Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 2: Abɔɔ ko nɛ Ngɛ Fɛu

Ní kasemi 2: Abɔɔ ko nɛ Ngɛ Fɛu

HYƐ zugba a ngɛ hiɛ ɔ! Nɔ́ tsuaa nɔ́ ngɛ fɛu nitsɛ! Nɛ hyɛ nga a kɛ tsohi, kɛ mɔmɔhi kɛ lohwe ɔmɛ hu ha. O ma nyɛ maa tsɔɔ suɔ kɛ jatahi ngɛ foni ɔ mi lo?

Lohwehi nɛ a ngɛ Eden abɔɔ ɔ mi

Mɛni blɔ nɔ Mawu gu kɛ ná abɔɔ nɛ ngɛ fɛu kikɛ nɛ ɔ? Yoo, lɛɛ waa hyɛ bɔnɛ Mawu pee ha kɛ dla zugba a ha wɔ.

Kekleekle ɔ, Mawu bɔ nga kɛ hà zugba a nɔ. Nɛ e bɔ tso tsɔwi kɛ tso nguahi slɔɔtoslɔɔtohi. Ní nɛ ɔmɛ ha zugba a nɔ pee fɛu. Se se nami kpahi hu ngɛ a he. Tso ɔmɛ fuu haa wɔ niye ní nɛ ngɔɔ saminya.

Pee se ɔ, Mawu bɔ lohi kɛ wo nyu ɔ mi, kɛ hiɔwe lohwe pɛlitsɛmɛ. E bɔ gbehi kɛ anɔhi (atihi) kɛ okpɔngɔhi; lohwe nguahi kɛ lohwe nyafinyafihi. Mɛni lohwehi o naa ngɛ he nɛ o ngɛ ɔ? Anɛ e sɛ kaa wa ná bua jɔmi kaa Mawu bɔ ní nɛ ɔmɛ tsuo ha wɔ lo?

Nyagbe ɔ, Mawu dla zugba a he ko saminyayoo. E wo lejɛ ɔ biɛ ke Eden abɔɔ. E hi kɛ pi si. E ngɛ fɛu nitsɛ. Mawu suɔ kaa zugba a tsuo nɛ pee fɛu kaa abɔɔ nɛ ɔ.

Se hyɛ foni ɔ ekohu. Anɛ o le nɔ́ nɛ Mawu na kaa e be abɔɔ nɛ ɔ mi lo? Ha nɛ waa hyɛ.

1 Mose 1:11-25; 2:8, 9.



Sane Bimihi

  • Mɛni blɔ nɔ Mawu dla zugba a ha wɔ konɛ waa hi nɔ?
  • Moo tsɔɔ lohwe slɔɔtohi nɛ Mawu bɔ. (Hyɛ foni ɔ.)
  • Mɛni heje lɛ Eden abɔɔ ɔ ngɛ slɔɔto ɔ?
  • Kɛ Mawu suɔ kaa zugba a tsuo nɛ́ pee kɛɛ?

Sane bimi kpahi

  • Kane 1 Mose 1:11-25.

    Mɛni Mawu bɔ ngɛ ligbi etɛne ɔ nɔ? (1 Mose 1:12)

    Mɛni ya nɔ ngɛ ligbi eywiɛne ɔ nɔ? (1 Mose 1:16)

    Mɛni lohwehi Mawu bɔ ngɛ ligbi enuɔne kɛ ekpane ɔmɛ a nɔ? (1 Mose 1:20, 21, 25)

  • Kane 1 Mose 2:8, 9.

    Mɛni tsohi enyɔ komɛ nɛ́ ngɛ slɔɔto Mawu kɛ wo abɔɔ ɔ mi, nɛ mɛni he okadi enɛ ɔ pee ɔ?