Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 29: Nɔ́ nɛ Ha Mose Tu Fo

Ní kasemi 29: Nɔ́ nɛ Ha Mose Tu Fo

HYƐ Mose nɛ ngɛ fo tue kɛ ngɛ Mizraim jee kɛ yaa. Anɛ o na nyumuhi nɛ fiee e se ɔ lo? Anɛ o le nɔ́ nɛ ha a ngɛ hlae nɛ́ a gbe Mose ɔ lo? Ha nɛ waa hyɛ kaa wa maa na nɔ́ nɛ ha e ba ja lo.

Mose nɛ e ngɛ fo tue kɛ je Mizraim

Mose hi Mizraim matsɛ Farao we ɔ mi kɛ wa. E ba plɛ nɔmlɔ nguaa kɛ ní lelɔ. Mose le kaa pi Mizraimno ji lɛ, se mohu e fɔli nitsɛ ji Israelbi nyɔguɛ ɔmɛ eko.

Benɛ Mose ye jeha 40, ligbi ko e ho kaa e yaa slaa e webi ɔmɛ. A ngɛ mɛ yi mi wae wawɛɛ nitsɛ. E na Mizraimno ko nɛ e ngɛ Israel nyɔguɛ ko gbee. Mose po hɛ, nɛ benɛ e na kaa nɔ ko hyɛ we lɛ ɔ, e fia Mizraimno ɔ nɔ́ nɛ e gbo. Kɛkɛ nɛ Mose pu lɛ ngɛ zia a mi.

E nɔ jena a, Mose ho e webi ɔmɛ a ngɔ ya ekohu. E susu kaa e ma nyɛ maa ye bua mɛ konɛ a ko pee nyɔguɛhi hu. Se e na Israel nyumuhi enyɔ nɛ a ngɛ kunɔ nɔe, lɔɔ he ɔ, Mose bi nɔ nɛ munyu dɛ ɔ ke: ‘Mɛni heje o ngɛ o nyɛmi ɔ gbee?’

Nyumu ɔ he nɔ ke: ‘Mɛnɔ pee mo wa nɔ yelɔ kɛ wa kojolɔ? Anɛ o ngɛ hlae nɛ o gbe mi kaa bɔnɛ o gbe Mizraimno ɔ lo?’

Mose tsui po. E na kaa nihi le nɔ́ nɛ e pee Mizraimno ɔ. Farao po nu he, nɛ e tsɔ nihi kaa a ya gbe Mose. Lɔɔ heje nɛ Mose tu fo kɛ je Mizraim ɔ nɛ.

Benɛ Mose je Mizraim ɔ, e ho Midian zugba a nɔ ya tɔɔ. E kɛ Yetro weku ɔ ya hi si, nɛ e ngɔ e bi yihewi ɔmɛ a ti nɔ kake nɛ a tsɛɛ lɛ Zipora. Mose plɛ to hyɛlɔ nɛ e hyɛ Yetro to ɔmɛ a nɔ ha lɛ. E hi Midian zugba a nɔ jeha 40. Mose ye jeha 80 jehanɛ. Ligbi ko benɛ Mose ngɛ Yetro to ɔmɛ a nɔ hyɛe ɔ, e na nyakpɛ nɔ́ ko, nɛ lɔɔ tsake e si himi kulaa. Mo ha nɛ waa hyɛ nɔ́ nɛ nyakpɛ nɔ́ nɛ ɔ ji.

2 Mose 2:11-25; Bɔfo ɔmɛ A Nítsumi 7:22-29.



Sane Bimihi

  • Jije Mose hi kɛ wa, nɛ mɛni e le ngɛ e fɔli a he?
  • Benɛ Mose ye jeha 40, mɛni e pee?
  • Mɛni Mose de Israel nyumu ko nɛ e kɛ e nyɛmi Israelno ngɛ kunɔ nɔe ɔ, nɛ mɛni ji heto nɛ́ e ha Mose?
  • Mɛni heje nɛ Mose tu fo kɛ je Mizraim ɔ?
  • Jije Mose tu fo kɛ ho, nɛ mɛnɔ ngɔ e ya hi ngɛ lejɛ ɔ?
  • Mɛni Mose ya tsu jeha 40 benɛ e tu fo kɛ je Mizraim ɔ?

Sane bimi kpahi

  • Kane 2 Mose 2:11-25.

    E ngɛ mi kaa a ngɔ Mizraim nile kɛ tsɔse Mose saminya jeha babauu mohu, kɛ̃ ɔ, mɛni blɔ nɔ Mose ye anɔkuale kɛ ha Yehowa kɛ e mabi ɔmɛ ngɛ? (2 Mose 2:11, 12; Heb. 11:24)

  • Kane Bɔfo ɔmɛ A Nítsumi 7:22-29.

    Mɛni wa ma nyɛ maa kase ngɛ bɔnɛ Mose hla kaa e ma kpɔ Israelbi ɔmɛ kɛ je Mizraim nyɔguɛ si himi mi ɔ mi? (Níts. 7:23-25; 1 Pet. 5:6, 10)