Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 19: Yakob Ná Weku Agbo

Ní kasemi 19: Yakob Ná Weku Agbo
Yakob kɛ e bimɛ ɔmɛ

HYƐ bɔnɛ weku nɛ ɔ kle ha. Yakob bimɛ 12 ɔmɛ ji nɛ ɔ nɛ. E ngɛ biyihi hulɔ. Anɛ o le e bimɛ ɔmɛ a kpɛti nɔ ko biɛ lo? Ha nɛ waa kase a biɛ ɔmɛ.

Lea fɔ Ruben, Simeon, Levi kɛ Yuda. Rahel ye aywilɛho wawɛɛ ejakaa e fɔ we. Lɔɔ he ɔ, e ngɔ e mawa Bilha kɛ ha Yakob, nɛ e kɛ lɛ fɔ binyumuhi enyɔ nɛ ji Dan kɛ Naftali. Kɛkɛ nɛ Lea hu ngɔ e mawa Zilpa kɛ ha Yakob, nɛ e kɛ lɛ fɔ Gad kɛ Asher. Nyagbe ɔ, Lea fɔ binyumuhi enyɔ kɛ piɛɛ he, nɛ mɛ ji Isakar kɛ Zebulun.

Nyagbe mi ɔ, Rahel ba fɔ. Nɛ e wo lɛ biɛ ke Yosef. Pee se ɔ, wa maa kase Yosef he ní fuu, ejakaa e ba pee nɔmlɔ nguaa. Binyumuhi 11 nɛ ɔmɛ ji bimɛ nɛ Yakob fɔ benɛ e kɛ Rahel tsɛ Laban ya hi si ɔ.

Yakob ngɛ biyihi hulɔ, se a ti nɔ kake pɛ biɛ nɛ Baiblo ɔ tsua. E biɛ ji Dina.

E ba su be ko nɛ Yakob pee e juɛmi kaa e maa je Laban ngɔ nɛ́ e kpale e se kɛ ya Kanaan. Lɔɔ he ɔ, e ngɔ e weku ɔ, kɛ e tohi kɛ e nahi babauu ɔ nɛ e kɛ mɛ hia blɔ gagaa kɛ ho Kanaan ya.

Benɛ Yakob kɛ e weku ɔ ya su Kanaan be bɔɔ se ɔ, Rahel fɔ binyumu ekohu. E fɔ benɛ a ngɛ blɔ hiami mi kɛ yaa he ko. Rahel fɔmi ɔ mi wa, nɛ nyagbe ɔ, e gbo. Se bimwɔyo ɔ lɛɛ nɔ́ ko pee we lɛ. Nɛ Yakob wo lɛ biɛ ke Benyamin.

Wa suɔ nɛ́ wa kai Yakob binyumuhi 12 ɔmɛ a biɛhi, ejakaa a mi nɛ Israel ma mluku ɔ tsuo je. Ngɛ anɔkuale mi ɔ, Yakob binyumuhi 10 kɛ Yosef binyumuhi enyɔ ɔmɛ a biɛhi nɛ a kɛ wo Israel wɛtso nyɔngma kɛ enyɔ ɔ nɛ. Isak hi si jeha babauu ngɛ nyumuwi nɛ ɔmɛ a fɔmi se, nɛ eko ɔ, e bua jɔ kaa e ná bibimɛ fuu. Se ha nɛ waa hyɛ nɔ́ nɛ ba e bibi Dina nɔ.

1 Mose 29:32-35; 30:1-26; 35:16-19; 37:35.



Sane Bimihi

  • Kɛ a tsɛɛ binyumuhi ekpa nɛ Yakob kɛ e kekleekle yo Lea fɔ ɔ kɛɛ?
  • Kɛ a tsɛɛ binyumuhi enyɔ nɛ Lea mawa Zilpa kɛ Yakob fɔ ɔ kɛɛ?
  • Kɛ a tsɛɛ binyumuhi enyɔ nɛ Rahel mawa Bilha kɛ Yakob fɔ ɔ kɛɛ?
  • Kɛ a tsɛɛ Rahel binyumuhi enyɔ ɔmɛ kɛɛ, nɛ mɛni ba benɛ e fɔ e bi enyɔne ɔ?
  • Kaa bɔnɛ o na ngɛ foni ɔ mi ɔ, binyumuhi enyɛmɛ lɛ Yakob ngɛ, nɛ mɛni je a mi kɛ ba?

Sane bimi kpahi

  • Kane 1 Mose 29:32-35; 30:1-26; kɛ 35:16-19.

    Kaa bɔnɛ wa na ngɛ Yakob binyumuhi 12 ɔmɛ a he ɔ, mɛni nɔ Hebribi daa kɛ woɔ a bimɛ biɛ ngɛ blema a?

  • Kane 1 Mose 37:35.

    E ngɛ mi kaa Dina biɛ pɛ lɛ a tsua ngɛ Baiblo ɔ mi mohu, se mɛni ha wa leɔ kaa Yakob ngɛ biyihi pe kake? (1 Mose 37:34, 35)