Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 21: Yosef Nyɛmimɛ ɔmɛ Nyɛ Lɛ

Ní kasemi 21: Yosef Nyɛmimɛ ɔmɛ Nyɛ Lɛ

HYƐ bɔnɛ jokuɛ nyumuyo ɔ ní pee mɔbɔ ha. Yosef ji nɛ ɔ nɛ. E nyɛmimɛ ɔmɛ jua lɛ ngɔ ha nyumuhi nɛ ɔmɛ kɛ yaa Mizraim. Yosef ma ya pee nyɔguɛ ngɛ lejɛ ɔ. Mɛni heje e nyɛmimɛ ɔmɛ pee nɔ́ yayami kaa kikɛ? Ejakaa a je Yosef he hunga.

Yosef nɛ e nyɛmimɛ ɔmɛ ngɛ lɛ juae

A tsɛ Yakob suɔ Yosef sane saminya. Enɛ ɔ heje ɔ, e kpɛ tade nɛ ngɛ fɛu gagaa ko ha lɛ. Benɛ e nyɛmimɛ 10 amɛ na bɔnɛ Yakob suɔ e sane ha a, a bɔni e he hunga jemi, nɛ a nyɛ lɛ. Se nɔ́ kpa ko hu heje nɛ a nyɛ lɛ ɔ nɛ.

Yosef nla nlamihi enyɔ. Ngɛ nlamihi enyɔ ɔmɛ tsuo mi ɔ, Yosef nyɛmimɛ ɔmɛ ba kpla si ha lɛ. Benɛ Yosef sɛɛ e nlami ɔmɛ ha e nyɛmimɛ ɔmɛ ɔ, ninyɛ nɛ́ a ná ngɛ e he ɔ mi ba wa po pe kekle ɔ.

Pee se ɔ, ligbi ko nɛ́ Yosef nyɛmimɛ ɔmɛ ya ngɛ a tsɛ ɔ tohi hyɛe ngɛ nga a nɔ ɔ, Yakob tsɔ Yosef kaa e ya hyɛ bɔnɛ a ngɛ ha. Benɛ a na nɛ Yosef ma a, a ti ni komɛ de ke: ‘Nyɛ ha nɛ waa gbe lɛ!’ Se a wetsɛ nɔkɔtɔma nɛ ji Ruben de ke: ‘Dɛbi, nyɛ ko pee ja!’ Lɔɔ he ɔ, a nu lɛ nɛ a sake lɛ kɛ wo muɔ ko nɛ́ nyu gbli ta mi ɔ mi. Kɛkɛ nɛ a ya hi si nɛ a bɔni bɔnɛ a maa pee lɛ ha a he susumi.

Jamɛ a be ɔ mi nɔuu kɛkɛ nɛ a na Ishmaelbi komɛ nɛ a bee. Kɛkɛ nɛ Yuda de e nyɛmimɛ ɔmɛ ke: ‘Nyɛ ha nɛ waa jua lɛ ngɔ ha Ishmaelbi ɔmɛ.’ Nɛ a pee ja. A jua Yosef sika hiɔ 20. Mɛni yiwutso nɔ́ nɛ a pee kikɛ!

Kɛ Yosef nyɛmimɛ ɔmɛ ma ya de a tsɛ ɔ kɛɛ? A gbe to nɛ a ngɔ Yosef tade ɔ kɛ tsɔ muɔ ɔ mi si abɔ. Kɛkɛ nɛ a ngɔ tade ɔ kɛ ho we mi ya kɛ ya tsɔɔ a tsɛ Yakob nɛ a de lɛ ke: ‘Wa na tade nɛ ɔ. Hyɛ kaa pi Yosef tade ɔ ji nɛ ɔ lo?’

Yakob le tade ɔ mi tso kaa e ji Yosef nɔ. Kɛkɛ nɛ e wo ya nɛ e de ke: ‘Lohwe awi yelɔ ko gbe ye bi Yosef.’ Nɛ kikɛ ji bɔnɛ Yosef nyɛmimɛ ɔmɛ suɔ kaa a tsɛ ɔ nɛ susu. Yakob ye aywilɛho. Nɛ e fo ya hluu ligbihi fuu. Se Yosef gbo we. Ha nɛ waa hyɛ nɔ́ nɛ ba e nɔ ngɛ he nɛ a ngɔ lɛ kɛ ho ɔ.

1 Mose 37:1-35.



Sane Bimihi

  • Mɛni heje Yosef nyɛmimɛ ɔmɛ je e he hunga, nɛ mɛni a pee?
  • Mɛni Yosef nyɛmimɛ ɔmɛ hla kaa a ko pee lɛ, se kɛ Ruben de kɛɛ?
  • Mɛni ba benɛ Ishmaelbi jua yeli komɛ bee ɔ?
  • Mɛni Yosef nyɛmimɛ ɔmɛ pee konɛ e ha a tsɛ ɔ nɛ́ susu kaa Yosef gbo?

Sane bimi kpahi

  • Kane 1 Mose 37:1-35.

    Kristofoli ma nyɛ maa kase Yosef nɔhyɛ nɔ́ ɔ ngɛ bɔnɛ a maa bɔ yayami nɛ nihi peeɔ ngɛ asafo ɔ mi ɔ he amaniɛ ha ngɛ mɛni blɔ nɔ? (1 Mose 37:2; 3 Mose 5:1; 1 Kor. 1:11)

    Mɛni ha Yosef nyɛmimɛ ɔmɛ pee lɛ yiwutso ní ɔ? (1 Mose 37:11, 18; Abɛ 27:4; Yak. 3:14-16)

    Mɛni Yakob pee nɛ́ nɔ tsuaa nɔ nɛ yeɔ aywilɛho ɔ hu peeɔ ja? (1 Mose 37:35)