Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 17: Hawi nɛ́ A Ngɛ Ekpaekpa

Ní kasemi 17: Hawi nɛ́ A Ngɛ Ekpaekpa
Esau

JOKUƐWI enyɔ nɛ ɔmɛ ji a he kulaa, aloo pi ja? Anɛ o le a biɛhi lo? Detsɛ ɔ ji Esau, nɛ nɔ nɛ ngɛ to ɔmɛ a nɔ hyɛe ɔ ji Yakob.

Esau kɛ Yakob ji Isak kɛ Rebeka a bimɛ nɛ a ji hawi. A tsɛ Isak suɔ Esau sane saminya, ejakaa e ya daa de nɛ e gbeɔ lo kɛ baa we mi nɛ weku ɔ yeɔ. Se Rebeka lɛɛ e suɔ Yakob sane, ejakaa e ngɛ kpoo, nɛ e he jɔ hulɔ.

A nɛ Abraham ngɛ je mi, nɛ eko ɔ, Yakob bua jɔɔ he kaa Abraham nɛ́ sɛɛ lɛ Yehowa he ní. Nyagbe mi ɔ, Abraham gbo benɛ e ye jeha 175 nɛ́ hawi ɔmɛ hu ye jeha nyɔngma kɛ enuɔ ɔ.

Benɛ Esau ye jeha 40, e ngɔ Kanaan yihi enyɔ. Enɛ ɔ hao Isak kɛ Rebeka, ejakaa yi nɛ ɔmɛ ja we Yehowa.

Ligbi ko ɔ, nɔ́ ko ba nɛ e ha Esau mi mi fu e nyɛmi Yakob wawɛɛ. E su benɛ Isak maa jɔɔ e bitɛte ɔ. Nɛ akɛnɛ Esau wa pe Yakob heje ɔ, e hyɛ blɔ kaa lɛ nɛ e maa ngɔ jɔɔmi ɔ. Se Esau jua e tɛte blɔ nya a kɛ ha Yakob momo. Jehanɛ se hu ɔ, benɛ a fɔ hawi ɔmɛ ɔ, Mawu de kaa Yakob ji nɔ nɛ ma ná jɔɔmi ɔ. Nɛ ja pɛpɛɛpɛ ji bɔnɛ e ba mi. Isak ngɔ jɔɔmi ɔ kɛ ha e bi Yakob.

Yakob

Pee se benɛ Esau ba le enɛ ɔ, e mi mi fu Yakob. E mi mi fu wawɛɛ nɛ e de ke e maa gbe Yakob. Benɛ Rebeka nu munyu nɛ ɔ, e hao saminya. Lɔɔ he ɔ, e de e huno Isak ke: ‘Ke Yakob hu ya ngɔ Kanaan yi nɛ ɔmɛ eko ɔ, lɛɛ e maa pee haomi ha mi.’

Lɔɔ he ɔ, Isak tsɛ e bi Yakob nɛ e de lɛ ke: ‘Koo ngɔ Kanaan yi ɔmɛ eko. Mohu ɔ, yaa o nɛ Betuel ngɔ ngɛ Haran. Ngɔɔ e binyumu Laban biyi ɔmɛ a kpɛti nɔ kake.’

Yakob bu e tsɛ ɔ tue, nɛ amlɔ nɔuu ɔ, e hia blɔ gagaa kɛ ho e wekuli ɔmɛ a ngɔ ya ngɛ Haran.

1 Mose 25:5-11, 20-34; 26:34, 35; 27:1-46; 28:1-5; Hebribi 12:16, 17.



Sane Bimihi

  • Mɛnɔmɛ ji Esau kɛ Yakob, nɛ kɛ a je ekpaekpa kɛɛ?
  • Jeha enyɛmɛ Esau kɛ Yakob ye loko a nɛ Abraham gbo?
  • Mɛni Esau pee nɛ e kɛ wo e tsɛ kɛ e nyɛ aywilɛho?
  • Mɛni heje Esau mi mi fu e nyɛmi Yakob wawɛɛ ɔ?
  • Mɛni ga Isak wo e bi Yakob?

Sane bimi kpahi

  • Kane 1 Mose 25:5-11, 20-34.

    Mɛni Yehowa gba ngɛ Rebeka hawi ɔmɛ a he? (1 Mose 25:23)

    Mɛni slɔɔto peemi ngɛ Yakob kɛ Esau su nɛ a je kpo ngɛ tɛte blɔ nya a he? (1 Mose 25:31-34)

  • Kane 1 Mose 26:34, 35; 27:1-46; kɛ 28:1-5.

    Mɛni blɔ nɔ hɛsa nɛ Esau be kɛ ha Mawu jami he níhi ɔ je kpo ngɛ? (1 Mose 26:34, 35; 27:46)

    Mɛni Isak de Yakob kaa e pee, konɛ e nine nɛ su Mawu jɔɔmi ɔ nɔ? (1 Mose 28:1-4)

  • Kane Hebribi 12:16, 17.

    Nihi nɛ be hɛsa kɛ ha ní klɔuklɔuhi ɔ, mɛni Esau nɔhyɛ nɔ́ ɔ tsɔɔ kaa e jee mi kɛ baa?