Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 28: Bɔnɛ A Baa Bimwɔyo Mose Yi Ha

Ní kasemi 28: Bɔnɛ A Baa Bimwɔyo Mose Yi Ha

HYƐ bɔnɛ bimwɔyo ɔ pɛtɛ yo ɔ nine nguɛ he nɛ́ e ngɛ ya foe ha. Mose ji nɛ ɔ nɛ. Anɛ o le alua fini nɛ ɔ lo? Mizraim matsɛ nɛ ji Farao ɔ biyo ji lɛ.

Farao biyo ɔ ya na Mose

Mosenyɛ ngɔ e bi ɔ kɛ laa nyɔhiɔ etɛ, ejakaa e sume kaa Mizraimbi ɔmɛ nɛ gbe lɛ. Se e le kaa eko ɔ, nɔ ko ma ba na lɛ, lɔɔ he ɔ, e pee nɔ́ ko nɛ e kɛ baa e yi.

Mosenyɛ ngɔ kusii (kɛ̃tɛ) nɛ e dla mi bɔnɛ nyu be nyɛe maa sɛ mi. Lɔɔ se ɔ, e ngɔ Mose kɛ wo kusii ɔ mi, nɛ e kɛ lɛ ya ma nga gagaaga amɛ a kpɛti ngɛ Nilo Pa a nya. E de Mose nyɛmiyo Miriam kaa e da si ngɛ se konɛ e hyɛ nɔ́ nɛ maa ba.

E kɛ we nɛ Farao biyo ɔ ba Nilo Pa a nya konɛ e ba du. Si kake too ɔ, e hɛngmɛ gba kusii ɔ nɔ ngɛ nga gagaaga amɛ a kpɛti. E tsɛ e mawa amɛ a ti nɔ kake nɛ e de lɛ ke: ‘Yaa ngɔ kusii ɔ nɛ ngɛ lejɛ ɔ kɛ ba ha mi.’ Benɛ matsɛ biyo ɔ bli kusii ɔ nya a, e na bimwɔyo ko nɛ́ he ngɛ fɛu nitsɛ! Bimwɔyo Mose ngɛ ya foe, nɛ e ní pee matsɛ biyo ɔ mɔbɔ. E sume kaa e ma ha nɛ a gbe lɛ.

Amlɔ nɔuu kɛkɛ nɛ Miriam ba ná mɛ ngɛ lejɛ ɔ. O na lɛ ngɛ foni ɔ mi lo? Miriam bi Farao biyo ɔ ke: ‘Ma ya nɛ ma ya tsɛ Israel binyɛ ko nɛ e ba hyɛ bimwɔyo ɔ nɔ ha mo lo?’

Matsɛ biyo ɔ ha lɛ heto ke: ‘Ee, mo ya tsɛ nɔ ko kɛ ba.’

Miriam tu fo mlamlaamla kɛ ho ya de e nyɛ. Benɛ Mosenyɛ ba su matsɛ biyo ɔ ngɔ ɔ, e de lɛ ke: ‘Ngɔɔ bimwɔyo nɛ ɔ kɛ ho nɛ o ya hyɛ e nɔ ha mi, nɛ ma wo mo hiɔ.’

Lɔɔ he ɔ Mosenyɛ hyɛ lɛ nitsɛ e bi nɔ. Pee se ɔ, benɛ Mose ba wa a, e ngɔ lɛ kɛ ya ha Farao biyo ɔ, nɛ Farao biyo ɔ ngɔ lɛ kɛ pee e bi. Nɔ́ nɛ ha Mose ya je Farao we ɔ mi kɛ wa ji nɛ ɔ nɛ.

2 Mose 2:1-10.



Sane Bimihi

  • Mɛnɔ ji bimwɔyo nɛ ngɛ foni ɔ mi ɔ, nɛ mɛnɔ nine nguɛ he e pɛtɛ ɔ?
  • Mɛni Mosenyɛ pee kɛ baa Mose yi?
  • Mɛnɔ ji jokuɛ yoyo ɔ nɛ ngɛ foni ɔ mi ɔ, nɛ mɛni ji nɔ́ nɛ e pee?
  • Benɛ Farao biyo ɔ na bimwɔyo ɔ, mɛni Miriam de lɛ kaa e suɔ nɛ́ e pee ha lɛ?
  • Mɛni matsɛ biyo ɔ de Mosenyɛ?

Sane bimi kpahi

  • Kane 2 Mose 2:1-10.

    Mɛni he blɔ Mosenyɛ ná konɛ e kɛ tsɔse Mose nɛ e tsɔɔ lɛ ní ngɛ e jokuɛwi a si, nɛ mɛni nɔhyɛ nɔ́ nɛ ɔ peeɔ kɛ haa fɔli mwɔnɛ ɔ? (2 Mose 2:9, 10; 5 Mose 6:6-9; Abɛ 22:6; Efe. 6:4; 2 Tim. 3:15)