Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Ye Womi Nɛ Sɛɛɔ Baiblo Mi Sanehi

Ní kasemi 5: A Je Si Himi nɛ́ Mi Wa Sisi

Ní kasemi 5: A Je Si Himi nɛ́ Mi Wa Sisi

ADAM kɛ Hawa ná haomi babauu benɛ a je mɛ kpo kɛ je Eden abɔɔ ɔ mi ɔ. E biɔ nɛ a tsu ní wawɛɛ loko a ná niye ní nɛ a ye. Benɛ e sa kaa tsohi nɛ woɔ yiblii nɛ́ ngɔɔ nɛ puɛ ngɛ zugba a nɔ ɔ, mio tsohi kɛ ngahi mohu ji níhi nɛ puɛ kɛ bɔle mɛ. Enɛ ɔ ji nɔ́ nɛ ba Adam kɛ Hawa nɔ benɛ a gbo Mawu tue nɛ́ a pi E huɛmɛ hu ɔ nɛ.

Adam nɛ e kɛ e binyumu ngɛ ní tsue wawɛɛ

Se nɔ́ nɛ pa hí kulaa ji kaa, Adam kɛ Hawa bɔni gbomi bɔɔbɔɔ. Mo kai kaa Mawu wo mɛ si kaa ke a ye tso nɛ ngɛ abɔɔ ɔ kpɛti ɔ nɔ yiblii ɔ, a ma gbo. Niinɛ, kɛ je ligbi ɔ nɛ a ye tso yiblii ɔ, a bɔni gbomi bɔɔbɔɔ. E ji kuasia jemi kaa a gbo Mawu tue!

Mawu je Adam kɛ Hawa kɛ je Eden abɔɔ ɔ mi loko a fɔ a bimɛ. Enɛ ɔ tsɔɔ kaa a bimɛ ɔmɛ hu maa bwɔ nɛ a ma gbo.

Kaa Adam kɛ Hawa bu Yehowa tue ɔ, jinɛ a kɛ a bimɛ tsuo ko hi si ngɛ bua jɔmi mi. Mɛ tsuo a ko hi zugba a nɔ ngɛ bua jɔmi mi daa. E ko bɛ kaa nɔ ko maa bwɔ, nɛ́ e nu hiɔ, nɛ e gbo.

Mawu suɔ kaa nihi nɛ hi si ngɛ bua jɔmi mi kɛ ya neneene, nɛ E wo enɛ ɔ he si kaa e maa ba mi kokooko ligbi ko. Pi zugba a tsuo nɔ kɛkɛ pɛ nɛ maa pee fɛu, se nɔ tsuaa nɔ ma ná nɔmlɔtso mi he wami hulɔ. Nɛ nɔ tsuaa nɔ ngɛ zugba a nɔ maa pee e nyɛmi huɛ kpakpa kɛ Mawu hu huɛ.

Hawa kɛ e bimɛ

Se Hawa pee we Mawu huɛ hu. Lɔɔ heje ɔ, pɔ tɔ lɛ saminya loko e fɔ e bimɛ. E na nɔ́ wawɛɛ. Yehowa tue nɛ e gbo ɔ ngɔ aywilɛho babauu kɛ ba e nɔ. Anɛ o kplɛɛ we nɔ lo?

Adam kɛ Hawa fɔ binyumuhi kɛ biyihi fuu. A wo a kekle binyumu ɔ biɛ ke Kain. Nɛ a wo bi enyɔne ɔ hu biɛ ke Habel. Mɛni ba a nɔ? Anɛ o le lo?

1 Mose 3:16-23; 4:1, 2; Kpojemi 21:3, 4.



Sane Bimihi

  • Mɛni si himi mi Adam kɛ Hawa ya je benɛ a je mɛ kpo kɛ je Eden abɔɔ ɔ mi ɔ?
  • Mɛni bɔni Adam kɛ Hawa nɔ bami, nɛ mɛni heje?
  • Mɛni heje Adam kɛ Hawa bimɛ hu maa bwɔ nɛ́ a gbo?
  • Kaa Adam kɛ Hawa bu Yehowa tue ɔ, jinɛ mɛni si himi a kɛ a bimɛ ko ná?
  • Hawa tue gbomi ɔ ha e pii ngɛ mɛni blɔ nɔ?
  • Kɛ a tsɛɛ Adam kɛ Hawa a kekle bimɛ enyɔ ɔmɛ a biɛhi kɛɛ?
  • Mɛnɔmɛ ji jokuɛwi kpahi nɛ ngɛ foni ɔ mi ɔ?

Sane bimi kpahi

  • Kane 1 Mose 3:16-23 kɛ 4:1, 2.

    Kɛ zugba a nɛ́ a gbiɛ ɔ ha Adam si himi ba pee kɛɛ? (1 Mose 3:17-19; Rom. 8:20, 22)

    Mɛni heje Hawa biɛ nɛ sisi ji “Hɛkalɔ” ɔ, sa saminya a? (1 Mose 3:20)

    Benɛ Adam kɛ Hawa pee yayami po ɔ, mɛni Yehowa pee nɛ́ tsɔɔ kaa e susuɔ a he? (1 Mose 3:7, 21)

  • Kane Kpojemi 21:3, 4.

    Mɛni ji “ní momohi” nɛ o ngɛ blɔ hyɛe kaa a se maa po ɔ?