MƐNI ngɛ slɔɔto ngɛ foni nɛ ɔ mi? Lɔɔ ji nimli nɛ ngɛ mi ɔ. Mɛ ji kekleekle nyumu kɛ yo. Mɛnɔ bɔ mɛ? Mawu ji nɔ nɛ bɔ mɛ. Anɛ o le e biɛ lo? E biɛ ji Yehowa. Nyumu ɔ biɛ ji Adam, nɛ yo ɔ hu biɛ ji Hawa.

Adam kɛ Hawa ngɛ Eden abɔɔ ɔ mi

Bɔnɛ Yehowa Mawu bɔ Adam ji nɛ ɔ nɛ. E ngɔ zu kɛ puɛ nyumu nɔmlɔtso nɛ́ ye mluku. Lɔɔ se ɔ, e mu wami mumi ngɔ wo nɔmlɔ ɔ gugwɔ mi, nɛ Adam ba wami mi.

Yehowa Mawu ha Adam nítsumi ko. E de Adam ke e wo lohwehi slɔɔto ɔmɛ tsuo biɛ. Eko ɔ, Adam to lohwe ɔmɛ a he hɛ hluu loko e wo mɛ tsuo biɛ. Benɛ Adam ngɛ lohwe ɔmɛ biɛ woe ɔ, e na nɔ́ ko. Anɛ o le nɔ́ nɛ e na a lo?

Lohwe ɔmɛ tsuo ngɛ a he piɛɛli. Suɔ atsɛ kɛ suɔ anyɛ ngɛ, nɛ jata atsɛ kɛ jata anyɛ hu ngɛ. Se Adam be he piɛɛlɔ ko. Lɔɔ heje ɔ, Yehowa ha Adam hwɔ mahe wawɛɛ, nɛ e je Adam kasa wu kake. Yehowa ngɔ kasa wu nɛ ɔ kɛ bɔ yo, nɛ e ba plɛ Adam yo.

Adam bua jɔ jehanɛ! Nɛ mo susu bɔnɛ Hawa hu bua maa jɔ ha kaa e maa hi abɔɔ nɛ́ ngɛ fɛu kikɛ mi! Amlɔ nɛ ɔ, a ma nyɛ ma fɔ bimɛ nɛ a hi si ngɛ bua jɔmi mi.

Yehowa suɔ kaa Adam kɛ Hawa nɛ́ hi si kɛ ya neneene. E suɔ kaa zugba a nɔ tsuo nɛ́ pee fɛu kaa Eden abɔɔ ɔ. Adam kɛ Hawa bua jɔ nitsɛ kaa a ma tsu nítsumi nɛ ɔ! Anɛ o ko suɔ nɛ́ o piɛɛ a he kɛ pee zugba a abɔɔ nɛ ngɛ fɛu lo? Se Adam kɛ Hawa bua jɔmi ɔ se kɛ we. Ha nɛ waa hyɛ nɔ́ heje.

La 83:18; 1 Mose 1:26-31; 2:7-25.



Sane Bimihi

  • Mɛni slɔɔto peemi ngɛ ní kasemi 3 kɛ ní kasemi 2 foni ɔmɛ a kpɛti?
  • Mɛnɔ bɔ kekle nyumu ɔ, nɛ mɛni ji nyumu ɔ biɛ?
  • Mɛni nítsumi Mawu ha Adam kaa e tsu?
  • Mɛni heje Mawu ha Adam hwɔ mahe wawɛɛ ɔ?
  • Adam kɛ Hawa ko hi si kɛ ya si mɛni be, nɛ mɛni nítsumi Mawu suɔ kaa a tsu?

Sane bimi kpahi

  • Kane La 83:18.

    Mɛni ji Mawu biɛ, nɛ mɛni he blɔ nɛ́ se be e hɛɛ ngɛ zugba a nɔ? (Yer. 16:21; Dan. 4:17)

  • Kane 1 Mose 1:26-31.

    Mɛni ji nyagbe nɔ́ nɛ Mawu bɔ ngɛ ligbi ekpa a nɔ, nɛ mɛni blɔ nɔ adebɔ nɛ ɔ je muno ngɛ lohwehi a he? (1 Mose 1:26)

    Mɛni Yehowa ha nimli kɛ lohwehi tsuo kaa a ye? (1 Mose 1:30)

  • Kane 1 Mose 2:7-25.

    Mɛni e biɔ nɛ Adam nɛ pee loko e nyɛ nɛ́ e wo lohwe ɔmɛ biɛ? (1 Mose 2:19)

    Mɛni blɔ nɔ 1 Mose 2:24 yeɔ bua wɔ ngɛ konɛ waa nu Mawu juɛmi ngɛ gba si himi, mi gbami, kɛ gba mi pomi he ɔ sisi? (Mat. 19:4-6, 9)