LOT kɛ e weku ɔ kɛ Abraham hi he kake ngɛ Kanaan zugba a nɔ. Ligbi ko ɔ, Abraham de Lot ke: ‘Hiɛ ɔ zugba a klee we bɔnɛ maa kpe wa lohwe ɔmɛ tsuo. I kpa mo pɛɛ, ha nɛ wa mi nɛ gbɛ. Ke o ngɔ hiɔ nɔ ɔ, ma ngɔ muɔ nɔ, nɛ ke o ngɔ muɔ nɔ ɔ, ma ngɔ hiɔ nɔ.’

Lot po e hɛ nɛ e hyɛ zugba a tsuo kɛ kpe. E na zugba a he ko nɛ ngɛ fɛu, nɛ́ nyu kɛ nga fuu ngɛ lejɛ ɔ kɛ ha e lohwe ɔmɛ. Lejɛ ɔ ji Yordan Kpokpa a nɛ. Lɔɔ heje ɔ, Lot kɛ e weku ɔ, kɛ e lohwe ɔmɛ tsuo hia kɛ ho lejɛ ɔ ya. Pee se ɔ, a ya hi Sodom ma a mi.

Sodom mabi ɔmɛ ji nimli yayamihi. Enɛ ɔ hao Lot, ejakaa lɛɛ e ji nɔmlɔ kpakpa. Nɛ e hao Mawu hulɔ. Nyagbe ɔ, Mawu tsɔ bɔfohi enyɔ konɛ a ya bɔ Lot kɔkɔ kaa e ma kpata Sodom kɛ ma nɛ́ e ngɛ kasa nya nɛ ji Gomora hɛ mi ngɛ a ní yayami ɔmɛ a heje.

Bɔfo ɔmɛ de Lot ke: ‘Ngɔɔ o yo ɔ kɛ o biyiwi ɔmɛ nɛ́ nyɛɛ je hiɛ ɔ esɔesɔ!’ Lot kɛ e weku ɔ he sɔɛ, heje ɔ bɔfo ɔmɛ nu a kɔni si nɛ a je mɛ kpo kɛ je ma a mi. Kɛkɛ nɛ bɔfo ɔ kake de mɛ ke: ‘Nyɛɛ tu fo kɛ he nyɛ yi wami! Nyɛ ko hyɛ nyɛ se. Nyɛɛ tu fo kɛ ya yoku ɔmɛ a nɔ konɛ nyɛ ko gbo.’

Lot kɛ e biyiwi ɔmɛ bu tue nɛ a tu fo kɛ je Sodom. A dɛ si be kpiti ko po, nɛ a hyɛ we a se hulɔ. Se Lot yo ɔ gbo tue. Benɛ a je Sodom ma a he saii ɔ, e da si nɛ e plɛ kɛ hyɛ e se. Kɛkɛ nɛ Lot yo ɔ plɛ pee ngo kpɔ. Anɛ o na lɛ ngɛ foni ɔ mi lo?

Wa ma nyɛ maa kase ní kɛ je sane nɛ ɔ mi. E tsɔɔ kaa Mawu heɔ nihi nɛ buɔ lɛ tue ɔ yi wami, se nihi nɛ bui lɛ tue ɔ lɛɛ, a hɛ mi kpataa.

1 Mose 13:5-13; 18:20-33; 19:1-29; Luka 17:28-32; 2 Petro 2:6-8.

Lot nɛ ngɛ fo tue kɛ ngɛ Sodom jee


Sane Bimihi

  • Mɛni heje Abraham kɛ Lot gba a mi?
  • Mɛni heje Lot suɔ kaa e ma ya hi Sodom?
  • Kɛ Sodom mabi ɔmɛ ngɛ kɛɛ?
  • Mɛni kɔkɔ bɔmi bɔfohi enyɔ ɔmɛ kɛ ha Lot?
  • Mɛni heje Lot yo ɔ plɛ pee ngo kpɔ ɔ?
  • Mɛni wa ma nyɛ maa kase ngɛ Lot yo ɔ he sane ɔ mi?

Sane bimi kpahi

  • Kane 1 Mose 13:5-13.

    Mɛni wa ma nyɛ maa kase ngɛ Abraham he, ke nyagba ko ba waa kɛ ni kpahi a kpɛti? (1 Mose 13:8, 9; Rom. 12:10; Fil. 2:3, 4)

  • Kane 1 Mose 18:20-33.

    Mɛni blɔ nɔ bɔnɛ Yehowa kɛ Abraham hi si ha a tsɔɔ kaa Yehowa kɛ Yesu maa kojo ngɛ dami blɔ nɔ? (1 Mose 18:25, 26; Mat. 25:31-33)

  • Kane 1 Mose 19:1-29.

    Mɛni Baiblo mi sane nɛ ɔ tsɔɔ ngɛ bɔnɛ Mawu buɔ nyumu kɛ nyumu nɛ peeɔ yakayaka ní ɔ he? (1 Mose 19:5, 13; 3 Mose 20:13)

    Mɛni slɔɔto peemi wa na ngɛ bɔnɛ Abraham kɛ Lot pee a ní ngɛ Mawu blɔ tsɔɔmi nɛ e kɛ ha mɛ ɔ he, nɛ mɛni wa ma nyɛ maa kase kɛ je enɛ ɔ mi? (1 Mose 19:15, 16, 19, 20; 22:3)

  • Kane Luka 17:28-32.

    Mɛni su Lot yo ɔ hɛɛ ngɛ helo nya níhi a he, nɛ mɛni blɔ nɔ enɛ ɔ peeɔ kɔkɔ bɔmi kɛ haa wɔ? (Luka 12:15; 17:31, 32; Mat. 6:19-21, 25)

  • Kane 2 Petro 2:6-8.

    Mɛni su e sa kaa wa ná ngɛ yayami peemi nɛ bɔle wɔ ɔ he, kaa bɔnɛ Lot pee ɔ? (Eze. 9:4; 1 Yoh. 2:15-17)