Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Mɛni Tutuutu Ji Baiblo ɔ Tsɔɔmi?

 YI ENUƆ

Kpɔmi Nɔ́ ɔ—Mawu Nike Ní Nɛ He Jua Wa Pe Kulaa

Kpɔmi Nɔ́ ɔ—Mawu Nike Ní Nɛ He Jua Wa Pe Kulaa
  • Mɛni ji kpɔmi nɔ́ ɔ?

  • Mɛni blɔ nɔ a gu kɛ ha kpɔmi nɔ́ ɔ?

  • Mɛni se nami ngɛ he ha mo?

  • Mɛni o maa pee kɛ tsɔɔ kaa o bua jɔ he?

1, 2. (a) Mɛni haa nike ní ko peeɔ nɔ́ nɛ he jua wa saminya ha mo? (b) Mɛni he je wa ma nyɛ ma de ke kpɔmi nɔ́ ɔ ji nike ní nɛ he jua wa pe kulaa nɛ o ma nyɛ ma ná a?

MƐNI ji nike ní nɛ he jua wa saminya nɛ nɔ ko ha mo hyɛ? Pi nike ní ɔ he jua wawɛ nɛ tsɔɔ kaa e he ngɛ se nami. Ngɛ anɔkuale mi ɔ, pi sika abɔ nɛ a kɛ he nike ní ko nɛ tsɔɔ kaa e he jua wa loo e he jua wɛ. Mohu ɔ, ke o bua jɔ nike ní ɔ he aloo e tsu o hiami nɔ́ ko ha mo ɔ, lɔ ɔ ji nɔ́ nɛ tsɔɔ kaa se nami ngɛ he saminya ha mo.

2 Ngɛ nike ní tsuo nɛ o maa suɔ kaa o ná a kpɛti ɔ, nike ní ko ngɛ nɛ pe kulaa. E ji nike ní nɛ Mawu ngɔ ha adesahi. Yehowa ha wɔ níhi fuu, se nike ní nɛ he jua wa pe kulaa nɛ e ha wɔ ji e Bi Yesu Kristo nɛ e kɛ sa afɔle kɛ kpɔ wɔ ɔ. (Kane Mateo 20:28.) Wa maa na ngɛ yi nɛ ɔ mi kaa, kpɔmi nɔ́ ɔ ji nike ní nɛ he jua wa pe kulaa nɛ o nine ma nyɛ maa su nɔ, ejakaa e ma ha mo bua jɔmi nɛ́ se pui gblegbleegble, nɛ e ma tsu o hiami ní nɛ pe kulaa hu ha mo. Niinɛ, kpɔmi nɔ́ ɔ ji suɔmi nɛ mi kuɔ saminya nɛ Yehowa je kpo ha mo.

 MƐNI JI KPƆMI NƆ́ Ɔ?

3. Mɛni ji kpɔmi nɔ́ ɔ, nɛ mɛni sisi e sa kaa waa nu kekle loko wa maa nu bɔ nɛ kpɔmi nɔ́ ɔ he jua wa ha a sisi?

3 Ngɛ kpiti pomi mi ɔ, kpɔmi nɔ́ ɔ ji blɔ nya nɛ Yehowa to nɛ e kɛ ma je adesahi kɛ je yayami kɛ gbenɔ mi. (Efeso Bi 1:7) Bɔ nɛ pee nɛ waa nu Baiblo tsɔɔmi nɛ ɔ sisi ɔ, e he hia kaa wa susu nɔ́ nɛ ba ngɛ Eden abɔɔ ɔ mi ɔ he. Ja wa nu nɔ́ nɛ je Adam dɛ benɛ e pee yayami ɔ sisi kekle loko wa maa nu yi mi tomi he je nɛ kpɔmi nɔ́ ɔ peeɔ nike ní nɛ he jua wa saminya a sisi.

4. Mɛni mluku nɛ Adam ye ɔ ji kɛ ha lɛ?

4 Benɛ Yehowa bɔ Adam ɔ, e ha lɛ nɔ́ ko nɛ he jua wa nitsɛ, nɛ ji adesa wami nɛ ye mluku. Mo susu nɔ́ nɛ enɛ ɔ ji kɛ ha Adam he nɛ o hyɛ. A bɔ Adam kaa nɔmlɔ nɛ ye mluku ngɛ nɔmlɔ tso kɛ juɛmi mi. Enɛ ɔ tsɔɔ kaa e be hiɔ nue, e be bwɔe, nɛ e be gboe hulɔ. Akɛnɛ e ye mluku he je ɔ, huɛ bɔmi nɛ ngɛ e kɛ Yehowa a kpɛti ɔ ngɛ slɔɔto. Baiblo ɔ de ke, “Mawu bi” ji Adam. (Luka 3:38) Lɔ ɔ he ɔ, huɛ bɔmi kpakpa hi Adam kɛ Yehowa Mawu a kpɛti kaa bɔ nɛ tsɛ nɛ ngɛ suɔmi kɛ e bi hii si ɔ. Yehowa kɛ e bi Adam tu munyu nɛ e ha lɛ ní tsumi nɛ haa nɔ bua jɔmi, nɛ e tsɔɔ lɛ níhi nɛ e ngɛ hlae kaa e pee.1 Mose 1:28-30; 2:16, 17.

5. Ke Baiblo ɔ de ke a bɔ Adam ‘ngɛ Mawu subai nɔ’ ɔ, mɛni ji e sisi?

5 Mawu bɔ Adam ‘ngɛ e subai nɔ́.’ (1 Mose 1:27) Lɔ ɔ tsɔɔ we kaa Adam nɔmlɔ tso ngɛ kaa Mawu. Wa kase ngɛ womi nɛ ɔ Yi 1 ɔ mi kaa Mawu ɔ, Mumi ji lɛ. (Yohane 4:24) Enɛ ɔ tsɔɔ kaa Yehowa be nɔmlɔ tso nɛ ji he lo kɛ muɔ. Adam nɛ a bɔ ngɛ Mawu subai nɔ ɔ tsɔɔ kaa a bɔ lɛ kɛ Mawu su kpakpahi kaa suɔmi, ní lemi, dami sane yemi, kɛ he wami. Adam ngɛ kaa e Tsɛ ɔ ngɛ blɔ kpa ko hu nɛ he hia nɔ, nɛ́ ji kaa e ngɛ he blɔ nɛ e kɛ peeɔ nɔ́ nɛ e suɔ. Lɔ ɔ he ɔ, Adam be kaa klama nɛ  tsuɔ nɔ́ pɛ nɛ a to he blɔ nya kaa e tsu ɔ. Mohu ɔ, e ma nyɛ maa mwɔ e yi mi kpɔ ngɛ nɔ́ kpakpa kɛ nɔ́ yaya he. Kaa e bu Mawu tue jinɛ e ko hi si daa ngɛ Paradeiso zugba a nɔ.

6. Mɛni je Adam dɛ benɛ e gbo Mawu tue ɔ, nɛ kɛ enɛ ɔ sa e sisi bimɛ a he ha kɛɛ?

6 Lɔ ɔ he ɔ, e ngɛ heii kaa benɛ Adam gbo Mawu tue nɛ a bu lɛ gbenɔ fɔ ɔ, nɔ́ ko nɛ he jua wa wawɛɛ bɔ lɛ. Yayami nɛ e pee ɔ ha nɛ adesa wami nɛ ye mluku nɛ e ngɛ ɔ kɛ jɔɔmi kpahi tsuo je e dɛ. (1 Mose 3:17-19) Aywilɛho sane ji kaa, pi Adam pɛ nɛ wami nɛ he jua wa nɛ ɔ bɔ, se mohu e bɔ e bimɛ nɛ́ e ma fɔ ɔ hulɔ. Mawu Munyu ɔ de ke: “Nɔ kake [Adam] lɛ pee yayami, nɛ yayami kɛ gbenɔ ba. Enɛ ɔ ha gbenɔ sã nimli tsuo, ejakaa nɔ tsuaa nɔ pee yayami.” (Roma Bi 5:12) Niinɛ, wɔ tsuo wa ná yayami kɛ je Adam ngɔ. Enɛ ɔ he ɔ, Baiblo ɔ de ke, e “jua” e kɛ e nina tsuo kɛ wo yayami kɛ gbenɔ nyɔguɛ yemi mi. (Roma Bi 7:14, NW) Hɛ nɔ kami ko kulaa be ha Adam kɛ Hawa, ejakaa a je blɔ nɛ a gbo Mawu tue. Se a bimɛ nɛ wɔ hu wa piɛɛ he ɔ nɛɛ?

7, 8. Mɛni ji ní titli enyɔ nɛ kpɔmi nɔ́ tsɔɔ?

7 Yehowa gu kpɔmi nɔ́ ɔ nɔ kɛ he adesahi a yi wami. Mɛni ji kpɔmi nɔ́? Kpɔmi nɔ́ tsɔɔ ní titli enyɔ. Kekleekle ɔ, kpɔmi nɔ́ ji hiɔ nɛ a woɔ konɛ a ngmɛɛ nɔ ko he aloo nɛ́ a kɛ kpɔ nɔ́ ko nɛ a kɛ to awaba. Wa ma nyɛ maa ngɔ kɛ to sika nɛ a woɔ kɛ kpɔɔ nɔ ko nɛ a nu lɛ nyɔguɛ ngɛ ta mi ɔ he. Nɔ́ nɛ ji enyɔ ɔ, kpɔmi nɔ́ ji hiɔ nɛ a woɔ ngɛ nɔ́ ko he. E ngɛ kaa sika nɛ a woɔ ha nɔ ko nɛ a puɛ e nɔ́ ko, aloo a plaa lɛ. Kaa nɔ hyɛmi nɔ́ ɔ, ke nɔ ko puɛ nɔ ko nɔ́ ko ɔ, e woɔ sika nɛ suu nɔ́ nɛ e puɛ ɔ nya pɛpɛɛpɛ.

8 Mɛni blɔ nɔ a maa gu kɛ wo nɔ́ nguaa nɛ Adam ha e bɔ wɔ tsuo ɔ he hiɔ, konɛ a kɛ kpɔ wɔ kɛ je yayami kɛ  gbenɔ nyɔguɛ yemi ɔ sisi? Ha nɛ wa susu kpɔmi nɔ́ nɛ Yehowa to he blɔ nya ha wɔ, kɛ se nami nɛ ngɛ he ɔ he.

BLƆ NƆ NƐ YEHOWA GU NƐ E KƐ KPƆMI NƆ́ Ɔ HA

9. Te kpɔmi nɔ́ nɛ sa nɛɛ?

9 Akɛnɛ wami nɛ ye mluku lɛ laa he je ɔ, adesa wami nɛ yi mluku be nyɛe ma kpɔ wɔ. (La 49:7, 8) E sa kaa a ná kpɔmi nɔ́ nɛ e kɛ nɔ́ nɛ laa a he jua wawɛ sɔ pɛpɛɛpɛ. Enɛ ɔ kɛ Yehowa dami sane yemi sisi tomi mlaa nɛ ngɛ Baiblo ɔ mi ɔ kpa gbi. E ke: “Á ngɔ wami kɛ to wami nane mi.” (5 Mose 19:21, NW) Enɛ ɔ he ɔ, mɛni a ma nyɛ maa ngɔ kɛ to adesa wami nɛ ye mluku nɛ je Adam dɛ ɔ nane mi? Adesa wami kpa nɛ ye mluku ji “kpɔmi nɔ́ nɛ sa.”1 Timoteo 2:6, NW.

10. Mɛni blɔ nɔ Yehowa gu kɛ ha kpɔmi nɔ́ ɔ?

10 Mɛni blɔ nɔ Yehowa gu kɛ ha kpɔmi nɔ́ ɔ? E tsɔ e bɔfohi nɛ ye mluku ɔ a ti nɔ kake kɛ ba zugba a nɔ. Pi hiɔwe bɔfo ɔmɛ a kpɛti nɔ ko kɛkɛ nɛ e tsɔ. Se mohu ɔ, e tsɔ e Bi kake ɔ nɛ e kplɛɛ we e he nɔ́ kulaa a. (Kane 1 Yohane 4:9, 10.) E Bi nɛ ɔ kplɛɛ nɛ e je e hiɔwe sihi he ɔ kɛ ba. (Filipi Bi 2:7) Kaa bɔ nɛ wa na ngɛ yi eywiɛ ɔ mi ɔ, Yehowa gu nyakpɛ blɔ nɔ nɛ e je e Bi nɛ ɔ wami kɛ je hiɔwe kɛ ba wo Maria fɔmi kotoku mi. Kɛ gu Mawu mumi klɔuklɔu ɔ nɔ ɔ, a fɔ Yesu kaa adesa nɛ ye mluku, nɛ e be yayami fɔ bumi sisi.Luka 1:35.

Yehowa ngɔ e Bi kake ɔ kɛ ha wɔ kaa kpɔmi nɔ́

11. Kɛ nɔ kake ma plɛ kɛ kpɔ nimli ayɔhi abɔ ha kɛɛ?

11 Kɛ nɔ kake ma plɛ kɛ kpɔ nimli ayɔhi abɔ ha kɛɛ? Nɛ kɛ ba kɛɛ nɛ adesa ayɔhi abɔ ɔ ba plɛ pee yayami peeli? Mo kai kaa benɛ Adam pee yayami ɔ, adesa wami nɛ ye mluku nɛ he jua wa nɛ e ngɛ ɔ je e dɛ. Enɛ ɔ he ɔ, e nyɛ we nɛ e ha e bimɛ wami nɛ ye mluku. Mohu ɔ, nɔ́ pɛ nɛ e si ha mɛ ji yayami kɛ gbenɔ. Yesu,  nɔ nɛ Baiblo ɔ tsɛɛ lɛ ke “nyagbe Adam” ɔ, ye mluku nɛ e pee we yayami gblee. (1 Korinto Bi 15:45) Ngɛ blɔ ko nɔ ɔ, Yesu ba da Adam nane mi bɔ nɛ pee nɛ e kpɔ wɔ. Yesu gu e wami nɛ ye mluku nɛ e kɛ sa afɔle, kɛ tue bumi nɛ e pee kɛ pi si ha Mawu ɔ nɔ nɛ e kɛ wo Adam yayami ɔ he hiɔ. Kɛ gu enɛ ɔ nɔ ɔ, Yesu ha Adam sisi bimɛ hɛ nɔ kami.Roma Bi 5:19; 1 Korinto Bi 15:21, 22.

12. Yesu piimi ɔ ma mɛni nɔ mi?

12 Baiblo ɔ tsɔɔ bɔ nɛ Yesu na nɔ́ ha loko e gbo ɔ mi fitsofitso. A fiaa lɛ kpa, nɛ a sɛu lɛ ngɛ sɛumi tso nɔ, nɛ e pii hluu kɛ ya si benɛ e gbo. (Yohane 19:1, 16-18, 30; Mi Tsɔɔmi Munyu nɛ ji, “Nɔ́ He Je Nɛ Anɔkuale Kristofohi Kɛ Klɔɔsu Tsu We Ní Ngɛ A Jami Mi”) Mɛni he je nɛ e he hia kaa Yesu nɛ na nɔ́ wawɛɛ jã? Pee se ɔ, wa maa na ngɛ womi nɛ ɔ yi ko mi kaa Satan de ke adesa ko kulaa be nɛ maa ye Yehowa anɔkuale ke e sɛ haomi mi. Yesu to e tsui si ngɛ amanehlu babauu nɛ e na a mi, nɛ e gu enɛ ɔ nɔ kɛ ha Satan powa fiami ɔ heto. Yesu tsɔɔ kaa ngɛ níhi nɛ Abosiami maa pee ɔ tsuo se ɔ, adesa nɛ ye mluku, nɛ ngɛ he blɔ nɛ e kɛ peeɔ nɔ́ nɛ lɛ nitsɛ e suɔ ɔ, ma nyɛ maa ye Mawu anɔkuale. Yehowa bua jɔ anɔkuale nɛ e Bi nɛ e suɔ lɛ ɔ ye ɔ he saminya!Abɛ 27:11.

13. Mɛni blɔ nɔ a gu kɛ ha kpɔmi nɔ́ ɔ?

13 Mɛni blɔ nɔ a gu kɛ ha kpɔmi nɔ́ ɔ? Ngɛ Yuda bi ɔmɛ a nyɔhiɔ nɛ ji Nisan we ligbi 14 ɔ nɔ, ngɛ jeha 33 ɔ mi ɔ, Mawu ngmɛ blɔ nɛ a gbe e Bi nɛ ye mluku nɛ yayami be e he ɔ. Kɛ gu enɛ ɔ nɔ ɔ, Yesu ngɔ e wami kɛ sa afɔle “si kake too nyɔngloo.” (Hebri Bi 10:10) Benɛ Yesu gbo ligbi etɛ se ɔ, Yehowa tle lɛ si kɛ ba wami mi kaa mumi mi adebɔ nɔ́. Yesu ngɔ bɔ nɛ e we adesa wami nɛ ye mluku nɛ́ e kɛ sa afɔle ɔ he jua wa ha a ya ha Mawu ngɛ hiɔwe kaa Adam sisi bimɛ a kpɔmi nɔ́. (Hebri Bi 9:24) Yehowa kplɛɛ Yesu afɔle sami ɔ nɔ kaa  kpɔmi nɔ́ nɛ sa nɛ a kɛ ma kpɔ adesahi kɛ je yayami kɛ gbenɔ nyɔguɛ yemi ɔ sisi.Kane Roma Bi 3:23, 24.

SE NAMI NƐ NGƐ KPƆMI NƆ́ Ɔ HE HA MO

14, 15. Mɛni e sa kaa waa pee konɛ a ngɔ ‘wa he yayami ɔmɛ kɛ pa wɔ’?

14 E ngɛ mi kaa wa ji yayami peeli mohu, se kɛ gu kpɔmi nɔ́ ɔ nɔ ɔ, wa ma nyɛ ma ná jɔɔmi babauu nɛ́ se be. Nyɛ ha nɛ wa susu Mawu nike ní nɛ pe kulaa nɛ ɔ he se nami komɛ nɛ ngɛ ha wɔ amlɔ nɛ ɔ kɛ hwɔɔ se ɔ he nɛ waa hyɛ.

15 Yayami pami. Akɛnɛ fã tɔmi ngɛ wa he kɛ je fɔmi mi he je ɔ, wa bɔɔ mɔde wawɛɛ nitsɛ loko wa nyɛɔ peeɔ nɔ́ nɛ da. Wɔ tsuo wa tɔ̃ɔ ngɛ munyu tutui aloo ní peepee mi. Se kɛ gu Yesu kpɔmi afɔle sami ɔ nɔ ɔ, a ma nyɛ maa ngɔ ‘wa he yayami ɔmɛ kɛ pa wɔ.’ (Kolose Bi 1:13, 14) Jã wa tsake wa tsui ngɛ anɔkuale mi loko wa ma ná yayami pami. Jehanɛ hu, e sa kaa waa da hemi kɛ yemi nɛ wa ná ngɛ Yesu kpɔmi afɔle sami ɔ nɔ kɛ kpa Yehowa pɛɛ kaa e ngɔ wa he yayami ɔmɛ kɛ pa wɔ.Kane 1 Yohane 1:8, 9.

16. Mɛni yeɔ bua wɔ nɛ wa jaa Mawu kɛ he nile kpakpa, nɛ mɛni se nami ngɛ he nile kpakpa nɛ wa maa hɛɛ ɔ he?

16 He nile kpakpa ngɛ Mawu hɛ mi. Ke nɔ ko he nile buu lɛ fɔ ɔ, e peeɔ lɛ kaa e he be se nami. E ngɛ mi kaa wa yi mluku mohu lɛɛ, se yayami pami nɛ wa náa kɛ gu kpɔmi nɔ́ ɔ nɔ he je ɔ, Yehowa kɛ mi mi himi ngmɛɛ wɔ blɔ nɛ wa jaa lɛ, nɛ wa yi mi kojo we wɔ. (Hebri Bi 9:13, 14) Enɛ ɔ haa wɔ he blɔ nɛ waa kɛ Yehowa tuɔ munyu faa. Lɔ ɔ he ɔ, wa ma nyɛ maa sɔle kɛ ha lɛ be tsuaa be. (Hebri Bi 4:14-16) Ke nɔ ko ngɛ he nile kpakpa a, e náa tue mi jɔmi, bumi, kɛ bua jɔmi.

17. Akɛnɛ Yesu gbo ha wɔ he je ɔ, mɛni jɔɔmihi wa ma nyɛ ma ná?

17 Neneene wami he hɛ nɔ kami ngɛ paradeiso zugba a  nɔ. Roma Bi 6:23 ɔ de ke: “Yayami he hiɔwo ji gbenɔ.” E de hu ke, “Se Mawu nɔke nɔ́ ɔ ji neneene wami nɛ wa náa ngɛ wa Nyɔmtsɛ Yesu Kristo mi.” Wa susu jɔɔmihi nɛ wa ma ná ngɛ Paradeiso zugba a nɔ ɔ he ngɛ womi nɛ ɔ Yi 3 ɔ mi. (Kpojemi 21:3, 4) Akɛnɛ Yesu gbo ha wɔ he je ɔ, wa ma ná jɔɔmi nɛ ɔmɛ tsuo kɛ neneene wami, kɛ nɔmlɔ tso mi he wami kpakpa. Bɔ nɛ pee nɛ wa nine nɛ su jɔɔmi nɛ ɔmɛ a nɔ ɔ, e sa kaa waa tsɔɔ kaa wa bua jɔ nike ní nɛ ji kpɔmi nɔ́ ɔ he.

MƐNI BLƆ NƆ O MAA GU KƐ JE SINA KPO NGƐ KPƆMI NƆ́ Ɔ HE?

18. Mɛni he je nɛ e sa kaa waa na Yehowa si ngɛ kpɔmi nɔ́ ɔ he ɔ?

18 Mɛni he je e sa kaa waa na Yehowa si wawɛɛ ngɛ kpɔmi nɔ́ ɔ he ɔ? Wa buɔ nike ní ko kaa e he jua wa, titli ke nɔ ɔ puɛ e be aloo sika ngɛ he. Ke wa na kaa nɔ ko je e tsui mi kɛ ke wɔ nɔ́ ɔ, e taa wa tsui he wawɛɛ. Kpɔmi nɔ́ ɔ ji nike ní nɛ he jua wa pe kulaa, ejakaa Mawu ngɔ nɔ́ ko ngua nitsɛ kɛ sã afɔle. Yohane 3:16 de ke: “Ejakaa Mawu suɔ je ɔ saminya, nɛ e ngɔ e Bi kake ɔ ngɔ ha.” Kpɔmi nɔ́ ɔ ji odase nɛ kle pe kulaa nɛ tsɔɔ kaa Yehowa suɔ wɔ. Lɔ ɔ hu yeɔ odase kaa Yesu suɔ  wɔ, ejakaa e ngɔ e wami kɛ fɔ si faa ngɛ wa he. (Kane Yohane 15:13.) Enɛ ɔ he ɔ, e sa kaa nike ní nɛ ji kpɔmi nɔ́ ɔ nɛ ha nɛ wa ná nɔ mi mami kaa Yehowa kɛ e biɔ suɔ wɔ kakaaka.Galatia Bi 2:20.

Yehowa he ní nɛ o maa kase ɔ ji blɔ kake nɔ nɛ o maa gu kɛ tsɔɔ kaa o bua jɔ kpɔmi nɔ́ ɔ he

19, 20. Mɛni blɔhi a nɔ o maa gu kɛ tsɔɔ kaa o bua jɔ Mawu nike ní nɛ ji kpɔmi nɔ́ ɔ he?

19 Lɛɛ mɛni blɔ nɔ o maa gu kɛ tsɔɔ kaa o bua jɔ Mawu nike ní nɛ ji kpɔmi nɔ́ ɔ he mɔ? Kekleekle ɔ, moo kase Nɔ́ Halɔ Ngua nɛ ji Yehowa he ní. (Yohane 17:3) Baiblo ɔ nɛ o maa kase kɛ gu womi nɛ ɔ nɔ maa ye bua mo konɛ o le níhi fuu ngɛ Yehowa he. Ke o ba le Yehowa a, suɔmi nɛ o ngɛ ha lɛ ɔ hu mi ma ba wa nitsɛ. Nɛ suɔmi nɛ ɔ maa wo mo gɛjɛmi konɛ o pee e suɔmi nya ní daa.1 Yohane 5:3.

20 Mo je hemi kɛ yemi kpo ngɛ Yesu kpɔmi afɔle sami ɔ mi. A de ngɛ Yesu Kristo he ke: “Nɔ nɛ heɔ Bi ɔ yeɔ ɔ, e nine [maa] su neneene wami ɔ nɔ.” (Yohane 3:36) Mɛni wa maa pee kɛ tsɔɔ kaa wa ngɛ hemi kɛ yemi ngɛ Yesu mi? Pi wa nya kɛkɛ nɛ waa kɛ ma de ke wa ngɛ hemi kɛ yemi. Yakobo 2:26 de ke: “Hemi kɛ yemi nɛ ní tsumi piɛɛ we he ɔ, peeɔ hemi kɛ yemi gbogboe.” Ngɛ anɔkuale mi ɔ, wa ‘ní tsutsui’ aloo ‘ní peepee’ lɛ tsɔɔ kaa wa ngɛ hemi kɛ yemi niinɛ. Blɔ kake nɔ nɛ wa maa gu kɛ tsɔɔ kaa wa ngɛ hemi kɛ yemi ngɛ Yesu mi ji kaa, wa maa bɔ mɔde nɛ waa kase lɛ ngɛ wa munyu tutui, kɛ wa ní peepeehi tsuo mi.Yohane 13:15.

21, 22. (a) Mɛni he je nɛ e sa kaa waa ya Nyɔmtsɛ ɔ Gbɔkuɛ Niye Ní nɛ a yeɔ daa jeha a sisi ɔ? (b) Mɛni nya a maa tsɔɔ wɔ ngɛ Yi 6 kɛ 7 ɔ mi?

21 Moo ya Nyɔmtsɛ ɔ Gbɔkuɛ Niye Ní nɛ a yeɔ daa jeha a sisi. Ngɛ Nisan ligbi 14, jeha 33  ɔ mi ɔ, Yesu to gbijlɔ klɛdɛɛ ko nɛ Baiblo ɔ tsɛɛ ke ‘Nyɔmtsɛ ɔ Gbɔkuɛ Niye Ní’ ɔ sisi. (1 Korinto Bi 11:20; Mateo 26:26-28)  A tsɛɛ gbijlɔ nɛ ɔ hu ke Kristo gbenɔ ɔ Kaimi. Yesu pee enɛ ɔ bɔ nɛ pee nɛ e kɛ ye bua e kaseli ɔmɛ kɛ anɔkuale Kristofohi kpahi tsuo konɛ e hi a juɛmi mi kaa, e ngɔ e wami kɛ ha kaa kpɔmi nɔ́ kɛ gu e gbenɔ kaa adesa nɛ ye mluku ɔ nɔ. Yesu ngɔ fami kɛ ha e kaseli ɔmɛ ngɛ gbijlɔ nɛ ɔ he ke: “Nyɛɛ pee enɛ ɔ nɛ nyɛ kɛ kai mi.” (Luka 22:19) Kaimi nɛ ɔ yemi kaiɔ wɔ suɔmi agbo nɛ Yehowa kɛ Yesu je kpo ha wɔ kɛ gu kpɔmi nɔ́ ɔ nɔ. Ke wa yaa Yesu gbenɔ Kaimi nɛ a peeɔ daa jeha a sisi ɔ, lɛɛ wa ngɛ tsɔɔe kaa wa bua jɔ kpɔmi nɔ́ ɔ he. *

22 Ngɛ anɔkuale mi ɔ, kpɔmi nɔ́ ɔ nɛ Yehowa kɛ ha wɔ ɔ ji nike ní nɛ he jua wa saminya. (2 Korinto Bi 9:14, 15) Ni gbogboehi po ma nyɛ ma ná nike ní nɛ se be nɛ ɔ he se. Yi 67 ɔ maa tsɔɔ wɔ enɛ ɔ nya.

^ kk. 21 Ke o suɔ nɛ o le níhi fuu ngɛ Nyɔmtsɛ ɔ Gbɔkuɛ Niye Ní ɔ he ɔ, hyɛ Mi Tsɔɔmi Munyu nɛ ji, “Nyɔmtsɛ ɔ Gbɔkuɛ Niye Ní ɔ—Gbijlɔ Nɛ Woɔ Mawu Hɛ Mi Nyami.”