛ Mizraimbi ɔmɛ a kpɛti. Lɔɔ he ɔ, Mizraimbi ɔmɛ nɛ Israelbi ɔmɛ konɛ a tua mɛ.

Kɛkɛ nɛ, Yehowa de Mose kaa e ngɔ tso ɔ kɛ tsɔɔ Wo Tsutsu ɔ nɔ. Benɛ e pee ja a, Yehowa ha kɔɔhiɔ ngua ko fia kɛ je puje he. Enɛ ɔ ha wo ɔ mi gba enyɔ, nɛ nyu ɔ pee kaa gbogbo ngɛ hiɛ kɛ hiɛ.

Lɔɔ se ɔ, Israelbi ɔmɛ nyɛɛ zugba gbigbli nɔ kɛ gu Wo Tsutsu ɔ mi. E ye ngmlɛfiahi fuu loko nimli ayɔhi abɔ kɛ a lohwe ɔmɛ nyɛ nɛ a po Wo Tsutsu ɔ slɔkee. Mizraimbi ɔmɛ na Israelbi ɔmɛ jehanɛ ɔ. A nyɔguɛ ɔmɛ ngɛ a dɛ jee! Lɔɔ he ɔ, a sɛ Wo Tsutsu ɔ mi kɛ nyɛɛ a se.

Benɛ a sɛ wo ɔ mi ɔ, Mawu ha a hwilii ɔmɛ a nane ɔmɛ bɔni hiaami. Mizraimbi ɔmɛ ye gbeye wawɛɛ, nɛ a kpa ngmlaa ke: ‘Yehowa ngɛ ta hwue ha Israelbi ɔmɛ. Nyɛ ha nɛ waa kpale wa se!’ Se be be momo.

Hiɛ ɔ nɛ Yehowa de Mose kaa e ngɔ e tso ɔ kɛ tsɔɔ Wo Tsutsu ɔ nɔ ɔ nɛ, kaa bɔnɛ o na ngɛ foni ɔ mi ɔ. Nɛ benɛ Mose pee ja a, nyu ɔ nɛ e pee kaa gbogbo ɔ ba tsa ekohu, nɛ e ha Mizraimbi ɔmɛ kɛ a ta hwilii ɔmɛ a nɔ. Mizraim tabuli ɔmɛ tsuo nɛ a nyɛɛ Israelbi ɔmɛ a se kɛ sɛ wo ɔ mi ɔ nɛ. Nɛ a kpɛti nɔ ko nɔ ko po ji kpo!

Mawu webi ɔmɛ tsuo bua jɔ kaa a baa a yi! Nyumu ɔmɛ la kɛ na Yehowa si ke: ‘Yehowa ye kunimi ngua. E tsɛ̃ okpɔngɔ ɔmɛ kɛ a nɔ hili ɔmɛ kɛ wo wo ɔ mi.’ Mose nyɛmiyo Miriam ngɔ fao nɛ yi kpa amɛ hu ngɔ a fao ɔmɛ nɛ a fia kɛ piɛɛ Miriam he. Nɛ benɛ a ngɛ doe kɛ bua jɔmi ɔ, mɛ hu a la la nɛ nyumu ɔmɛ ngɛ lae ɔ ke: ‘Yehowa ye kunimi ngua. E tsɛ̃ okpɔngɔ ɔmɛ kɛ a nɔ hili ɔmɛ kɛ wo wo ɔ mi.’

2 Mose yi 12 kɛ ya si 15.



Sane Bimihi

  • Israel nyumuhi enyɛmɛ piɛɛ yihi kɛ jokuɛwi a he kɛ je Mizraim, nɛ mɛnɔmɛ hu piɛɛ a he kɛ ho?
  • Kɛ Farao nu he kɛɛ benɛ e ngmɛɛ Israelbi ɔmɛ a he nɛ a je ɔ, nɛ mɛni e pee?
  • Mɛni Yehowa pee kɛ tsi Mizraimbi ɔmɛ a nya nɛ a nyɛ we nɛ́ a tua Israelbi ɔmɛ ɔ?
  • Mɛni ba benɛ Mose ngɔ e tso ɔ kɛ tsɔɔ Wo Tsutsu ɔ, nɛ kɛ Israelbi ɔmɛ pee kɛɛ?
  • Mɛni ba benɛ Mizraimbi ɔmɛ nyɛɛ Israelbi ɔmɛ a se kɛ sɛ wo ɔ mi ɔ?
  • Mɛni Israelbi ɔmɛ pee kɛ na Yehowa si ngɛ a yi nɛ e baa heje?

Sane bimi kpahi

  • Kane 2 Mose 12:33-36.

    Mɛni blɔ nɔ Yehowa ha Mizraimbi ɔmɛ wo Israelbi ɔmɛ hiɔ ngɛ jehahi tsuo nɛ a kɛ sɔmɔ mɛ kaa nyɔguɛhi ɔ he? (2 Mose 3:21, 22; 12:35, 36)

  • Kane 2 Mose 14:1-31.

    Kɛ Mose munyu nɛ a ngma ngɛ 2 Mose 14:13, 14 haa Yehowa webi nɛ ngɛ mwɔnɛ ɔ susuɔ ngɛ Harmagedon ta a nɛ ma a he ha kɛɛ? (2 Kron. 20:17; La 91:8)

  • Kane 2 Mose 15:1-8, 20, 21.

    Mɛni heje e sa nɛ Yehowa tsɔli nɛ la yi jemi la kɛ ha lɛ? (2 Mose 15:1, 2; La 105:2, 3; Kpoj. 15:3, 4)

    Mɛni nɔhyɛ nɔ́ Miriam kɛ yi kpa amɛ pee ngɛ Yehowa yi jemi he ngɛ Wo Tsutsu ɔ he kɛ ha Kristofoli yihi nɛ ngɛ mwɔnɛ ɔ? (2 Mose 15:20, 21; La 68:11)