Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 7: Nyumu Kãtsɛ Ko

Ní kasemi 7: Nyumu Kãtsɛ Ko
Enok

BENƐ nimli a he ba hiɛ ngɛ zugba a nɔ ɔ, a kpɛti nihi fuu bɔni ní yayamihi peemi kaa Kain. Se nyumu kake ko lɛɛ e slo lɛ ngɛ a he. E biɛ ji Enok. Enok ji nyumu kãtsɛ. Nimli tsuo nɛ bɔle lɛ ɔ ngɛ ní yayamihi pee, se Enok lɛɛ e ya nɔ nɛ e sɔmɔ Mawu.

Anɛ o le nɔ́ nɛ ha nɛ nimli nɛ hi si ngɛ jamɛ a be ɔ mi pee ní yayamihi babauu ɔ lo? Mo susu he nɛ o hyɛ. Mɛnɔ sisi Adam kɛ Hawa loko a gbo tue nɛ a ye tso yiblii nɛ́ Mawu wo mɛ si ke a ko ye ɔ? Lɛ ji bɔfo yayami ɔ nɛ. Baiblo ɔ tsɛɛ lɛ ke Satan. E ngɛ mɔde bɔe kaa e ma ha nɛ nɔ tsuaa nɔ nɛ pee ní yayamihi.

Ojo fiami kɛ nɔ gbemi

Ligbi ko ɔ, Yehowa Mawu ha Enok de ni ɔmɛ nɔ́ ko nɛ́ a bua jɔɛ he. Lɔɔ ji kaa: ‘Mawu ma kpata nimli yayamihi tsuo a hɛ mi ligbi ko.’ Eko ɔ, nɔ́ nɛ ni ɔmɛ nu ɔ ha a mi mi fu wawɛɛ. Nɛ a ka po kaa a maa gbe Enok. Lɔɔ he ɔ, e biɔ nɛ Enok nɛ pee kã loko e nyɛ nɛ e de ni ɔmɛ nɔ́ nɛ Mawu ma peemi ɔ.

Mawu ha we nɛ Enok nɛ hi nimli yayami ɔmɛ a kpɛti be kɛkɛɛ. Enok ye jeha 365 pɛ. Mɛni heje nɛ wa ke e ye “jeha 365 pɛ” ɔ? Ejakaa nimli nɛ hi si ngɛ jamɛ a be ɔ mi ɔ ngɛ he wami, nɛ a nyɛɔ hii si be kɛkɛɛ pe nimli nɛ ngɛ mwɔnɛ ɔ. Nɔ́ heje ji kaa, Enok bi Metusela ye jeha 969!

Nihi nɛ a ngɛ ní yayamihi pee

Benɛ Enok gbo se ɔ, ni ɔmɛ a ní yayami peemi ɔmɛ mi ba wa wawɛɛ. Baiblo ɔ de ke, ‘a susuɔ ní yayamihi be tsuaa be, nɛ zugba a nɔ hyi tɔ kɛ yi kpɛti wami ní peepeehi.’

Anɛ o le nɔ́ kake ko heje nɛ haomihi hiɛ ngɛ zugba a nɔ jamɛ a be ɔ mi lo? Nɔ́ heje ji kaa, Satan gu blɔ ehe ko nɔ nɛ e haa ni ɔmɛ peeɔ ní yayamihi. Wa maa kase enɛ ɔ he ní ngɛ ní kasemi nɛ nyɛɛ se ɔ mi.

1 Mose 5:21-24, 27; 6:5; Hebribi 11:5; Yuda 14, 15.



Sane Bimihi

  • Mɛni blɔ nɔ Enok je muno ngɛ ni kpa amɛ a he?
  • Mɛni heje nihi nɛ hi si ngɛ Enok be ɔ mi pee ní yayamihi fuu ɔ?
  • Mɛni ji ní yayamihi komɛ nɛ nihi pee? (Hyɛ foni ɔ.)
  • Mɛni heje e biɔ nɛ Enok nɛ́ pee kã a?
  • Jeha enyɛmɛ nimli yeɔ ngɛ jamɛ a be ɔ mi, se jeha enyɛmɛ Enok kɛ hi si?
  • Mɛni ba ngɛ Enok gbenɔ se ɔ?

Sane bimi kpahi

  • Kane 1 Mose 5:21-24, 27.

    Mɛni wekukpa hi Enok kɛ Yehowa kpɛti? (1 Mose 5:24)

    Kaa bɔnɛ Baiblo ɔ tsɔɔ, mɛnɔ ji nɔmlɔ nɛ hi si jeha babauu pe nɔ tsuaa nɔ, nɛ jeha enyɛmɛ e ye loko e gbo? (1 Mose 5:27)

  • Kane 1 Mose 6:5.

    Enok gbenɔ se ɔ, jije zugba a nɔ si himi puɛ kɛ ya su, nɛ kɛ enɛ ɔ kɛ wa mwɔnɛ ɔ si himi kɔ ha kɛɛ? (2 Tim. 3:13)

  • Kane Hebribi 11:5.

    Mɛni ji Enok su nɛ sa Mawu hɛ mi saminya a, nɛ mɛni je mi kɛ ba? (1 Mose 5:22)

  • Kane Yuda 14, 15.

    Mɛni blɔ nɔ mwɔnɛ ɔ Kristofoli ma nyɛ maa kase Enok kã peemi ɔ benɛ a ngɛ nihi kɔkɔ bɔe ngɛ Harmagedon ta a nɛ ma a he ɔ? (2 Tim. 4:2; Heb. 13:6)