Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 32: Haomihi 10 Amɛ

Ní kasemi 32: Haomihi 10 Amɛ

HYƐ foni ɔmɛ. Eko tsuaa eko tsɔɔ haomi nɛ́ Yehowa kɛ ba Mizraimbi ɔmɛ a nɔ. Ngɛ kekleekle foni ɔ mi ɔ, o maa na Aaron nɛ́ e kɛ e tso ɔ fia Nilo Pa a mi. Benɛ e ngɔ e tso ɔ kɛ fia pa a mi ɔ, pa a plɛ pee muɔ. Lo ɔmɛ gbo, nɛ pa a bɔni fu jemi.

Haomihi nɛ ba Mizraimbi ɔmɛ a nɔ

Lɔɔ se ɔ, Yehowa ha ovɔnɔhi je kpo kɛ je Nilo Pa a mi kɛ sɛ ma a mi. A sɛ he tsuaa he. A sɛ flɔɔnɔɔhi kɛ bloodo sami tsesihi a mi, nɛ a kuɔ nihi a sahi hulɔ. Benɛ ovɔnɔ ɔmɛ gbo ɔ, Mizraimbi ɔmɛ bua a nya ngɔ pue si, nɛ ma a mi tsuo je fu.

Jehanɛ ɔ, Aaron ngɔ e tso ɔ kɛ fia zugba, kɛkɛ nɛ zu ɔ plɛ pee pwɔmihi. Pwɔmi ɔmɛ ji haomi etɛne nɛ ba Mizraim zugba a nɔ.

Haomihi nɛ nyɛɛ se ɔ, ekoeko bɛ Israelbi ɔmɛ a nɔ, Mizraimbi ɔmɛ pɛ a nɔ nɛ e ba. Haomi eywiɛne ɔ ji pwɔluɛhi nɛ a ngɛ tee ngɛ Mizraimbi ɔmɛ a wehi a mi. Haomi enuɔne ɔ ba lohwehi a nɔ. Mizraimbi ɔmɛ a nahi kɛ jijɔhi kɛ tohi fuu gbo.

Lɔɔ se ɔ, Mose kɛ Aaron ngɔ la zu nɛ a fɔ kɛ wo kɔɔhiɔ mi. Nɛ lɔɔ ha tslɔɔ ba fuu ni ɔmɛ kɛ lohwe ɔmɛ tsuo. Haomi ekpane ji nɛ ɔ nɛ.

Lɔɔ se ɔ, Mose wo e nine nɔ kɛ tsɔɔ hiɔwe, kɛkɛ nɛ Yehowa ha oslabai gba nɛ aisi tɛ hu nɛ. Enɛ ɔ eko bɛ Mizraim gblee.

Haomi kpaanyɔne ɔ ji kaa baalɛhi ba fuu. Baalɛhi bɛ fuu ja gblee. A ye nɔ́ fɛɛ nɔ́ nɛ aisi tɛ ɔ puɛ we ɔ.

Haomi nɛɛne ɔ ji diblii nɛ́ wo. Diblii nɛ́ mi ti wo ngɛ zugba a nɔ tsuo ligbi etɛ. Se Israelbi ɔmɛ lɛɛ a ngɛ la ngɛ a hihe ɔ.

Nyagbe ɔ, Mawu de e webi ɔmɛ ke a ngɔ apletsi bi aloo jijɔ bi muɔ kɛ kpa a sinya tso ɔmɛ a he. Kɛkɛ nɛ Mawu bɔfo kpa Mizraim tsuo. Wehi tsuo nɛ bɔfo ɔ na muɔ ngɛ sinya tso he ngɛ ɔ, e gbi nɔ ko ngɛ lejɛ ɔ. Se wehi nɛ muɔ be sinya tso ɔmɛ a he ɔ, Mawu bɔfo ɔ gbe a mi bitɛtehi tsuo, kɛ je nɔmlɔ nɔ kɛ ya si lohwe nɔ. Haomi nɛ ji 10 ji nɛ ɔ nɛ.

Benɛ nyagbe haomi ɔ ba se ɔ, Farao de Israelbi ɔmɛ kaa a ho. Mawu webi ɔmɛ dla a he kɛ to momo, heje ɔ, a nyɛɛ jamɛ a nyɔ mi nɔuu kɛ je Mizraim.

2 Mose yi 7 kɛ ya si 12.



Sane Bimihi

  • Hyɛ foni ɔ nɛ o tsɔɔ kekleekle haomihi etɛ ɔmɛ nɛ Yehowa kɛ ba Mizraim nɔ ɔ?
  • Mɛni ngɛ slɔɔto ngɛ kekle haomihi etɛ ɔmɛ kɛ haomihi ekpa amɛ he?
  • Mɛni ji haomihi eywiɛne, enuɔne kɛ ekpane ɔ?
  • Moo tsɔɔ haomi kpaagone, kpaanyɔne kɛ nɛɛne ɔ.
  • Mɛni Yehowa de Israelbi ɔmɛ kaa a pee loko e ngɔ haomi nyɔngmane ɔ kɛ ba?
  • Mɛni ji haomi nyɔngmane ɔ, nɛ mɛni ba ngɛ lɔɔ se?

Sane bimi kpahi

  • Kane 2 Mose 7:19-8:23.

    E ngɛ mi kaa Mizraim kunya yeli ɔmɛ nyɛ nɛ a pee kekleekle haomihi enyɔ nɛ Yehowa kɛ ba a henɔhi mohu, se mɛni nɛ a nyɛ a nɔ nɛ a kplɛɛ nɔ ngɛ haomi etɛne ɔ se? (2 Mose 8:18, 19; Mat. 12:24-28)

    Mɛni blɔ nɔ haomi eywiɛne ɔ tsɔɔ kaa Yehowa ngɛ he wami nɛ e kɛ buu e webi a he, nɛ kɛ enɛ ɔ haa Yehowa webi susuɔ ngɛ “amanehlu ngua” nɛ ma a he kɛɛ? (2 Mose 8:22, 23; Kpoj. 7:13, 14; 2 Kron. 16:9)

  • Kane 2 Mose 8:24; 9:3, 6, 10, 11, 14, 16, 23-25; kɛ 10:13-15, 21-23.

    Mɛni kuuhi enyɔ Haomihi Nyɔngma amɛ ha wa na, nɛ kɛ enɛ ɔ ha wa susuɔ ngɛ kuuhi enyɔ nɛ ɔmɛ a he mwɔnɛ ɔ kɛɛ? (2 Mose 8:10, 18, 19; 9:14)

    Mɛni blɔ nɔ 2 Mose 9:16 yeɔ buaa wɔ nɛ wa nuɔ nɔ́ heje nɛ Yehowa kpataa we Satan hɛ mi lolo ɔ sisi? (Rom. 9:21, 22)

  • Kane 2 Mose 12:21-32.

    Mɛni blɔ nɔ Hetsɔmi ɔ bli blɔ ha nimli babauu konɛ a ná yi wami hemi, nɛ mɛni nɛ́ maa ba hwɔɔ se he okadi Hetsɔmi ɔ peeɔ? (2 Mose 12:21-23; Yoh. 1:29; Rom. 5:18, 19, 21; 1 Kor. 5:7)