Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Ní kasemi 22: A Wo Yosef Tsu

Ní kasemi 22: A Wo Yosef Tsu

YOSEF ye jeha 17 pɛ nɛ a ngɔ lɛ kɛ ho Mizraim ya. A ya jua lɛ kɛ ha nyumu ko nɛ a tsɛɛ lɛ Potifar. Potifar tsuɔ ní ha Mizraim matsɛ nɛ́ e biɛ ji Farao ɔ.

Yosef nɛ a wo lɛ tsu

Yosef tsuɔ ní wawɛɛ ha e nyɔmtsɛ Potifar. Enɛ ɔ heje benɛ Yosef ba wa a, Potifar ngɔ lɛ kɛ to e we ɔ tsuo nya. Lɛɛ, kɛ ba kɛɛ nɛ a wo Yosef tsu mɔ? Potifar yo ɔ nɛ e ha e ba ja.

Yosef wa kɛ su nyumu mi kɛ e he fɛu. Enɛ ɔ ha Potifar yo ɔ ba ná e he suɔmi kaa e kɛ lɛ maa hwɔ si. Se Yosef le kaa e ji tɔmi kaa e maa pee ja, heje ɔ, e kua. Enɛ ɔ ha Potifar yo ɔ mi mi fu lɛ. Lɔɔ heje benɛ e huno ɔ ba we mi ɔ, e ye lakpa ha lɛ ke: ‘Jamɛ a Yosef, nɔmlɔ yayami ɔ ba ná mi pani nya kaa e kɛ mi maa hwɔ si!’ Potifar he nɔ́ nɛ e yo ɔ de lɛ ɔ ye, nɛ e ha a wo Yosef tsu.

E kɛ we nɛ tsu nɔ hyɛlɔ ɔ na kaa nɔmlɔ kpakpa ji Yosef. Lɔɔ he ɔ, e to ni kpahi tsuo nɛ a wo mɛ tsu ɔ ngɔ wo Yosef dɛ mi. Pee se ɔ, Farao mi mi ba fu e da nɔ hyɛlɔ kɛ abolo salɔ ɔ, nɛ e wo mɛ tsu. Ligbi ko nyɔ mi ɔ, mɛ ni enyɔ ɔmɛ tsuo a nla, se a nui a nlami ɔmɛ a sisi. E nɔ jena a, Yosef de mɛ ke: ‘Nyɛ sɛɛ nyɛ nlami ɔmɛ kɛ ha mi.’ Nɛ benɛ a de lɛ ɔ, Mawu ye bua Yosef nɛ e tsɔɔ mɛ nlami ɔmɛ a sisi.

Yosef de da nɔ nyɛlɔ ɔ ke: ‘Ngɛ ligbi etɛ mi ɔ, a ma je mo kɛ je tsu ɔ mi, nɛ o ma ya sɔmɔ Farao kaa e da nɔ hyɛlɔ ekohu. Ke o je kpo ɔ, tu ye he munyu kɛ ha Farao, konɛ o ye bua mi nɛ ma je hiɛ ɔ.’ Se abolo salɔ ɔ lɛɛ Yosef de lɛ ke: ‘Ngɛ ligbi etɛ mi ɔ, Farao ma ha nɛ́ a po o yi.’

Ligbi etɛ mi ɔ, nɔ́ nɛ Yosef de ɔ ba mi pɛpɛɛpɛ. Farao ha nɛ a po abolo salɔ ɔ yi. Se da nɔ hyɛlɔ ɔ lɛɛ, a je lɛ ngɛ tsu ɔ mi nɛ e ya bɔni matsɛ ɔ sɔmɔmi ekohu. Se da nɔ hyɛlɔ ɔ hɛ je Yosef nɔ pɛsɛpɛsɛ! Nɛ e de we Farao nɔ́ ko kulaa ngɛ Yosef he. Lɔɔ he ɔ, Yosef ya nɔ nɛ e hi tsu ɔ mi.

1 Mose 39:1-23; 40:1-23.



Sane Bimihi

  • Jeha enyɛmɛ Yosef ye loko a ngɔ lɛ kɛ ho Mizraim ya, nɛ mɛni ya ba e nɔ ngɛ lejɛ ɔ?
  • Mɛni ha a wo Yosef tsu ɔ?
  • Mɛni blɔ nya a ha Yosef ngɛ tsu ɔ mi?
  • Mɛni Yosef pee ha Farao da nɔ hyɛlɔ kɛ e we abolo sãlɔ ɔ?
  • Mɛni ba benɛ a je da nɔ hyɛlɔ ɔ kɛ je tsu ɔ mi ɔ?

Sane bimi kpahi

  • Kane 1 Mose 39:1-23.

    E ngɛ mi kaa Yosef be ɔ mi ɔ, a be Mawu mlaa ko nɛ a ngma nɛ buɔ gba puɛmi fɔ mohu, se kɛ̃ ɔ, mɛni ha Yosef tu Farao yo ɔ nya fo ɔ? (1 Mose 2:24; 20:3; 39:9)

  • Kane 1 Mose 40:1-23.

    Moo tsɔɔ da nɔ hyɛlɔ ɔ nlami ɔ kɛ e sisi tsɔɔmi nɛ Yehowa kɛ ha Yosef ɔ mi kpiti. (1 Mose 40: 9-13)

    Mɛni nlami abolo sãlɔ ɔ nla a, nɛ mɛni ji e sisi? (1 Mose 40:16-19)

    Mɛni blɔ nɔ Tsɔlɔ anɔkualetsɛ kɛ ní lelɔ ɔ kase Yosef su ɔ ngɛ? (1 Mose 40:8; La 36:9; Yoh. 17:17; Níts. 17: 2, 3)

    Kɛ 1 Mose 40:20 haa wa naa Kristofoli a juɛmi ngɛ fɔmi ligbi yemi he ha kɛɛ? (Fiɛlɔ 7:1; Mar. 6:21-28)