Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 23: Farao Nlami Ɔmɛ

Ní kasemi 23: Farao Nlami Ɔmɛ

JEHA enyɔ ba be nɛ́ Yosef ngɛ tsu ɔ mi. Da nɔ hyɛlɔ ɔ kai we lɛ. Kɛkɛ nɛ ligbi ko nyɔ mi ɔ, Farao nla nlamihi enyɔ komɛ, nɛ e nui sisi. Anɛ o na lɛ ngɛ foni ɔ mi nɛ́ e hwɔɔ si lo? E nɔ jena a, Farao tsɛ e ní leli ɔmɛ kɛ ba nɛ e de mɛ e nlami ɔmɛ. Se a nyɛ we nɛ a tsɔɔ lɛ sisi.

Da nɔ hyɛlɔ ɔ ba kai Yosef jehanɛ. Nɛ e de Farao ke: ‘Benɛ a wo mi tsu ɔ, nyumu ko ngɛ lejɛ ɔ nɛ nyɛɔ tsɔɔ nlamihi a sisi.’ Farao ha nɛ a ya je Yosef kɛ je tsu ɔ mi amlɔ kɛ ba e ngɔ.

Farao sɛɛ e nlami ɔmɛ ha Yosef ke: ‘I na na nguahi kpaago, nɛ a he ngɛ fɛu. Kɛkɛ nɛ i kpale na na kpahi kpaago nɛ́ a flaa. Nɛ nahi nɛ́ flaa amɛ ye na nguahi nɛ́ a he ngɛ fɛu ɔ.

Farao nɛ e ngɛ nlae

‘Ngɛ ye nlami enyɔne ɔ mi ɔ, i na blɛfo kpaago nɛ wo ní saminya ngɛ tso kake he. Lɔɔ se ɔ, i kpale na blɛfo kpaago kpa nɛ wui ní ngɛ tso kake hu he. Kɛkɛ nɛ blɛfo tso nɛ wui ní ɔ mii blɛfo kpaago kpa amɛ nɛ wo ní ɔ.’

Yosef de Farao ke: ‘Nlamihi enyɔ ɔmɛ tsuo hɛɛ sisi numi kake. Nahi nɛ kle kpaago ɔ kɛ blɛfo nɛ wo ní kpaago ɔ tsuo daa si ha jeha kpaago. Nɛ nahi nɛ flaa kpaago kɛ blɛfo nɛ́ wui ní kpaago ɔ hu daa si ha jeha kpaago kpa. Mizraim zugba a maa ba ní babauu jeha kpaago. Kɛkɛ lɔɔ se ɔ, hwɔ maa ba jeha kpaago.’

Lɔɔ he ɔ, Yosef de Farao ke: ‘Mo hla ní lelɔ ko konɛ o ha e bua niye ní nya ngɛ jeha kpaago nɛ zugba a maa ba ní ɔ mi. Kɛkɛ ɔ, ke hwɔ ba jeha kpaago kpa nɛ maa nyɛɛ se ɔ, hwɔ be mabi ɔmɛ yee.’

Farao bua jɔ ga nɛ Yosef wo lɛ ɔ he. Nɛ e hla Yosef kaa e bua niye ní fuu nya kɛ to. Yosef ba plɛ pee Farao se yelɔ ngɛ Mizraim.

Jeha kpaanyɔ se benɛ hwɔ ba a, Yosef na nyumuhi komɛ nɛ́ a ma. Anɛ o le nihi nɛ a ji lo? Mɛ ji Yosef nyɛminyumuhi 10 amɛ! A niye ní nɛ ngɛ a dɛ ngɛ Kanaan bɔni tami, heje ɔ, a tsɛ Yakob tsɔ mɛ Mizraim kaa a ya he niye ní kɛ ba. Yosef yo e nyɛmimɛ ɔmɛ se mɛɛ lɛɛ a yo we lɛ. Anɛ o le nɔ́ heje lo? Nɔ́ heje ji kaa, Yosef wa nɛ e wo tade kpa ko.

Yosef kai kaa benɛ e ji nyumuyo ɔ, e nla nɛ́ e nyɛmimɛ ɔmɛ ba kpla si ngɛ e hɛ mi. O kai kaa o kane sane nɛ ɔ lo? Lɔɔ he ɔ, Yosef na kaa Mawu ji nɔ nɛ ngɔ lɛ kɛ ba Mizraim ngɛ yi mi tomi kpakpa ko heje. Mɛni o susu kaa Yosef maa pee? Ha nɛ waa hyɛ.

1 Mose 41:1-57; 42:1-8; 50:20.



Sane Bimihi

  • Mɛni ba ligbi ko nyɔ mi nɛ́ Farao hwɔ si ɔ?
  • Mɛni ha nɛ nyagbe ɔ, da nɔ hyɛlɔ ɔ kai Yosef ɔ?
  • Kaa bɔnɛ e ngɛ foni ɔ mi ɔ, mɛni nlamihi enyɔ Farao nla?
  • Kɛ Yosef tsɔɔ nlami ɔmɛ a sisi kɛɛ?
  • Kɛ Yosef plɛ kɛ ba pee nɔmlɔ ngua nɛ yeɔ Farao se ngɛ Mizraim kɛɛ?
  • Mɛni ha Yosef nyɛminyumu ɔmɛ ba Mizraim, nɛ mɛni heje a yo we lɛ ɔ?
  • Mɛni nlami Yosef kai, nɛ mɛni lɔɔ ha e nu sisi?

Sane bimi kpahi

  • Kane 1 Mose 41:1-57.

    Kɛ Yosef gbla juɛmi kɛ ya Yehowa nɔ kɛɛ, nɛ mɛni blɔ nɔ Kristofoli ma nyɛ maa kase e nɔhyɛ nɔ́ ɔ mwɔnɛ ɔ? (1 Mose 41:16, 25, 28; Mat. 5:16; 1 Pet. 2:12)

    Kɛ niye ní fuu nɛ ba Mizraim nɛ́ lɔɔ se hwɔ ba a, tsɔɔ bɔnɛ Yehowa webi a mumi mi si fɔfɔɛ ngɛ slɔɔto ngɛ Sɔlemibi a nɔ ɔ he ha kɛɛ? (1 Mose 41:29, 30; Amos 8:11, 12)

  • Kane 1 Mose 42:1-8 kɛ 50:20.

    Anɛ e ji tɔmi kaa Yehowa jali ma kpla si ngɛ nɔmlɔ ko hɛ mi, ke ja ji a ma mi kusumi nɛ a kɛ jeɔ bu kpo kɛ haa nɔ ko nɛ hɛɛ blɔ nya lo? (1 Mose 42:6)