Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 14: Mawu Ka Abraham Hemi kɛ Yemi nɛ E Hyɛ

Ní kasemi 14: Mawu Ka Abraham Hemi kɛ Yemi nɛ E Hyɛ

ANƐ o na nɔ́ nɛ Abraham ngɛ pee ɔ lo? E hɛɛ ha, nɛ e pee kaa nɔ́ nɛ e yaa gbe e bi ɔ. Mɛni ma ha e pee nɔ́ ko kaa ja? Kekleekle ɔ, ha nɛ waa hyɛ bɔnɛ pee ha nɛ Abraham kɛ Sara fɔ a bi ɔ.

Abraham nɛ e kɛ Isak ngɛ afɔle sãe

Mo kai kaa Mawu wo mɛ si kaa e ma ha nɛ a fɔ binyumu. Se e pee kaa nɔ́ nɛ siwo ɔ be nyɛe maa ba mi, ejakaa Abraham kɛ Sara bwɔ. Se kɛ̃ ɔ, Abraham ngɛ hemi kɛ yemi kaa Mawu ma nyɛ maa tsu enɛ ɔ he ní. Lɔɔ heje ɔ, mɛni ba?

Benɛ Mawu wo Abraham si ɔ, jeha kake ba be. Kɛkɛ nɛ benɛ Abraham ye jeha 100 nɛ́ e yo Sara hu ye jeha 90, a fɔ binyumu nɛ a wo lɛ biɛ ke Isak. Mawu ye e si womi ɔ nɔ!

Se benɛ Isak wa a, Yehowa ka Abraham hemi kɛ yemi ɔ nɛ e hyɛ. Yehowa tsɛ lɛ: ‘Abraham!’ Nɛ Abraham he nɔ ke: ‘Ne mi!’ Kɛkɛ nɛ Mawu de lɛ ke: ‘Ngɔɔ o binyumu Isak, nɛ ji o bi kake too ɔ, konɛ o kɛ lɛ nɛ ya yoku nɛ ma tsɔɔ mo ɔ nɔ. Ke nyɛ ya su lejɛ ɔ, gbee o binyumu ɔ nɛ o ngɔ lɛ kɛ sa bɔ ha mi.’

Munyu nɛ ɔ hao Abraham wawɛɛ nitsɛ, ejakaa e suɔ e binyumuyo ɔ saminya. Nɛ mo kai hu kaa, Mawu wo si kaa Abraham bimɛ maa hi Kanaan zugba a nɔ. Se ke Isak gbo ɔ, kɛ enɛ ɔ maa pee kɛ ba mi kɛɛ? E ngɛ mi kaa Abraham nui enɛ ɔ sisi mohu, se kɛ̃ ɔ, e bu Mawu tue.

Benɛ a su yoku ɔ nɔ ɔ, Abraham fĩ Isak nɛ e ngɔ lɛ kɛ fɔ bɔ sami latɛ nɛ e pee ɔ nɔ. Kɛkɛ nɛ e je ha kpo konɛ e kɛ gbe e bi ɔ. Se amlɔ nɔuu kɛkɛ nɛ Mawu bɔfo ko tsɛ lɛ: ‘Abraham, Abraham!’ Nɛ Abraham he nɔ ke: ‘Ne mi!’

Mawu de lɛ ke: ‘Koo ta jokuɛ ɔ he, nɛ koo pee lɛ nɔ́ ko nɔ́ ko. Kpaako i na kaa o ngɛ hemi kɛ yemi ngɛ ye mi, ejakaa o tsi we o bi kake too ɔ nya ngɔ ha o he.’

Abraham hemi kɛ yemi ngɛ Mawu mi kle nitsɛ! E he ye kaa nɔ́ ko nɔ́ ko be nɛ Yehowa be nyɛe maa pee. Nɛ e he ye hu kaa Yehowa ma nyɛ ma tle Isak si kɛ je gbeje. Se, e pi Yehowa suɔmi nya nitsɛ kaa e ha Abraham nɛ gbe Isak. Lɔɔ he ɔ, Mawu ha nɛ jijɔ ko ya du tso ko kpɛ ngɛ a kasa nya je, nɛ e de Abraham kaa e ngɔ to ɔ mohu kɛ sa bɔ ngɛ e bi ɔ nane mi.

1 Mose 21:1-7; 22:1-8.



Sane Bimihi

  • Mɛni si Mawu wo Abraham, nɛ mɛni blɔ nɔ Mawu ye e si womi ɔ nɔ ngɛ?
  • Kaa bɔnɛ o na ngɛ foni ɔ mi ɔ, kɛ Mawu ka Abraham hemi kɛ yemi ha kɛɛ?
  • Mɛni Abraham pee, be mi nɛ e nui nɔ́ heje nɛ Mawu de lɛ ke e ngɔ e bi ɔ kɛ sã bɔ ɔ sisi po ɔ?
  • Mɛni ba benɛ Abraham je ha kpo konɛ e kɛ gbe e bi ɔ?
  • Kɛ hemi kɛ yemi nɛ Abraham ngɛ ngɛ́ Mawu mi ɔ mi wa ha kɛɛ?
  • Mɛni Mawu je kɛ ha Abraham konɛ e kɛ sã bɔ ɔ, nɛ mɛni blɔ nɔ e pee enɛ ɔ?

Sane bimi kpahi

  • Kane 1 Mose 21:1-7.

    Mɛni heje Abraham po e bi ɔ ngɛ ligbi kpaanyɔne ɔ nɔ? (1 Mose 17:10-12; 21:4)

  • Kane 1 Mose 22:1-18.

    Mɛni blɔ nɔ Isak ba e he si ha e tsɛ Abraham, nɛ mɛni ji nɔ́ ko nɛ́ he hia wawɛɛ nɛ maa ya nɔ hwɔɔ se he foni enɛ ɔ peeɔ? (1 Mose 22:7-9; 1 Kor. 5:7; Fil. 2:8, 9)