Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 16: Isak Ná Yo Kpakpa

Ní kasemi 16: Isak Ná Yo Kpakpa

ANƐ o le yo nɛ ngɛ foni ɔ mi ɔ lo? E biɛ ji Rebeka. Nɛ nyumu nɛ́ ngɛ nyɛɛe kɛ ma e ngɔ ɔ ji Isak. Rebeka yaa pee e yo. Kɛ pee kɛɛ loko e ba ja?

Abraham suɔ kaa e ngɔ yo kpakpa ha e binyumu Isak. E sume kaa Isak nɛ ngɔ Kanaan yi ɔmɛ eko, ejakaa wɔ jali ji mɛ. Lɔɔ he ɔ, Abraham tsɛ e tsɔlɔ ɔ nɛ e de lɛ ke: ‘I suɔ kaa o kpale kɛ ya ye wekuli ɔmɛ a ngɔ ngɛ Haran konɛ o ya ngɔ yo ba ha ye bi Isak.’

Amlɔ nɔuu nɛ Abraham tsɔlɔ ɔ ngɔ afukpɔngɔ nyɔngma nɛ e hia blɔ. Benɛ e piɛ bɔɔ nɛ e maa su he nɛ Abraham wekuli ɔmɛ ngɛ ɔ, e da si ngɛ vu ko he. Jamɛ a be ɔ, e su gbɔkuɛ nya si, nɛ ji be nɛ ma a mi yi ɔmɛ ba saa nyu ngɛ vu ɔ mi. Lɔɔ he ɔ, Abraham tsɔlɔ ɔ sɔle ha Yehowa ke: ‘Mo ha nɛ yo nɛ ma sa nyu ha i kɛ afukpɔngɔ ɔmɛ ɔ, nɛ́ pee yo nɛ o je kɛ ha Isak.’

Rebeka nɛ e kɛ Isak ma kpemi

E kɛ we tsɔ nɛ Rebeka ba konɛ e ba sa nyu. Nɛ benɛ tsɔlɔ ɔ bi Rebeka ke e ha lɛ nyu ɔ eko ɔ, e ha lɛ. Kɛkɛ nɛ Rebeka sa nyu ɔ eko kɛ ha tsɔlɔ ɔ we afukpɔngɔ ɔmɛ hulɔ. Enɛ ɔ ji nítsumi nɛ he wa, ejakaa afukpɔngɔhi nuɔ nyu fuu nitsɛ.

Enɛ ɔ se ɔ, Abraham tsɔlɔ ɔ bi lɛ ke: ‘Mɛnɔ bi ji mo?’ Nɛ Rebeka ha heto ke: ‘Ye tsɛ biɛ ji Betuel.’ Nɛ e kpale bi lɛ ke: ‘Anɛ wa ma ná he ko maa to ngɛ nyɛ we ɔ mi lo?’ Nɛ e he nɔ ke: ‘He ko ngɛ nɛ nyɛ ma nyɛ maa to ngɛ wa ngɔ.’ Abraham tsɔlɔ ɔ le kaa Betuel ji Abraham nyɛminyumu Nahor bi. Enɛ ɔ heje ɔ, e kpla si nɛ e na Yehowa si kaa e nyɛɛ e hɛ mi kɛ ba Abraham wekuli a ngɔ.

Jamɛ a gbɔkuɛ ɔ, Abraham tsɔlɔ ɔ bɔ Betuel kɛ Rebeka nyɛminyumu Laban e nyɛɛmi mi amaniɛ. Mɛ tsuo a kplɛɛ nɔ kaa Rebeka kɛ lɛ nɛ ho konɛ e ya gba Isak. Benɛ a tsɛ Rebeka nɛ a bi lɛ keji kaa e suɔ nɛ e kɛ tsɔlɔ ɔ maa ya a, kɛ e de kɛɛ? E ha heto ke: ‘Ee, i suɔ kaa i kɛ lɛ maa ya.’ Lɔɔ he ɔ, e nɔ jena nɔuu ɔ, a kuɔ afukpɔngɔ ɔmɛ nɛ a hia blɔ gagaa kɛ ho Kanaan ya.

A ba su gbɔkuɛ nya si. Rebeka na nyumu ko nɛ ngɛ nyɛɛe ngɛ nga a nɔ kɛ ma. Lɛ ji Isak ɔ nɛ. E bua jɔ kaa e na Rebeka. Isak ba suɔ Rebeka wawɛɛ. Maa pee jeha etɛ pɛ ji nɛ ɔ nɛ e nyɛ Sara gbo nɛ e ngɛ aywilɛho yee kpamisa. Se amlɔ nɛ ɔ, e ná bua jɔmi ekohu.

1 Mose 24:1-67.



Sane Bimihi

  • Mɛnɔmɛ ji nyumu kɛ yo ɔ nɛ ngɛ foni ɔ mi ɔ?
  • Mɛni Abraham pee kɛ hla yo ha e binyumu ɔ, nɛ mɛni heje?
  • Mɛni blɔ nɔ a ha Abraham tsɔlɔ ɔ sɔlemi ɔ heto ngɛ?
  • Benɛ a bi Rebeka kaa e maa gba Isak lo ɔ, mɛni heto e ha?
  • Mɛni ha Isak bua jɔmi ekohu?

Sane bimi kpahi

  • Kane 1 Mose 24:1-67.

    Mɛni su kpakpahi Rebeka je kpo benɛ e kɛ Abraham tsɔlɔ ɔ kpe ngɛ vu ɔ he ɔ? (1 Mose 24:17-20; Abɛ 31:17, 31)

    Mɛni nɔhyɛ nɔ́ kpakpa blɔ nya nɛ́ Abraham to kɛ ha Isak ɔ peeɔ kɛ haa Kristofoli mwɔnɛ ɔ? (1 Mose 24:37, 38; 1 Kor. 7:39; 2 Kor. 6:14)

    Mɛni heje e sa kaa wa ná be kɛ juɛ níhi a he, kaa bɔnɛ Isak pee ɔ? (1 Mose 24:63; La 77:12; Fil. 4:8)