Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 31: Mose kɛ Aaron Ya Farao Ngɔ

Ní kasemi 31: Mose kɛ Aaron Ya Farao Ngɔ

BENƐ Mose kpale kɛ ho Mizraim ya a, e ya bɔ e nyɛmi Aaron nyakpɛ ní ɔmɛ tsuo nɛ e na a. Benɛ Mose kɛ Aaron pee nyakpɛ ní ɔmɛ tsuo kɛ tsɔɔ Israelbi ɔmɛ ɔ, ma a tsuo he ye kaa Yehowa ngɛ a se.

Lɔɔ se ɔ, Mose kɛ Aaron ya Farao ngɔ. Nɛ a ya de lɛ ke: ‘Yehowa nɛ ji lsraelbi ɔmɛ a Mawu ɔ ke: “Ha nɛ ye webi ɔmɛ nɛ nyɛɛ ligbi etɛ kɛ ya nga a nɔ, konɛ a ya ja mi ngɛ lejɛ ɔ.”’ Se Farao he nɔ ke: ‘I li Yehowa ko. Nɛ i be hae nɛ Israelbi ɔmɛ nɛ́ a je.’

Farao mi mi fu, ejakaa Israelbi ɔmɛ ngɛ hlae nɛ a kpa nítsumi konɛ a ya ja Yehowa. Lɔɔ heje ɔ, e nyɛ a nɔ nɛ a tsu ní wawɛɛ pe kekle ɔ po. Israelbi ɔmɛ pia Mose kaa lɛ nɛ e ha nɛ a ngɛ mɛ yi mi wae. Enɛ ɔ hao Mose wawɛɛ. Se Yehowa de lɛ kaa e ko ye tsui. Yehowa de lɛ ke: ‘Ma ha nɛ Farao maa ngmɛɛ ye webi ɔmɛ a he nɛ a je.’

Mose kɛ Aaron nɛ a daa si ngɛ Farao hɛ mi

Mose kɛ Aaron ya Farao ngɔ ekohu. Jehanɛ ɔ lɛɛ, a pee nyakpɛ nɔ́ ko. Aaron sake e tso ɔ kɛ fɔ zugba, nɛ e plɛ pee sinɔ agbo. Kɛkɛ nɛ Farao ní leli ɔmɛ hu sake tsohi kɛ fɔ zugba, nɛ lɔɔ ɔmɛ hu plɛ pee sinɔhi. Se moo hyɛ! Aaron sinɔ ɔ ngɛ ní leli ɔmɛ a sinɔ ɔmɛ miie. Se kɛ̃ ɔ, Farao ha we Israelbi ɔmɛ blɔ nɛ a ho.

Lɔɔ he ɔ, be su nɛ́ Yehowa maa gbla Farao tue. Anɛ o le nɔ́ nɛ e pee lo? E ngɔ haomi nguahi 10 kɛ ba Mizraimbi ɔmɛ a nɔ.

Ke haomi ɔ ba Mizraimbi ɔmɛ a nɔ ɔ, kɛkɛ Farao tsɔ ya tsɛ Mose. Nɛ nɔ́ nɛ e deɔ lɛ ji: ‘Mo ha haomi ɔ se nɛ po, nɛ ma ha Israelbi ɔmɛ blɔ nɛ a ho.’ Se ke haomi ɔ se po pɛ kɛkɛ Farao tsake e juɛmi. E ha we Israelbi ɔmɛ blɔ nɛ a ho. Se nyagbe ɔ, benɛ haomi nɛ ji 10 ba a, Farao ngmɛ Israelbi ɔmɛ blɔ nɛ a je.

Anɛ o le haomihi 10 amɛ lo? Mo ha nɛ waa kase a he ní nɛ waa hyɛ.

2 Mose 4:27-31; 5:1-23; 6:1-13, 26-30; 7:1-13.



Sane Bimihi

  • Mɛni he wami nyakpɛ ní nɛ Mose kɛ Aaron pee ɔ ná ngɛ Israelbi ɔmɛ a nɔ?
  • Mɛni Mose kɛ Aaron de Farao, nɛ mɛni heto Farao ha mɛ?
  • Kaa bɔnɛ o ngɛ hyɛe ngɛ foni ɔ mi ɔ, mɛni ba benɛ Aaron sake e tso ɔ kɛ fɔ zugba a?
  • Mɛni Yehowa pee kɛ gbla Farao tue, nɛ kɛ Farao pee e ní ngɛ he kɛɛ?
  • Mɛni ba ngɛ haomi nyɔngmane ɔ se?

Sane bimi kpahi

  • Kane 2 Mose 4:27-31 kɛ 5:1-23.

    Kɛ Farao ngɛ tsɔɔe kɛɛ, benɛ e de ke: ‘I li Yehowa ko’ ɔ? (2 Mose 5:2; 1 Sam. 2:12; Rom. 1:21)

  • Kane 2 Mose 6:1-13, 26-30.

    Yehowa ha we nɛ Abraham, Isak kɛ Yakob nɛ le lɛ ngɛ mɛni sisi numi nya? (2 Mose 3:13, 14; 6:3; 1 Mose 12:8)

    Kɛ wa nuɔ he ha kɛɛ ngɛ bɔnɛ Yehowa kɛ Mose tsu ní ɔ he, benɛ Mose nu he kaa e be ní ɔ nyɛe ma tsu ɔ tsuo se? (2 Mose 6:12, 30; Luka 21:13-15)

  • Kane 2 Mose 7:1-13.

    Mɛni nɔhyɛ nɔ́ Mose kɛ Aaron pee kɛ fɔ si ha Mawu tsɔli mwɔnɛ ɔ, ngɛ́ ka nɛ́ a kɛ jaje Yehowa kojomi ɔmɛ kɛ tsɔɔ Farao ɔ he? (2 Mose 7:2, 3, 6; Níts. 4:29-31)

    Mɛni blɔ nɔ Yehowa tsɔɔ ngɛ kaa e nɔ kuɔ kulaa pe Mizraim mawu ɔmɛ? (2 Mose 7:12; 1 Kron. 29:12)