Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 11: Kekleekle Alale ɔ

Ní kasemi 11: Kekleekle Alale ɔ

ANƐ o le nɔ́ nɛ Noa pee kekle benɛ e kɛ e weku ɔ je kpo ngɛ lɛ ɔ mi ɔ lo? E sa bɔ, aloo e ngɔ níke ní kɛ ha Mawu. O na lɛ nɛ́ e ngɛ ja pee ngɛ foni ɔ mi lo? Noa ngɔ lohwehi kɛ sa bɔ kɛ na Mawu si kaa e baa e kɛ e weku ɔ yi ngɛ nyu afua ngua a mi.

Lɛ ɔ kɛ alale ɔ

Anɛ o susu kaa Yehowa bua jɔ níke ní ɔ he lo? Ee, e bua jɔ he. Lɔɔ he ɔ, e wo Noa si kaa e kɛ nyu afua be je ɔ hɛ mi kpatae hu kɔkɔɔkɔ.

E kɛ we nɛ nyu ɔ tsuo gbli ta zugba a nɔ, nɛ Noa kɛ e weku ɔ je si himi ehe sisi ekohu. Mawu jɔɔ mɛ nɛ e de mɛ ke: ‘Nyɛ fɔ bimɛ fuu. Nyɛ he nɛ hiɛ babauu kɛ ya si nyɛ ma hyi zugba a nɔ.’

Hwɔɔ se ko ke nihi nu nyu afua nguaa he sane ɔ, eko ɔ, a maa ye gbeye kaa nyu afua maa ba ekohu. Lɔɔ heje ɔ, Mawu ha okadi ko nɛ ma kai nimli kaa, e wo si kaa e be nyu afua ngɔe kɛ kpata je ɔ hɛ mi hu kɔkɔɔkɔ. Anɛ o le nɔ́ nɛ e ha mɛ konɛ e kai mɛ ɔ lo? Lɔɔ ji alale.

Noa kɛ e weku ɔ

Alale pɔɔ kpo jemi ngɛ hiɔwe ke hiɔmi nɛ se nɛ pu bɔni tsomi ɔ. Alale hɛɛ su slɔɔtohi fuu nɛ́ ngɛ fɛu. Anɛ o na eko hyɛ lo? O na nɔ́ nɛ ngɛ foni ɔ mi ɔ lo?

Nɔ́ nɛ Yehowa de ji nɛ ɔ nɛ: ‘I ngɛ si woe kaa i be nyu afua ngɔe kɛ kpata nimli kɛ lohwehi a hɛ mi hu kɔkɔɔkɔ. Ma ngɔ alale kɛ to bɔku ɔ mi, nɛ ke alale ɔ je kpo ɔ, ma na, nɛ ma kai ye si womi ɔ.’

Lɔɔ heje ɔ, ke o na alale ɔ, mɛni e sa kaa e ha o kai? Ee, lɔɔ ji Mawu si womi kaa e be nyu afua ngɔe kɛ kpata je ɔ hɛ mi hu kɔkɔɔkɔ.

1 Mose 8:18-22; 9:9-17.



Sane Bimihi

  • Kaa bɔnɛ o na ngɛ foni ɔ mi ɔ, mɛni Noa pee kekle benɛ e je kpo ngɛ lɛ ɔ mi ɔ?
  • Mɛni fãmi Mawu kɛ ha Noa kɛ e weku ɔ ngɛ Nyu Afua a se?
  • Mɛni ji si womi nɛ Mawu kɛ ha?
  • Ke wa na alale ɔ, mɛni e sa kaa e ha wa kai?

Sane bimi kpahi

  • Kane 1 Mose 8:18-22.

    Mɛni blɔ nɔ wa ma nyɛ maa ngɔ ‘bɔ kɛ e he via’ kɛ ha Yehowa mwɔnɛ ɔ? (1 Mose 8:21; Heb. 13:15, 16)

    Mɛni Yehowa na ngɛ bɔnɛ nimli a tsui ngɛ ha a he, nɛ mɛni enɛ ɔ biɔ nɛ waa pee? (1 Mose 8:21; Mat. 15:18, 19)

  • Kane 1 Mose 9:9-17.

    Mɛni somi Yehowa kɛ zugba a nɔ adebɔ ní tsuo pee? (1 Mose 9:10, 11)

    Mɛni be alale he somi ɔ maa hi si kɛ ya si? (1 Mose 9:16)